كەيىنگى جىلدارى بەلارۋس فۋتبولشىلارى قازاقستان قۇراماسىنىڭ حالىقارالىق تۋرنيرلەردەگى تۇراقتى ءارى ىڭعايسىز قارسىلاسىنا اينالدى. ويتكەنى ەكى ەلدىڭ فۋتبولشىلارى بۇگىنگە دەيىن جاسىل الاڭدا بەس مارتە كەزدەسىپ, ءتورت رەسمي ويىننىڭ بارىندە بەلارۋس قۇراماسى جەڭىسكە جەتكەن. تەك ءبىر عانا جولداستىق ماتچتا جەرلەستەرىمىز قارسىلاستارىمەن تەڭ وينادى.
قازاقستان مەن بەلارۋس قۇرامالارى ەڭ العاش 2010 جىلى وڭتۇستىك افريكا رەسپۋبليكاسىندا وتكەن الەم چەمپيوناتىنىڭ ىرىكتەۋ كەزەڭىندە ءبىر توپتا ونەر كورسەتسە, كەيىننەن ۇلتتار ليگاسىنىڭ ەكىنشى ماۋسىمىندا «س» توبىندا قارسىلاس اتاندى. ەندى, مىنە, بيىل ءدال وسى ۇلتتار ليگاسىنىڭ ءۇشىنشى ماۋسىمىندا دا «ەسكى تانىستاردىڭ» جولدارى قايتا ءتۇيىستى.
كوماندالار العاش رەت 2009 جىلدىڭ 1 ساۋىرىندە 2010 جىلعى الەم چەمپيوناتىنىڭ ىرىكتەۋ ماتچىندا جولىقتى. الماتىداعى ورتالىق ستاديوندا وتكەن كەزدەسۋدىڭ ەسەبىن 10-مينۋتتا رەنات ابدۋلين اشقانىمەن, ەكىنشى تايمدا الەكساندر گلەب باستاعان «اقورىستار» داۆيد لوريا قورعاعان قاقپاعا بەس گول سوعىپ, ءىرى ەسەپپەن جەڭىسكە جەتتى – 5:1. قارىمتا كەزدەسۋ سول جىلدىڭ 10 قازانىندا برەستتە ءوتىپ, الاڭ يەلەرى بۇل جولى دا ءىرى ەسەپپەن باسىم ءتۇستى – 4:0.
2011 جىلدىڭ اقپان ايىندا تۇركيانىڭ انتاليا قالاسىندا ەكى قۇراما فۋتبولشىلارى جولداستىق ماتچ وتكىزىپ, 1:1 ەسەبىمەن تەڭ وينادى. ءبىرىنشى تايمنىڭ 45-مينۋتىندا الەكساندر گلەب پەنالتيدەن گول سوقسا, ەكىنشى تايمنىڭ 90-مينۋتىندا سەرگەي وستاپەنكو تارازى باسىن تەڭەستىردى. وسى ويىندا قازاقستان ۇلتتىق قۇراماسىنىڭ تاريحىنداعى ەڭ ۇزدىك فۋتبولشىلاردىڭ ءبىر شوعىرى ونەر كورسەتتى. اتاپ ايتار بولساق, سامات سماقوۆ, داۆيد لوريا, اندرەي كارپوۆيچ, نۇربول جۇماسقاليەۆ, اندرەي فينونچەنكو, ازات نۇرعاليەۆ, سەرگەي سكورىح بەلارۋس قۇراماسىمەن ويىندا الاڭعا شىقتى. سونداي-اق بۇل چەحيالىق جاتتىقتىرۋشى ميروسلاۆ بەرانەكتىڭ ۇلتتىق قۇراماداعى العاشقى ماتچى بولاتىن.
ارادا توعىز جىل وتكەندە قازاقستان قۇراماسى (2020 جىلى) بەلارۋس فۋتبولشىلارىمەن ۇلتتار ليگاسى اياسىندا ەكى كەزدەسۋ وتكىزىپ, ەكەۋىندە دە جەڭىلىپ قالدى. قىركۇيەكتە الماتىداعى ورتالىق ستاديونداعى العاشقى ماتچتىڭ ەكىنشى تايمىندا قوناقتار ساپىنان ماكسيم بورداچەۆ ەسەپ اشسا, اراعا ساناۋلى مينۋتتار سالىپ ابات ايىمبەتوۆ تارازى باسىن تەڭەستىرگەن ەدى. الايدا كەزدەسۋدىڭ اياقتالۋىنا بىرەر مينۋت قالعاندا عافۋرجان سۇيىمباەۆتىڭ ورەسكەل قاتەلىگىنەن كەيىن بەلارۋس قۇراماسىنىڭ شابۋىلشىسى ۆيتالي ليساكوۆيچ گول سوعىپ, جەڭىستى ج ۇلىپ العان بولاتىن – 2:1.
اراعا ءبىر اي سالىپ مينسكىدە وتكىزىلگەن جاۋاپتى كەزدەسۋدە دە الاڭ يەلەرى باسىم ءتۇستى – 2:0. بارلىق ستاتيستيكالىق كورسەتكىش بويىنشا ميحال بيلەك شاكىرتتەرى الدا بولسا دا, سىرت الاڭدا جەڭىسكە جەتە المادى. ونىڭ ۇستىنە, دەنساۋلىقتارىنا بايلانىستى بەلارۋسكە ۇلتتىق قۇرامانىڭ نەگىزگى ويىنشىلارى الەكساندر ماروچكين, يۋري پەرتسۋح, نۇرالى ءالىپ, يان ۆوروگوۆسكي بارعان جوق.
ەندى بۇگىن ەكى قۇراما ۇلتتار ليگاسى اياسىندا تاعى ءبىر كەزدەسۋ وتكىزبەك. العاشقى ەكى تۋردا ازەربايجان مەن سلوۆاكيا قۇرامالارىن قاپى قالدىرعان قازاقستاندىق فۋتبولشىلاردان جانكۇيەرلەر جەڭىس كۇتەتىنى انىق. بالكىم, ۇلتتىق قۇرامانىڭ بەلارۋسپەن بولعان جەڭىسسىز سەرياسىنا موگامەد اديەۆ نۇكتە قويار. فۋتبولشىلار دا بۇعان دەيىن كەتكەن ەسەنى وسى جولى قايتارۋ ءۇشىن بارىن سالۋى كەرەك. ايتەۋىر, جانكۇيەرلەر ءۇشىنشى جەڭىستەن دە ءۇمىتتى.
بەلارۋس فۋتبولشىلارى ءۇشىن ۇلتتار ليگاسىنىڭ بيىلعى ماۋسىمى اسا ءساتتى باستالا قويعان جوق. العاشقى تۋردا سلوۆاكيادان 1:0 ەسەبىمەن جەڭىلسە, ەكىنشى تۋردا ازەربايجان قۇراماسىنىڭ قاقپاسىنا گول سالا العان جوق – 0:0. بەلارۋس قۇراماسىنىڭ تىزگىنىن ەكىنشى رەت (2011 – 2014 جىلدارى جانە 2021 جىلدان بۇگىنگە دەيىن – رەد.) ۇستاعان گەورگي كوندراتەۆ ماۋسىم ايىنداعى ويىندارعا قازاقستاندىق جانكۇيەرلەرگە جاقسى تانىس «استانا» كلۋبىنىڭ جارتىلاي قورعاۋشىسى ماكس ەبونگ پەن «ماقتاارال» كومانداسىنىڭ قورعاۋشىسى رۋسلان يۋدەنكوۆتى شاقىرعان.
