ءداستۇرلى ءتۋرنيردى گرەك-ريم كۇرەسى شەبەرلەرى باستادى. بۇل جارىستا يران مەن تۇركيا قۇراما كوماندالارىنىڭ قارقىنى وتە كۇشتى بولدى. پارسى ەلىنىڭ پەحلەۆاندارى ءتورت التىن ولجالاسا, انادولى ەلىنىڭ اپايتوستەرى ءۇش رەت جەڭىس تۇعىرىنىڭ ەڭ بيىك ساتىسىنا كوتەرىلدى. ۇزدىك ۇشتىكتى قازاقستاننىڭ بالۋاندارى تۇيىندەدى. ولار ءدال يراندىقتار سەكىلدى 10 جۇلدە يەلەنگەنىمەن, مەدالداردىڭ ساپاسى جاعىنان باستى قارسىلاستارىنان قالىپ قويدى. ءبىزدىڭ جىگىتتەرگە بۇيىرعانى – 1 التىن, 4 كۇمىس جانە 5 قولا. ودان كەيىنگى ساتىلارعا وزبەكستان (1+0+5), قىرعىزستان (1+0+4), گرۋزيا (0+2+0) جانە ءۇندىستان مەن تاجىكستان (0+0+1) قۇرامالارى جايعاستى.
قازاقستاننىڭ بالۋاندارى اراسىنان قاھارمان قيسىمەتوۆتىڭ عانا اسىعى الشىسىنان ءتۇستى. 77 كيلو سالماق دارەجەسىندە سىنعا تۇسكەن ول العاشقىدا قىرعىزستاندىق رينات ءىلياس ۇلى مەن گرۋزيالىق كۆيشا انانيدزەنى قاپى قالدىرىپ, فينالعا جولداما الدى. شەشۋشى تۇستا ءوزىنىڭ كوماندالىق ارىپتەسى دەمەۋ جادىراەۆپەن كۇش سىناستى. كوپشىلىك جادىراەۆتىڭ جەڭەتىنىنە كۇمان كەلتىرگەن جوق. ويتكەنى ونىڭ الەم چەمپيوناتىنىڭ كۇمىس جۇلدەگەرى دەگەن دارداي اتاعى بار. جانە دە دەمەۋ توكيو وليمپياداسىنا قاتىستى. بىراق قاھارمان ونىمەن ەش قايمىقپاي ايقاستى. ناتيجەسىندە, ءبىر عانا ۇپاي ايىرماشىلىعىمەن جەڭىسكە جەتىپ, باس جۇلدەنى قانجىعاسىنا بايلادى.
قاھارمان رەنجي قويماس, بىراق سول كۇنى كوپشىلىكتىڭ ىقىلاسى ودان گورى 72 كيلو سالماقتاعى مەيىرجان شەرماحامبەتكە كوبىرەك اۋدى. ويتكەنى ول ءوزىنىڭ ەلىشىلىك جارىستارداعى باستى قارسىلاستارىنىڭ ءبىرى ازات سادىقوۆقا سان سوقتىرعاننان كەيىن وليمپيا ويىندارىنىڭ جەڭىمپازى, الەم جانە ازيا چەمپيونى موحامماد رەزا گەراەيمەن كەزدەستى. بۇل ايقاستى كورگەندە ارمان دا, كورمەگەن دە ارماندا. قازاقتىڭ قايسار ۇلى ەشكىمنەن جەڭىلمەگەنىنە تالاي جىلدىڭ ءجۇزى بولعان جامپوزعا ادىم اشتىرمادى. وتە ساۋاتتى تاكتيكا قۇرىپ, ۇنەمى ونىڭ الدىن وراپ وتىردى. اتاعى الىسقا جايىلعان گەراەي شاراسىز كۇي كەشتى. تابلوداعى ەسەپ 7:3-كە جەتكەندە باسەكە توقتاتىلدى. سول كەزدە بالۋان شولاق اتىنداعى سپورت سارايىنا جينالعان جانكۇيەرلەردىڭ تالاي شاتتانعانىن كورسەڭىزدەر عوي, شىركىن! ونى قۇر سوزبەن ايتىپ جەتكىزۋ تىپتەن مۇمكىن ەمەس!
الايدا شەرماحانبەتكە الماتىدا التىن تۇعىرعا كوتەرىلۋ باقىتى بۇيىرمادى. سەبەبى بۇل سالماقتاعىلاردىڭ سانى از بولعاندىقتان جارىس اينالمالى جۇيە بويىنشا ءوتتى. جەرلەسىمىز كەلەسى كەزدەسۋىندە وزبەك جامول جۇماباەۆتىڭ 36 سەكۋندتا اياعىن كوكتەن كەلتىرسە, گەراەي وزگە قارسىلاستارىن سىپىرا ۇتتى. سودان ەرەجەگە ساي قوس مىقتى قايتا فينالدا كۇش سىناسۋعا ءتيىس ەدى. بىراق مەيىرجاننىڭ جاراقات العانى بەلگىلى بولىپ, ول بوزكىلەمگە شىقپادى. ناتيجەسىندە, باس جۇلدەنى يراندىق سپورتشى يەلەنسە, ءبىزدىڭ جىگىت كۇمىس مەدالدى قاناعات تۇتتى. «اتتەگەن-اي!» دەپ ايتقاننان باسقا امال قالمادى.
