ءماجىلىس وتىرىسىندا «قر كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمعا شىعارىلدى. زاڭناما جانە سوت-قۇقىقتىق رەفورما كوميتەتىنىڭ مۇشەسى گۇلنار بيجانوۆا مەملەكەت باسشىسىنىڭ 11 قاڭتاردا ماجىلىستە بەرگەن ناقتى تاپسىرمالارىن ىسكە اسىرۋ جونىندە ايتىپ بەردى.
«قاڭتارداعى وقيعالار ازاماتتاردىڭ, ونىڭ ىشىندە قىزمەتكەرلەردىڭ ءوزىنىڭ جانە جاقىن تۋىستارىنىڭ قۇقىقتارى مەن بوستاندىقتارىن قورعاۋعا باسىمدىق بەرىپ, قۇقىق قورعاۋ جۇيەسىن رەفورمالاۋ بويىنشا شارا قابىلداۋ قاجەتتىگىن كورسەتتى. وسىعان وراي, دەپۋتاتتار قۇقىق قورعاۋ بلوگىمەن بىرلەسىپ, كۇشتىك بلوك قىزمەتكەرلەرىنىڭ قۇقىقتىق قورعالۋىن, ولاردىڭ باسشىلارىنىڭ جاۋاپكەرشىلىك دەڭگەيىن, الەۋمەتتىك قامتاماسىز ەتۋدى كۇشەيتۋ, ىنتالاندىرۋ جانە ولار ءۇشىن ۋاجدەمەنى ارتتىرۋ بويىنشا تۇزەتۋلەر ازىرلەدى», دەدى گ. بيجانوۆا ءماجىلىستىڭ جالپى وتىرىسىندا.
دەپۋتاتتىڭ ايتۋىنشا, بۇل تۇزەتۋلەردى شارتتى تۇردە ءۇش توپقا بولۋگە بولادى. ءبىرىنشى بلوك – قىزمەتكەرلەردىڭ قۇقىقتىق قورعالۋىنا قاتىستى بولماق.
«اتاپ ايتقاندا, قىلمىستىق كودەكسكە ەنگىزىلەتىن تۇزەتۋلەر ارقىلى بيلىك وكىلىنە باعىنباعانى, وعان قاتىستى كۇش قولدانعانى, توتەنشە جاعداي كەزىندەگى جاپپاي تارتىپسىزدىكتەر كەزىندە جانە تەرروريزمگە قارسى وپەراتسيا جۇرگىزۋ ايماعىندا قىزمەتكەردىڭ ومىرىنە قولسۇعۋشىلىق ءۇشىن جاۋاپتىلىق كۇشەيتىلەدى. جوعارىدا اتالعان جاعدايلاردا قورقىتۋ مەن كۇش قولدانۋ ءۇشىن دە جاۋاپتىلىق ارتادى», دەپ ءتۇسىندىردى دەپۋتات.
ەكىنشى بلوك كۇشتىك قۇرىلىمداردىڭ شەشىم قابىلداۋداعى دەربەستىگىن كۇشەيتۋ جانە ولاردىڭ باسشىلارىنىڭ جاۋاپكەرشىلىگىن ارتتىرۋ ماسەلەلەرىن شەشەدى.
ء«بىز بىرقاتار زاڭعا, اتاپ ايتقاندا قىلمىستىق جانە قىلمىستىق-پروتسەستىك كودەكستەرگە, «توتەنشە جاعداي تۋرالى», «اسكەري جاعداي تۋرالى», «ۇلتتىق ۇلان تۋرالى» جانە باسقا دا زاڭدارعا وزگەرىستەر ەنگىزۋدى ۇسىنامىز. جاڭا قۇرامدار ءۇشىن قىلمىستىق جاۋاپكەرشىلىك ەنگىزىلەدى. مىسالى, «جاۋاپتى مەملەكەتتىك لاۋازىمدى اتقاراتىن ادامنىڭ نەمەسە قۇقىق قورعاۋ ورگانىنىڭ نەمەسە ارناۋلى مەملەكەتتىك ورگاننىڭ وزگە دە باسشىسىنىڭ قىزمەت بويىنشا ارەكەتسىزدىگى». سانكتسيانىڭ جوعارعى شەگى – 7 جىلعا باس بوستاندىعىنان ايىرۋ. كەلەسى – «قۇقىق قورعاۋ ورگانى نەمەسە ارناۋلى مەملەكەتتىك ورگان قىزمەتكەرىنىڭ قىزمەتتىك مىندەتتەرىن ورىنداۋدان باس تارتۋى نەمەسە جالتارۋى» دەپ اتالادى. سانكتسيانىڭ جوعارعى شەگى – 10 جىلعا باس بوستاندىعىنان ايىرۋ», دەدى گ. بيجانوۆا.
سونداي-اق دەپۋتات 452-1-باپ – «باستىقتىڭ قىزمەتىندەگى ارەكەتسىزدىك» بابى تۋرالى ايتىپ بەردى.
«بۇل باپ بويىنشا قىلمىستىق جاۋاپتىلىق توتەنشە جاعداي كەزىندە بەيبىت حالىقتىڭ ءومىرى مەن دەنساۋلىعىنا تىكەلەي قاۋىپ تونگەن كەزدە, عيماراتتاردى باسىپ الۋ, م ۇلىكتى جويۋ, توناۋ ورىن العان كەزدە, ال جەرگىلىكتى باستىقتار ارەكەت ەتپەي وتىرعان كەزدە قاراستىرىلادى. مۇنىڭ ءبارىن ءبىز قاڭتار ايىندا بايقادىق. قوعامنىڭ كوڭىلى تولماعانى سول – كەيبىر جاۋاپتى باسشىلار ارەكەت ەتپەي وتىرسا, بىرەۋى جاسىرىنىپ قالدى نەمەسە بىرەۋى ءتىپتى قاشىپ كەتتى. اسىرەسە, لاڭكەستىككە ۇلاسقان جاپپاي تارتىپسىزدىكتەر كەزىندە بۇل جاۋاپسىزدىق جانە قىلمىس», دەدى گۇلنار بيجانوۆا.
