بىرەر كۇن بۇرىن حالىقارالىق شايبالى حوككەي فەدەراتسياسىنىڭ (IIHF) ءباسپاسوز قىزمەتى جاريالاعان مالىمەت بويىنشا, 2023 جىلى وتكىزىلەتىن جاھاندىق دودانىڭ «ا» توبىندا بيىلعى الەم چەمپيونى ءارى جارىس قوجايىنى فينليانديا قۇراماسىنان بولەك, شۆەتسيا, چەحيا, گەرمانيا, دانيا, فرانتسيا, اۋستريا جانە ءبىرىنشى ديۆيزيوندا ۇزدىك ناتيجە كورسەتكەن ماجارستان قۇراماسى ونەر كورسەتەتىن بولدى. ال «ۆ» توبىنا الەم چەمپيوناتىن قابىلداۋشى لاتۆيا قۇراماسى جەتەكشىلىك ەتەدى. سونىمەن قاتار بۇل توپتا قازاقستان, كانادا, اقش, شۆەيتساريا, سلوۆاكيا, نورۆەگيا جانە تومەنگى توپتان جوعارى توپقا قوسىلعان سلوۆەنيا حوككەيشىلەرى دە باق سىنايدى.
الەمدەگى ساياسي جاعدايعا بايلانىستى فينلياندياداعى الەم بىرىنشىلىگىنەن شەتتەتىلگەن رەسەي مەن بەلارۋس قۇرامالارى كەلەسى جىلعى چەمپيوناتقا دا قاتىستىرىلمايتىن بولدى. سوندىقتان 2023 جىلى رەسەيدىڭ سانكت-پەتەربۋرگ قالاسىندا وتۋگە ءتيىس بولعان چەمپيونات لاتۆيا مەن فينليانديادا ەلدەرىندە وتەتىن بولدى.
الەم چەمپيوناتىنىڭ كۇنتىزبەسىنە سايكەس, جاھاندىق دودا 2023 جىلدىڭ 12 مامىرىندا باستالىپ, 28 مامىرىندا مارەسىنە جەتەدى. قازاقستان قۇراماسى IIHF ۇسىنعان ۇلتتىق قۇرامالاردىڭ جاڭارتىلعان رەيتينگىندە 16-شى ورىنعا يە بولدى. ءبىر قىزىعى, رەسەي (3-ورىن) جانە بەلارۋس (14-ورىن) قۇرامالارى حالىقارالىق ماتچتار مەن تۋرنيرلەردەن شەتتەتىلگەنىنە قاراماستان رەيتينگتەن شىعارىلمايدى. قازىرگى ۋاقىتتا الەمدىك رەيتينگتە بيىلعى الەم چەمپيونى – فينليانديا قۇراماسى كوش باستاپ تۇر.
ايتا كەتەيىك, فينليانديا استاناسى – حەلسينكي مەن تامپەرە قالالارىندا ۇيىمداستىرىلعان شايبالى حوككەيدەن ەليتالى ديۆيزيوننىڭ الەم چەمپيوناتىندا جارىس قوجايىندارى فينالدا كانادادان باسىم ءتۇسىپ (4:3), ءوز تاريحىندا ءتورتىنشى مارتە الەم چەمپيونى اتانعان بولاتىن. ال ءۇشىنشى ورىن ءۇشىن وتكەن سايىستا چەحيا حوككەيشىلەرى اقش قۇراماسىن 8:4 ەسەبىمەن جەڭگەن ەدى.
«ا» توبىندا ونەر كورسەتكەن قازاقستان قۇراماسى توپتاعى جەتى ويىننىڭ التاۋىندا جەڭىلىپ (دانيا – 1:9, فرانتسيا – 1:2, شۆەيتساريا – 2:3, كانادا – 3:6, سلوۆاكيا – 3:4, گەرمانيا – 4:5), سوڭعى تۋردا يتاليا قۇراماسىنان ايلاسىن اسىردى – 5:2. وسىلايشا, يۋري ميحايليس شاكىرتتەرى جالعىز جەڭىسىنىڭ ارقاسىندا ءۇش ۇپايمەن سەگىز كوماندانىڭ ىشىندە جەتىنشى ورىنعا تابان تىرەپ, ەليتالى ديۆيزيونداعى ورنىن ساقتاپ قالعان بولاتىن.