سول سەكىلدى مارلەن مۇقاشەۆ (55 كيلو) پەن باعلان جاقانشا (63 كيلو) كۇمىسپەن كۇپتەلسە, ەرنۇر فيداحمەتوۆ (60 كيلو), ماديار مالتەكباەۆ پەن سۇلتان اسەت ۇلى (67 كيلو), ولجاس سىرلىباي (97 كيلو) جانە انتون ساۆەنكو (130 كيلو) قولا مەدالداردى مويىندارىنا ءىلدى. نەسىنە جاسىرايىق, تالاي بايراقتى باسەكەدە قازاق ەلى نامىسىن ابىرويمەن قورعاعان قورلان جاقانشا (55 كيلو), مەيرامبەك ايناعۇلوۆ (63 كيلو), ازامات قۇستىباەۆ پەن نۇرسۇلتان تۇرسىنوۆ (87 كيلو) جانە ءالىمحان سىزدىقوۆ (130 كيلو) سىندى ساڭلاقتارىمىزعا وسى جولى ۇلكەن سەنىم ارتقان ەدىك. بىراق ولار جارتى جولعا جەتپەي ءسۇرىندى.
وزبەك جالعاسباي بەردىمۇراتوۆ (الەم چەمپيوناتىنىڭ قولا جۇلدەگەرى, ازيا چەمپيونى) پەن رۋستام اسساكالوۆ (الەم چەمپيوناتىنىڭ ەكى دۇركىن جۇلدەگەرى, ازيا ويىندارىنىڭ جەڭىمپازى, ازيانىڭ ءۇش دۇركىن چەمپيونى) جانە قىرعىزستاندىق جولامان شارشەنبەكوۆ (الەم چەمپيوناتىنىڭ ەكى دۇركىن كۇمىس جۇلدەگەرى, الەم كۋبوگىنىڭ يەگەرى) الماتىداعى جارىستا ۇزدىك ۇشتىكتىڭ قاتارىنا اۋپىرىمدەپ ءجۇرىپ ازەر قوسىلدى. ال گرۋزيالىق ياكوب كادجايا (توكيو وليمپياداسىنىڭ كۇمىس جۇلدەگەرى, الەم چەمپيوناتىنىڭ ەكى دۇركىن قولا جۇلدەگەرى, ەۋروپا ويىندارىنىڭ جەڭىمپازى) مەن يراندىق مەيسام دالحاني (الەم چەمپيونى) سىندى دۇلدۇلدەر مۇلدە جۇلدەسىز قالدى. وسى جايتتىڭ ءوزى-اق, «بولات تۇرلىحانوۆ كۋبوگى» دەپ اتالاتىن رەيتينگتىك ءتۋرنيردىڭ دەڭگەيى قانشالىقتى جوعارى بولعانىن اڭعارتسا كەرەك.
گرەك-ريم كۇرەسىنەن وتكەن جارىستىڭ جەڭىمپازدارى:
55 كيلو – پويا پاپا مارز (يران), 60 كيلو – الي رەزا نەدجاتي (يران), 63 كيلو – كەرەم كامال (تۇركيا), 67 كيلو – ابرور اتاباەۆ (وزبەكستان), 72 كيلو – موحامماد رەزا گەراەي (يران), 77 كيلو – قاھارمان قيسىمەتوۆ (قازاقستان), 82 كيلو – اقجول ماحمۋدوۆ (قىرعىزستان),
87 كيلو – رامين تاحەريسارتانگ (يران), 97 كيلو – مەتەحان باسار (تۇركيا) جانە 130 كيلو – وسمان يىلدىرىم (تۇركيا).
ايەلدەر كۇرەسىنەن وتكەن جارىستا ءۇندىستان قۇراماسىنا تەڭ كەلەر ەشكىم تابىلمادى. ولار ساراپقا سالىنعان باس جۇلدەنىڭ تەڭ جارتىسىن ولجالادى. جالپى جۇلدەلەرىنىڭ سانى 8 (5+1+2). ەكىنشى ورىندى قازاقستاننىڭ سۇلۋلارى (2+3+1) ولجالادى. موڭعوليا (2+1+3) مەن قىرعىزستاننىڭ (1+0+1) بۇرىمدىلارى ءۇش پەن ءتورتىنشى ساتىعا جايعاسسا, وزبەكستان (0+2+3), ازەربايجان (0+2+2) جانە مىسىر (0+1+0) ەلدەرى جۇلدە العان كوماندالاردىڭ قاتارىندا.
جەرلەستەرىمىزدىڭ اراسىنان مارينا سەدنەۆا (55 كيلو) مەن ءمادينا باقبەرگەنوۆا (72 كيلو) التىننان القا تاعىنسا, جۇلدىز ەشىموۆا (53 كيلو), ەمما تيسينا (57 كيلو) جانە يرينا كۋزنەتسوۆا (62 كيلو) كۇمىس مەدالدى
موينىنا ءىلدى. ال ديانا كايۋموۆا (59 كيلو) قولاعا قول سوزدى.
