ازاتتىقتىڭ قادىرىن ەلىن سۇيگەن ەرلەر عانا تەرەڭ تۇسىنەدى. سوناۋ كونە زامانداردان بۇگىنگە جالعاسقان تىرشىلىگىمىزدە حالقىمىز وردا تۇتقان وردابازار, بالاساعۇن, سارايشىق, ساۋران, تۇركىستان سياقتى تالاي تاريحي قالالار بولدى. الايدا تاۋەلسىزدىكتىڭ تۋىن تىگە سالىسىمەن تۇڭعىش پرەزيدەنتىمىز نۇرسۇلتان ءابىش ۇلىنىڭ باستاۋىمەن الاتاۋدان ارقاعا كوشكەن استانانىڭ ءجونى بولەك. وتىز جىل ىشىندە ىرگەمىزدى بەكىتىپ, ەڭسەمىزدى تىكتەدىك. قازاقتى الەم تانىدى. راس, اۋمالى-توكپەلى, بيلىككە وكپەلى الاساپىران كۇندەر دە ءوتتى.
تاريح بىرىڭعاي جارقىن بەتتەردەن تۇرمايدى. باسىمىزدان وتكەن وتىز جىل وزگەنىڭ ەمەس ءوزىمىزدىڭ تاريحىمىز. ونى ءادىل باعالاي بىلگەنىمىز ءجون. «جاڭا قازاقستان» بۇگىننەن باستالعانىمەن, كەشەگى كۇننىڭ زاڭدى جالعاسى.
وسى تۇرعىدان العاندا بيىلعى جىر دوداسى دا تارتىستى ءوتتى. مۇشايراعا ۇمىتكەر 60 شىعارما ءتۇستى. اقىندارىمىز سوڭعى جىلدارى بولىپ جاتقان جاعدايلارعا قاراماستان, قيىن تاقىرىپتىڭ قيۋىن تاپقاندارى قۋانتتى.
مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى باستاعان قازاقستان جازۋشىلار وداعى باسقارماسى توراعاسىنىڭ ورىنباسارى باۋىرجان جاقىپ, «الاش» سىيلىعىنىڭ لاۋرەاتى عالىم جايلىباي, نۇر-سۇلتان قالاسىنداعى قازاقستان جازۋشىلار وداعىنىڭ فيليالىنىڭ ديرەكتورى, «دارىن» جاستار سىيلىعىنىڭ لاۋرەاتى, اقىن داۋلەتكەرەي كاپ ۇلى, «الاش» سىيلىعىنىڭ لاۋرەاتى, «تۇركىستان» گازەتىنىڭ باس رەداكتورى, اقىن باۋىرجان باباجان ۇلى سىندى قازىلار القاسىنىڭ قۇرامى بايگەگە تۇسكەن شىعارمالاردى سارالاي, ساراپتاي كەلە جۇلدەگەرلەردى انىقتادى:
باس جۇلدەنى – ەلوردالىق اقىن, «ماحامبەت», «تولەگەن ايبەرگەنوۆ» اتىنداعى سىيلىقتارىنىڭ لاۋرەاتى وڭايگۇل تۇرجان «ەلوردامەن سىرلاسۋ» اتتى ولەڭدەر توپتاماسىمەن قانجىعاسىنا بايلاندى.
ءبىرىنشى ورىندى – ەلوردالىق اقىن سەرىكزات دۇيسەنعازى «ەڭسەسى بيىك ەلوردا» اتتى تولعاۋىمەن ەنشىلەدى.
ەكىنشى ەكى ورىندى – ەلوردالىق اقىن جانات اسكەربەكقىزى «استانام» ولەڭدەر توپتاماسىمەن جانە پاۆلودارلىق جاس اقىن باقبەرگەن داريعا «كەنەسارىنىڭ مونولوگى» اتتى ولەڭىمەن يەلەندى.
ءۇشىنشى ورىن ءۇش ورىندى – الماتىلىق اقىندار اسەل وسپان «استانانىڭ ءاز جۇرتى», مۇراتقان شوقان «كوشەڭ تولىپ جاتسىن گۇلگە, كۇلكىگە» توپتاماسىمەن, ەلوردالىق اقىن اۋىت مۇقيبەك «ەلوردام مەنىڭ - باق وردام» ولەڭىمەن الدى.
بەس ىنتالاندىرۋ سىيلىعى – كوكشەتاۋلىق اقىن مۇحامەد قونقاەۆ جانە ەلوردالىق اقىندار شەرحان تالاپ, دۇيسەنالى الىماقىن, مۇقيات قويشىباي, كادىرحان قيزاتقا بۇيىردى.
جۇلدەگەرلەردى ماراپاتتاۋ وسى جىلى شىلدەنىڭ 1 كۇنى ساعات 15:00 دە نۇر-سۇلتان قالاسى, «جاستار» سارايىندا وتەدى.
