• 23 ءساۋىر, 2014

اقپاراتتار اعىنى

264 رەت

كورسەتىلدى

2 مين

وقۋ ءۇشىن

Egemen Qazaqstan

● «قازاگرو» 2014 جىلعى كوكتەمگى دالا جۇمىستارىنا 61,6 ملرد. تەڭگە بولەدى. كەشە تاراتىلعان ءباسپاسوز پاراقشاسىندا مۇنىڭ 40 ملرد. تەڭگەسى بيۋدجەتتىك نەسيە ەكەنى ايتىلعان. بۇدان باسقا, ۇلتتىق كومپانيا العاش رەت ەگىس جۇمىستارىنا ەكىنشى دەڭگەيلى بانكتەر ارقىلى 20 ملرد. تەڭگە قارجى قاراستىرادى. ● الماتى قالاسىنىڭ ماڭىندا جاڭا اۋەجاي بوي كوتەرەدى. بۇل تۋرالى الماتى وبلىسى اكىمىنىڭ ورىنباسارى اماندىق باتالوۆ مالىمدەدى. ونىڭ ايتۋىنشا, جاڭا اۋە قاقپاسى ءۇشىن وڭتۇستىك استانادان 54 شاقىرىم جەردەگى جەتىگەن كەنتى ماڭىندا 2 مىڭ گەكتارعا جۋىق جەر تەلىمى بەلگىلەنىپ قويىلعان. ● وڭتۇستىك قازاقستاندا قۋاتتىلىعى 12 مۆت كۇن ەنەرگياسى ستانساسى سالىنادى. «قازاتومونەركاسىپ» ۇاك» اق باسقارما توراعاسىنىڭ كەڭەسشىسى ازات بەتەكباەۆتىڭ مالىمدەۋىنشە, قازىر جوبا بويىنشا جۇمىستار باستالىپ كەتكەن. ايماقتاعى الەۋمەتتىك نىسانداردا 4 ستانسانىڭ جوبالاۋ جۇمىستارى جاسالۋدا. ● شىعىس قازاقستان وبلىسى رەسەي ەت ەكسپورتىن 200 تونناعا دەيىن جەتكىزەدى. قازىرگى تاڭدا ايماقتا 44 مىڭ باس ءىرى قارانى سەمىرتىپ جاتقان 276 مال بورداقىلاۋ الاڭى وسىعان ۇلەس قوسادى. ال مال بورداقىلاۋشىلار مەملەكەت تاراپىنان ۇلكەن قامقورلىققا يە. ولار وتكەن جىلى قازىنادان 5 ملرد. تەڭگەدەن استام سۋبسيديا الدى. ● كەشە كوكشەتاۋدا كلاسسيكالىق جانە حالىق مۋزىكاسىنىڭ ءىى فەستيۆالى سورەدەن شىقتى. مارەگە ەرتەڭ جەتەتىن «كوكشەتاۋ - تال بەسىگىم» اتتى بۇل ونەر مەرەكەسىنە قازاقستانمەن قاتار, رەسەي جانە يتاليا ەلدەرىنىڭ كوپتەگەن تانىمال شەبەرلەرى قاتىسىپ جاتىر. ● بۇگىن قىزىلوردا قالاسىندا اقتوبە وبلىسىنىڭ كۇندەرى باستالدى. ءساۋىردىڭ 23-27 كۇندەرى ارالىعىن قامتيتىن مادەني شارادا مەيماندار «الاقاي» قۋىرشاق تەاترىنىڭ مۋلتي-شوۋىن, سۋرەتشىلەردىڭ كورمەسىن, وبلىستىق فيلارمونيانىڭ گالا-كونتسەرتىن ۇسىنادى. دەلەگاتسيا وكىلدەرى سونىمەن قاتار, جالاعاش, قازالى جانە ارال اۋداندارىن ارالايدى. ● اتىراۋدا توزىعى جەتكەن پاتەرلەر ورنىنا جاڭاسى بەرىلەتىن بولدى. قالادا الداعى 7 جىل ىشىندە وتكەن عاسىردىڭ باسىندا سالىنعان 80 ءۇي سىرىلىپ, ولاردىڭ 2 مىڭعا جۋىق تۇرعىنى باسقا قونىستارعا كوشىرىلەدى. ● قوستاناي وبلىسىندا كوپقاباتتى ۇيلەردى جوندەۋگە 670 ملن. تەڭگەدەن استام قارجى قارالدى. بۇل تۋرالى ايتقان وبلىس اكىمىنىڭ ءبىرىنشى ورىنباسارى ەۆگەني امان العاش رەت تاران اۋدانى توبىل كەنتىنىڭ پاتەرلەرى جوندەلەتىنىن, وبلىس ورتالىعىنداعى 18 ءۇيدىڭ جۇمىستارىنا 323,5 ملن. تەڭگە جۇمسالاتىنىن جەتكىزدى. BNews.kz, Alau.kz, Altaynews.kz, Egemen.kz اقپارلارى, وبلىستىق اكىمدىكتەر سايتتارى بويىنشا دايىندالدى.