اتالعان جارىستا وزدەرىنىڭ وجەتتىگى جانە تاباندىلىعىمەن كوزگە تۇسكەن ەكى جاس ورەندى ەرەكشە اتاپ وتكىمىز كەلەدى. ءبىرىنشىسى – 70 كيلو سالماقتا سايىسقا تۇسكەن روديون انچۋگين. 20 جاستاعى بالۋان الماتى تورىندە كەرەمەت ونەر كورسەتتى. ەڭ باستىسى, ول قورقۋ مەن قايمىعۋدى بىلمەدى. الدىندا ازۋلى قارسىلاس تۇرسا دا ايانباي ايقاستى. وسى تۋرنيردە وزبەكستاندىق زافاربەك وتاحانوۆ پەن ۇندىستاندىق ۆيحال كاليرامانا سىندى كوكجالداردى جەڭگەن ول فينالدا ەرنازار احماتاليەۆپەن كۇش سىناستى. قىرعىز بالۋانى بىلتىر وسلودا الەم جانە بيىل ۇلانباتىردا ازيا چەمپيوناتىنىڭ كۇمىس جۇلدەگەرى اتانعان. تورەشى بەلگى بەرگەن بەتتە وتانداسىمىز احماتاليەۆتى باس سالىپ, ابدەن سىلىكپەسىن شىعاردى. باسەكەلەسى وندايدى كۇتپەسە كەرەك, العاشىندا ءبىراز اڭتارىلىپ قالدى. ال انچۋگين التى ۇپاي السا دا, اتويلاپ ۇتامىن دەپ العا ۇمتىلدى. بىراق تاجىريبەنىڭ اتى تاجىريبە عوي. ءبىر مەزەتتە ول ەرنازاردىڭ وڭتايلى ادىسىنە ءتۇسىپ قالدى. دەسەك تە روديونعا وكپە ايتقان ەشكىم بولمادى. نەگىزى بۇل سالماقتا باستى ءۇمىت ءبىراز جىلدان بەرى ۇلتتىق كوماندامىزدىڭ ساپىندا جۇرگەن مەيىرجان ءاشىروۆ پەن اماندىق باكەەۆكە ارتىلعان ەدى. بىراق ولار «ۇزاققا شاپپادى».
ءدال سونداي وجەتتىكتى 57 كيلو سالماقتاعى مەرەي بازارباەۆتىڭ دا بويىنان بايقادىق. 19 جاسار قانداسىمىز كوپتى كورگەن كوكجالداردىڭ بارلىعىمەن ابدەن تىرەستى. ءتىپتى تالاي دۇرمەكتە ىسىلعان دۇلدۇلدەردىڭ وزدەرى قازاقتىڭ ۇلىنىڭ قايسارلىعىنا تامساندى. كورەرمەندەر دە ءدان ريزا بولدى. وسى تۋرنيردە بازارباەۆقا قولا مەدال بۇيىردى. بۇل – مەرەيدىڭ سپورتتىق مانسابىنداعى ازىرگە ەڭ ءىرى جەڭىس. جارىس اياقتالعان بەتتە قىراعى مامانداردىڭ وزدەرى «وسى باعىتىنان جاڭىلماسا, مىنا جىگىتتىڭ بولاشاعى جارقىن بولادى» دەسىپ جاتتى.
قازاقستان قۇراماسى بولات تۇرلىحانوۆتىڭ ءتۋرنيرىن 1 التىن, 5 كۇمىس جانە 6 قولامەن قورىتىندىلادى. ءبىر قۋانىشتىسى, التى بىردەي جەرلەسىمىز فينالعا شىقتى. ال سولاردىڭ بەسەۋىنىڭ سىن ساعاتتا سۇرىنگەنىن كورگەندە ءىشىمىز ۋداي اشىدى. راديون انچۋگيننىڭ فينالدا جەڭىلگەنىن جوعارىدا ايتتىق. سول سەكىلدى 92 كيلو سالماقتاعى ادىلەت داۋلىنباەۆ تا تىم ازۋلى قارسىلاسقا تاپ بولدى. وسىعان دەيىنگى باسەكەلەرىنىڭ بارلىعىن 10:0 ەسەبىمەن ۇتقان الەم جانە ازيانىڭ ەكى دۇركىن چەمپيونى كامران گاسەمپۋر قانداسىمىزدىڭ دا تاس-تالقانىن شىعاردى. يراننىڭ مىقتىسى ادىلەتكە ادىم اشتىرمادى. داۋلىنباەۆقا قاراعاندا اسا اۋىر سالماقتاعى يۋسۋپ باتىرمۋرزاەۆ جاقسى كۇرەستى. ونىڭ فينالداعى قارسىلاسى – توكيو وليمپياداسىنىڭ قولا جۇلدەگەرى, بىلتىرعى الەم چەمپيونى يراندىق امير حوسسەين ابباس زارە ەدى. بەلدەسۋ باستالعان بەتتە ەكى الىپ الىسا كەتتى. يۋسۋپ ونى كىلەمگە جىعىپ الىپ, ءارى دە, بەرى دە اينالدىردى. جەرلەسىمىزدىڭ قورجىنىنا بىردەن سەگىز ۇپاي ءتۇستى. تاعى ەكى ۇپاي السا, ايقىن جەڭىسكە قول جەتكىزەدى. بىراق مىقتىنىڭ اتى مىقتى عوي. ودان كەيىن زارە كەتكەن ەسەسىن تولىعىمەن قايتاردى. باتىرمۋرزاەۆ شارشاپ قالدى. قورىتىندىسىندا يراندىق 21:10 ەسەبىمەن باسىم ءتۇستى.
