شيرەك عاسىر تاجىريبەسى بار جوعارى شەندى اسكەري قىزمەتشى 1 ماۋسىم مەرەكەسى قارساڭىندا بالالارىنىڭ ارمانى تۋرالى قازاقستان اسكەري-تەڭىز بازاسىنىڭ قولباسشىلىعىنا ايتادى. تەڭىزشىلەر «بولاشاق ارىپتەستەرىمەن» كەزدەسۋدى ارنايى بالالاردى قورعاۋ كۇنىنە ۇيىمداستىرىپ, بۇلدىرشىندەردى تاريحي اسكەري-تەڭىز مۇراجايىنا قوناققا شاقىردى.
– جانارىس پەن بەكارىس اشىرباەۆتار تەڭىز جاياۋ اسكەرىندە قىزمەت ەتكىسى كەلەدى. مەرەكەگە وراي ولار اتا-اناسىنان كولىك نەمەسە ۆەلوسيپەد ەمەس, تەڭىز فورماسىن سۇرادى. بالالار ويىنشىق كەمەلەرمەن ويناپ, تەڭىز تۋرالى مۋلتفيلمدەر كورەدى ەكەن. ولاردىڭ اكەسى پودپولكوۆنيك سەرىك اليەۆ ارىپتەستەرىمەن بالالارىنىڭ ەرەكشە وتىنىشىمەن بولىسكەن. ال ارىپتەستەرى ءوز كەزەگىندە, بالالاردىڭ وسى قىزمەتكە قۇشتارلىعىن كورىپ, تاريحي اسكەري-تەڭىز مۇراجايىنا بارۋعا شاقىردى, – دەيدى اقتاۋ گارنيزونى ءباسپاسوز قىزمەتىنىڭ جەتەكشىسى نۇربول شالاباەۆ.
بالالار مۇراجايعا اناسى ارنايى تىگىپ بەرگەن اسكەري فورمادا بارعان. ولارعا ەكسكۋرسيادا مۇراجايدىڭ, اسكەري-تەڭىز كۇشتەرىنىڭ تاريحى تۋرالى اقپارات بەرىلدى.
– ەگەر بالالار مەكتەپتە جاقسى وقيتىن بولسا, وندا ءبىز ولار ءۇشىن ەڭ باستى توسىن سىي – ناعىز اسكەري كەمەگە اپارۋعا دايىنبىز, – دەدى اسكەري ءبولىم كومانديرى دانيار حايرۋشەۆ.
ەگىز ۇلدارعا قاراپ قازاقستاننىڭ بولاشاق مىقتى, وتانسۇيگىش, ەلجاندى, قىزمەتشىلەرى ءوسىپ كەلەدى دەۋگە تولىق نەگىز بار.
ماڭعىستاۋ وبلىسى
