بالالار مەرەكەسىنە كەلگەن وبلىس اكىمى نۇرلىبەك نالىباەۆ وقۋشىلار ازىرلەگەن قولونەر بۇيىمدارىنىڭ كورمەسىن ارالادى. وقۋشىلار ۇيىنەن اشىلعان ارنايى ستۋديادا جۋرناليستيكا الىپپەسىن ۇيرەنىپ جۇرگەن بالالارعا سۇحبات بەردى.
وسىدان كەيىن بارشا بالالاردى مەرەكەمەن قۇتتىقتاپ, تىلەگىن ارنادى.
– ءبىز ەرتەڭ ەل تۇتقاسىن ۇستايتىن بىلىكتى, ءبىلىمدى ۇرپاق قالىپتاستىرۋدا بارلىق مۇمكىندىكتەرگە جول اشامىز. بيىل الەۋمەتتىك قولداۋدى قاجەت ەتەتىن 500 بالاعا سپورت كەشەندەرىنە تەگىن ابونەمەنت بەرىلدى. جازعى كانيكۋلدا 1 مەن 10 سىنىپ ارالىعىنداعى وقۋشىلاردىڭ 97 پايىزى ءارتۇرلى ساۋىقتىرۋ, جۇمىسپەن قامتۋ, ۇيىرمە, ەكسكۋرسيامەن قامتىلاتىن بولادى. بالالار جىلى اياسىندا دەمەۋشىلەر ەسەبىنەن قالادا 50-گە تارتا, اۋدانداردا 30-دان استام سپورت-ويىن الاڭدارى پايدالانۋعا بەرىلەدى. جوسپارعا سايكەس 400-دەن اسا ءىرى كولەمدى ءىس-شارا ۇيىمداستىرىلىپ, وعان 165 مىڭنان استام بالا قاتىسادى, – دەدى وبلىس اكىمى.
مەرەكەدە ايماق باسشىسى حالىقارالىق, رەسپۋبليكالىق ءبىلىم دودالارىندا جەڭىمپاز اتانعان 10 بالاعا نوۋتبۋك سىيلاپ, اتا-انا قامقورلىعىنسىز قالعان 100 بالاعا ۆەلوسيپەد تابىستادى. وسى كۇنى ءار اۋداندا 50 بالا ۆەلوسيپەدتى بولدى. ءتۇرلى الەۋمەتتىك ساناتتاعى وتباسىلاردان شىققان, وقۋدا ۇزدىك اتانعان 20 وقۋشى كوكشەتاۋ قالاسىنداعى لاگەرگە جولداما الدى.
بالالار دۋمانى ەسترادا جۇلدىزدارى قاتىسقان كونتسەرتتىك باعدارلاماعا ۇلاستى. وسىلايشا, حالىقارالىق مەرەكە قىزىلوردالىق بالعىندار قۋانعان كۇن بولدى.
قىزىلوردا
