جاستار اراسىنداعى جۇمىسسىزدىق قوعامداعى قانى شىعىپ تۇرعان ماسەلەنىڭ ءبىرى. جۇمىس تاجىريبەسى از نەمەسە مۇلدە بولماعاندىقتان تالابى جوعارى, تالعامى كۇشتى ەڭبەك نارىعىندا ءوز ورنىن تاۋىپ, بولاشاعىن باعامداۋ دا وڭاي شارۋا ەمەس. جۇمىسسىزدىقتىڭ پايدا بولۋ سەبەپتەرىن ءسال عانا تالداپ كورەلىكشى. ەڭ الدىمەن, جوعارى وقۋ ورىندارى مەن كاسىپتىك ءبىلىم بەرۋ سالاسى نارىقتىڭ قاتال زاڭىنا تولىق جاۋاپ بەرەتىن كاسىبي ماماندار دايارلاۋ جۇمىسىن شيراتۋ كەرەك. كاسىپتىك ءبىلىم سالاسىندا قاجەتتى ينفراقۇرىلىمنىڭ جۇتاڭدىعى دا جانعا باتادى. مىنە, وسىدان بارىپ جاستار اراسىنداعى جۇمىسسىزدىق وسۋدە. اۋىلدان كەلگەن جاستار كاسىبي ءبىلىمى بولماعاندىقتان, قارا جۇمىسقا عانا جارايدى. شارۋاعا شيراپ, شىنىقپاعان جاستار اتان تۇيەگە جۇك بولاتىن اۋىر جۇمىسقا شىداي الماي, بەتتەرى قايتىپ جاتاتىن جاي دا از ەمەس. وسىنىڭ بارلىعى تۇتاستاي العاندا تۇيتكىلدى ماسەلەنىڭ ءتۇيىنىن جۋانداتا تۇسۋدە. دەمەك الدىمەن, كاسىبي ءبىلىم بەرۋ دەڭگەيىن كوتەرۋىمىز كەرەك. ەڭبەككە تاربيەلەۋ, جۇمىس ىستەتىپ داعدىلاندىرۋ جايى دا كوكەيدە جۇرگەنى ءلازىم.
بوس جۇمىس ورىندارى جارمەڭكەسىن ۇيىمداستىرۋداعى باستى ماقسات – جاستاردى تۇراقتى جانە ۋاقىتشا جۇمىسپەن قامتاماسىز ەتۋ. قامتاماسىز ەتىلسە, ولاردىڭ الەۋمەتتىك-تۇرمىستىق ماسەلەسى دە بىرتىندەپ شەشىلىپ قالماق. ءبىزدىڭ كوزقاراسىمىزدا جاستاردىڭ وزدەرى دە بەلسەندى بولۋى كەرەك سياقتى. وسىنداي جارمەڭكەلەردىڭ وتەتىندىگى تۋرالى كۇنى بۇرىن قۇلاقتاندىرىلعانىمەن, ىنتالى جاستاردىڭ قاتارى سيرەك. ماسەلەن, بۇل جولعى جارمەڭكەدە وتىزدان استام جۇمىس بەرۋشى 200-گە جۋىق بوس جۇمىس ورنىن ۇسىندى. ەلۋگە جۋىق ادام اۋىزشا سىناقتان ءساتتى ءوتىپ, جۇمىسقا ورنالاسۋ مۇمكىندىگىنە يە بولدى.
ءبىر كۇندە ءبىرجولا شەشىلە قالاتىن ماسەلە ەمەس. جاستاردىڭ وزدەرى دە جۇمىس ىستەيمىن دەپ ۇمتىلۋ قاجەت. ول ءۇشىن بەلگىلى ءبىر كاسىپتى تۇبەگەيلى يگەرىپ ءارى سول ماماندىقتىڭ مايتالمانى بولسا عانا جۇلدىزى جانباق.
كوكشەتاۋ
