بيىل جىل باسىنان بەرى كامەلەت جاسىنا تولماعان 20 وقۋشى قىلمىستىق قۇقىق بۇزۋشىلىققا بارعان. ونىڭ ىشىندە 13 اۋىرلىعى ورتاشا, 7 اۋىر قىلمىس بار.
«مىسالى, كامەلەت جاسىنا تولماعان ك ەسىمدى وقۋشى Telegram ينتەرنەت-ارناسىنان جۇمىس تاجىريبەسى جوق بولسا دا جالاقىسى جوعارى جاياۋ كۋرەر قاجەت دەگەن حابارلاندىرۋدى تاپقان. ول وسى اقپاراتقا قىزىعۋشىلىق تانىتقان. كۋرەردىڭ جۇمىسىنا پسيحوتروپتىق زاتتاردى جاسىرىن ورىندارعا جەتكىزۋ كىرەتىنىن بىلە تۇرا ماتەريالدىق تۇرعىدان تەز بايۋ ماقساتىن كوزدەگەن. ونىڭ اسا ءىرى مولشەردەگى ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا ساقتاۋ, تاسىمالداۋ, وتكىزۋگە باعىتتالعان ەلەكتروندىق اقپاراتتىق رەسۋرستاردى پايدالانۋ ارقىلى قىلمىستىق نيەتى انىقتالعان. ناتيجەسىندە وقۋشى ك 7 جىل 6 اي مەرزىمگە باس بوستاندىعىنان ايىرۋ جازاسىمەن سوتتالدى», دەپ حابارلادى وبلىستىق پروكۋراتۋرانىڭ ءباسپاسوز قىزمەتى.
وسىعان بايلانىستى قاداعالاۋ ۆەدومستۆوسىنىڭ قىزمەتكەرلەرى اتا-انالارعا بالالاردىڭ ينتەرنەت جەلىسىندە وتىرۋىن قاتاڭ باقىلاۋدى ۇسىنادى.
