«ۇلتتىق قاۋىپسىزدىك كوميتەتىنىڭ شۇعىل-تەرگەۋ توبى ك.ك.ءماسىموۆ, ا.ت.سادىقۇلوۆ, د.ە.ەرعوجين جانە وزگە دە تۇلعالارعا قاتىستى قر قىلمىستىق كودەكسىنىڭ 175-بابى 1-بولىگى, 179-بابى 3-بولىگى, 218-بابى 3-بولىگىنىڭ 3-تارماعى, 362-بابى 4-بولىگىنىڭ 3-تارماعى, 366-بابى 4-بولىگى بويىنشا قىلمىستىق ءىستى تەرگەۋدى جالعاستىرىپ جاتىر.
2022 جىلدىڭ 31 مامىرىندا ءماسىموۆ پەن سادىقۇلوۆتى قاماۋدا ۇستاۋ مەرزىمى 2022 جىلدىڭ 6 شىلدەسىنە دەيىن, ەرعوجيندى 2022 جىلدىڭ 13 شىلدەسىنە دەيىن ۇزارتىلدى», دەدى قر ۇقك ءباسپاسوز قىزمەتىنەن.
كارىم ءماسىموۆتى قاماۋدا ۇستاۋ مەرزىمى وسىعان دەيىن بىرنەشە رەت ۇزارتىلعان ەدى. بۇعان دەيىن سوت سانكتسيانى 2022 جىلدىڭ 6 ماۋسىمىنا دەيىن بەرگەن-ءدى.
ەسكە سالا كەتەيىك, 6 قاڭتاردا مەملەكەت باسشىسىنىڭ جارلىعىمەن كارىم قاجىمقان ۇلى ءماسىموۆ قر ۇلتتىق قاۋىپسىزدىك كوميتەتىنىڭ توراعاسى لاۋازىمىنان بوساتىلعان ەدى.
8 قاڭتاردا ك.ءماسىموۆ جانە وزگە دە تۇلعالار ۇستالىپ, ۋاقىتشا ۇستاۋ يزولياتورىنا قامالدى. ولاردىڭ ۇستىنەن مەملەكەتكە ساتقىندىق فاكتىسى بويىنشا سوتقا دەيىنگى تەرگەۋ جۇرىپ جاتىر.
