وسىناۋ قۋانىشتى ءساتتى سەمەيلىكتەر ۇزاق كۇتتى. ايتپەسە, تاريح تامىرى تەرەڭدە جاتقان كونە شاھار توزىپ بارا جاتقان ەدى. الەۋمەتتىك ءال-اۋقاتى دا كوڭىل قۋانتا قويمايتىن. ول تۋرالى پرەزيدەنت بيىلعى جولداۋىندا دا اشىق ايتقان بولاتىن. بەرتىندە, اباي وبلىسى قۇرىلاتىندىعى بەلگىلى بولعاندا, سەمەيدىڭ ءال-اۋقاتى وڭالىپ كەتەرىنە كۇمانمەن قاراعان ازاماتتار دا بولدى. سەبەبى, جاڭا قۇرىلاتىن وبلىستا ءوندىرىس وشاقتارى جوق دەگەندى العا تارتتى. الايدا, اباي وبلىسى ءتورت ت ۇلىككە وتە قولايلى. 1997-جىلدارعا دەيىن سەمەيدە ەت كومبيناتى, تەرى-بىلعارى كومبيناتى, توقىما فابريكاسى سەكىلدى الپاۋىت كاسىپورىندار بولعانى بەلگىلى. مۇنىڭ ءبارىن كاسىپكەر ازاماتتار قايتا قالپىنا كەلتىرۋى بەك مۇمكىن.
ەكىنشىدەن, بۇگىنگى اباي وبلىسى – ەتنو-ءتۋريزمدى, تاريحي-مادەني ءتۋريزمدى دوڭگەلەتۋگە تاپتىرماس ءوڭىر. اتاپ ايتساق, اباي اۋدانىندا عانا اباي-شاكارىم كەسەنەسى, ابايدىڭ قىستاۋى, اقشوقىداعى قۇنانباي اۋلەتىنىڭ قورىمى, قوڭىر اۋليە, بەرىدە مۇحتار اۋەزوۆتىڭ تۋعان اۋىلى – ءبورىلى, تاعىسىن تاعى... تاريحي مەكەندەر اباي وبلىسىنا قاراستى كوكپەكتى اۋدانىندا قانشاما؟! قازاق جەرىندەگى العاشقى دالا كىتاپحاناسى دا كوكپەكتىنىڭ جەرىنەن تابىلعان. وسىناۋ وڭىرلەرگە تۋريستىك مارشرۋت جاساپ قويسا, وبلىسقا قارجى قۇيىلماي ما؟ ايتقانداي, سەمەي قالاسىنىڭ ءوزى ۇلكەن ءبىر تۋريستىك جوباعا سۇرانىپ-اق تۇر. ءدال سەمەيدەي كونە قالا قازاقستان بويىنشا, ەكەۋ-اق. ءبىرى – ورال, ەندى ءبىر وسى – سەمەي.
– بۇگىن, مىنە, وبلىسارالىق شەكارامىز رەسمي تۇردە سىزىلىپ, اباي وبلىسى بولىپ جاتىرمىز. ءبىر-بىرىمىزگە قۇتتى بولسىن ايتىسىپ, ءماز-ءمايرامبىز. راس, قازاق تاريحىندا 2022 جىلدىڭ 8 ماۋسىمى – تاريحي كۇن. ەندىگى ءبىزدىڭ مىندەت – جاڭا وبلىستىڭ تاسىن ورگە سۇيرەۋ. ءوزىمىز تىزە قوسىپ, ءىس قىلماساق, سىرتتان كەلىپ ەشكىم كوسەگەمىزدى كوگەرتپەيدى. ايماعىمىزدىڭ ەكونوميكالىق احۋالىن ارتتىرۋ ءۇشىن الدىمەن مال شارۋاشىلىعىن, ساۋدا-ساتتىقتى, تۋريزم سالاسىن مىقتاپ قولعا الۋىمىز كەرەك, – دەيدى سەمەيلىك كاسىپكەر ەرلان جاقىپوۆ.
باسا ايتا كەتەرلىگى, بۇگىنگى تاريحي داتادا اباي وبلىسى ءماسليحاتىنىڭ العاشقى سەسسيا وتىرىسى ءوتىپ, وبلىس ءماسليحاتىنىڭ شەشىمىمەن ءماسليحات حاتشىسى قىزمەتىنە قۋانىش سۇلەيمەنوۆ سايلاندى.
– اباي وبلىسىنا, حالىقتىڭ جاعدايىن تۇزەتۋگە بار كۇش-جىگەرىمدى سالامىن. بارلىقتارىڭىزدى اباي وبلىسىنىڭ قۇرىلۋىمەن قۇتتىقتايمىن, – دەدى قۋانىش سەرىكقازى ۇلى.
ق.سۇلەيمەنوۆ 1973 جىلدىڭ 14 قىركۇيەگىندە بۇرىنعى سەمەي وبلىسىنىڭ شار قالاسىندا دۇنيەگە كەلگەن. سەمەي مەملەكەتتىك ۋنيۆەرسيتەتىنىڭ تاريح فاكۋلتەتىن تامامداعان. كەيىن وقۋىن سەمەي قالاسىنداعى شاكارىم اتىنداعى مەملەكەتتىك ۋنيۆەرسيتەتتە «مال شارۋاشىلىعى ونىمدەرىن ءوندىرۋ تەحنولوگياسى» ماماندىعى بويىنشا جالعاستىرىپ, اۋىلشارۋاشىلىق عىلىمدارىنىڭ ماگيسترى اتانادى. ول وسى ۋاقىتقا دەيىن «شالاباي» جشس باس ديرەكتورى قىزمەتىن اتقارعان.
سونىمەن قاتار العاشقى سەسسيادا اباي وبلىسى ءماسليحاتىنىڭ تۇراقتى كوميسسيالارىن قۇرۋ, كوميسسيا مۇشەلەرىن سايلاۋ تۋرالى ماسەلەلەر قارالدى. ءبىراۋىزدان كوميسسيا توراعالارى دا سايلاندى.
اباي وبلىسى
