«نۇر وتان» پارتياسىنىڭ قولداۋىمەن استاناداعى «كەرۋەن» ساۋدا ءۇيىنىڭ كينوزالىندا «ورمەكشى-ادام: كەرنەگەن قۋات» ءفيلمىنىڭ الدىن الا كورسەتىلىمى ۇيىمداستىرىلدى.
مەملەكەتتىك ءتىلدى قولداۋ ماقساتىندا «بولاشاق» قاۋىمداستىعى ءتورت جىلدان بەرى رەيتينگىسى جوعارى, كوپشىلىكتىڭ سۇرانىسىنا يە تانىمال فيلمدەردىڭ قازاقشا دۋبلياجىن جاساۋمەن اينالىسىپ كەلەدى. بۇعان دەيىن پروكاتقا شىققان «كولىكتەر-2», «قارا كيىمدىلەر-3», «باتىل جۇرەك», «جاڭا ورمەكشى ادام», «مونسترلار ۋنيۆەرسيتەتى», «جالعىز رەيندجەر» فيلمدەرى سونىڭ ايعاعى.
بۇل جىلى گولليۆۋدتىق فيلمدەرگە دۋبلياج جاساۋ «جاستار – وتانعا» جوباسى اياسىندا ۇيىمداستىرىلدى. جوبانىڭ ماقساتى تەك فيلمدەردى قازاقشالاۋ ەمەس. ونىڭ شەڭبەرىندە «ايتىس», «ءبۇركىتشىلەر فەستيۆالى», «كوكپار», «قازاقشا كۇرەس» جوبالارى دا جۇزەگە اسقانىن ايتا كەتكەن ءجون.
ال ەندى فيلمگە ورالار بولساق, اعىمداعى جىلى «جاڭا ورمەكشى-ادام: كەرنەگەن قۋات» ءفيلمىنىڭ كەيىپكەرلەرى اعىلشىن, فرانتسۋز, يسپان, نەمىس, پورتۋگال جانە ورىس تىلدەرىنە قوسا, قازاق تىلىندە سويلەيتىنى ءوز الدىنا, اقش-تاعى نەگىزگى تۇساۋكەسەردەن 10 كۇن بۇرىن وتاندىق ەكراندارعا شىعىپ قويادى. بۇل تۋرالى «كەرۋەندە» ۇيىمداستىرىلعان الدىن الا كورسەتىلىمدە «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك مالىمدەدى. ونىڭ ايتۋىنشا, 50 جىلدان كەيىن ۇلكەن ەكرانعا 3D فورماتىندا قايتا ورالعان العاشقى «جاڭا ورمەكشى-ادام» ءفيلمىنىڭ الەمدىك كاسسالىق جينالىمى ءوز بيۋدجەتىنەن ءۇش ەسەگە اسىپ تۇسكەن. ياعني, فيلم 230 ميلليون دوللارعا تۇسىرىلگەن بولسا, جينالىمى 752 ميلليون دوللارعا جەتكەن. ال, قازىرگى «جاڭا ورمەكشى-ادام: كەرنەگەن قۋات» ءفيلمىن تۇسىرۋگە 200 ميلليون دوللار جۇمسالعان. ونىڭ ىشىندە ەڭ جوعارى حالىقارالىق ستاندارتتارعا سايكەس قازاقشا جاسالعان دۋبلياجدىڭ قۇنى 80 مىڭ اقش دوللارى بولعان. بۇل جەردە اتاپ وتەر ماڭىزدى جاعداي – «التىن قىران» قايىرىمدىلىق قورىنىڭ وسىمەن ءتورتىنشى جىل قاتارىنان فيلمدەردى قازاق ءتىلىنە اۋدارۋدا قارجىلىق كومەك كورسەتۋى. اسىرەسە, جاستار اراسىندا قازاق تىلىندەگى ورتا قالىپتاستىرۋ ماقساتىندا دۋبلياجدالعان جاڭا ءفيلمنىڭ دە قارجىلاي قولداۋشىسى وسى كومپانيا.
گولليۆۋدتىق فيلمدەردى مەملەكەتتىك تىلگە دۋبلياجداۋ جوباسى اياسىندا قازاق تىلىنە اۋدارىلعان «جاڭا ورمەكشى-ادام: كەرنەگەن قۋات» ءفيلمىنىڭ ساۋندترەكىن تانىمال رەپەر باستا جازعان. «سۋپەرگەروي» ساۋندترەگى ءفيلمنىڭ قازاق جانە ورىس تىلدەرىندەگى تيترلارىندا وينالاتىن بولادى. ءفيلمدى دۋبلياجداۋ جۇمىسى وتكەن جىلدىڭ قاراشا ايىندا باستالعان. باستى كەيىپكەرلەردى ورمەكشى-ادام تۋرالى العاشقى ءفيلمنىڭ دۋبلياجىن جاساعان مەرەي اجىبەكوۆ (ورمەكشى-ادام), ءاليما قايىربەكوۆا (گۆەن ستەيسي), تىنىشگۇل سۇلتانبەرديەۆا (تەتيا مەي) سومدايدى. سونداي-اق, فيلمدەگى باستى جاعىمسىز كەيىپكەر – ەلەكترونى سومداعان ازامات قاناپيا بۇدان بۇرىنعى جوبالارداعى داۋىسى ءۇشىن ۋولت ديسنەي تاراپىنان ۇزدىك دەپ تانىلعانىن دا ايتا كەتۋ كەرەك.
ايگۇل سەيىلوۆا,
«ەگەمەن قازاقستان».