فينالدا 57 كيلو سالماقتا سىنعا تۇسكەن تاجىريبەلى مەيرامبەك قارتباي ۇندىستاندىق امان اماندى ۇتاتىن شىعار دەپ ۇمىتتەندىك. ويتكەنى ونىڭ قارسىلاسىنان بەس جاس ۇلكەندىگى بار. ياعني ءۇندى سپورتشىسىنا قاراعاندا تاجىريبەسى مول. بىراق 17 جاسار امان ناعىز «سەن تۇر, مەن اتايىننىڭ» ءدال ءوزى ەكەن. بەلدەسۋ بارىسىندا مەيرمابەكتەن ۇتىلىپ جاتقان ول اياعىنا دەيىن كۇرەسىپ, اقىرى كوزدەگەن ماقساتىنا قول جەتكىزدى. ال 61 كيلو سالماقتاعى جاسۇلان تاسقۇلدىڭ 23 جاستاعىلار اراسىنداعى الەم بىرىنشىلىگىنىڭ كۇمىس جۇلدەگەرى دەگەن اتاعى بار قىرعىزستاندىق بەكبولوت مىرزانازار ۇلىنا ءالى جەتپەدى.
قازاقستاننىڭ بالۋاندارى اراسىنان جالعىز التىن بولات ساقاەۆقا بۇيىردى. 79 كيلو سالماقتا كۇرەسكەن ول شيرەك فينالدا ءوزىنىڭ كوماندالىق ارىپتەسى جىگەر زاكىروۆتى جەڭسە, جارتىلاي فينالدا ەۋروپا چەمپيونى, سلوۆاكيالىق احساربەك گۋلاەۆتان باسىم ءتۇستى. فينالدا ساقاەۆ ازيا بىرىنشىلىگىنىڭ بىرنەشە دۇركىن جۇلدەگەرى قىرعىزستاندىق ساياقباي يۋسۋپوۆتى سان سوقتىرىپ, باس جۇلدەنى قانجىعاسىنا بايلادى. وسىلايشا, بولاتتىڭ ارقاسىندا بالۋان شولاق اتىنداعى سپورت سارايىنا جينالعان ءدۇيىم جۇرت قازاق ەلىنىڭ ءانۇرانىن ەستىدى. ال مەرەي بازارباەۆ (57 كيلو), ەلدوس مومبەكوۆ (61 كيلو), نۇرقوجا قايپانوۆ (74 كيلو), داۋلەت ەرگەش (74 كيلو), ءابدىماناپ بايگەنجيەۆ (92 كيلو) جانە اكەجان ايتبەكوۆ (97 كيلو) قولا مەدالدى مويىندارىنا ءىلدى.
جالپىكوماندالىق ەسەپتە كىلەڭ جۇلدىزداردان جاساقتالعان يراننىڭ ەركىن كۇرەس شەبەرلەرى الدىنا جان سالمادى. پارسى ەلىنىڭ پەحلەۆاندارى 3 التىن مەن 1 كۇمىستى ولجالادى. گرەك-ريم كۇرەسىنەن وتكەن جارىستا دا ءدال سولار وزا شاپقان ەدى. سلوۆاكيا مەن قىرعىزستان بالۋاندارىنىڭ ناتيجەلەرى بىردەي. ەكى كوماندا دا 2 التىن, 1 كۇمىس جانە 1 قولادان ولجالادى. ءبىر ايتا كەتەرلىگى, سلوۆاكيانىڭ نامىسىن قورعاعان جىگىتتەردىڭ بارلىعى دا وسەتيندەر. سونداي-اق موڭعوليا (1+1+1), ءۇندىستان (1+0+2), وزبەكستان (0+1+4) جانە تۇركيا مەن مىسىر (0+0+1) ورەندەرىنە دە جەڭىس تۇعىرىنا كوتەرىلۋ باقىتى بۇيىردى.
ەركىن كۇرەستەن وتكەن جارىستىڭ جەڭىمپازدارى: 57 كيلو – امان امان ء(ۇندىستان), 61 كيلو – بەكبولوت مىرزانازار ۇلى (قىرعىزستان), 65 كيلو – تۋلگا تۋمىر وچير (موڭعوليا), 70 كيلو – ەرنازار احماتاليەۆ (قىرعىزستان), 74 كيلو – تايمۋراز سالكازانوۆ (سلوۆاكيا), 79 كيلو – بولات ساقاەۆ (قازاقستان), 86 كيلو – حاسسان يازداني (يران), 82 كيلو – كامران حاسسانپۋر, 97 كيلو – باتىربەك تساكۋلوۆ (سلوۆاكيا) جانە 130 كيلو – امير حوسسەين ابباس زارە (يران).
