«بۇل مەن ءۇشىن ۇلكەن مارتەبە جانە جاۋاپكەرشىلىك. قازاقستان رەسپۋبليكاسىنداعى رەفەرەندۋمدا جۇمىس ىستەۋ مەن ءۇشىن وتە ماڭىزدى. ويتكەنى مەن ءوزىم وسىندا تۋىپ-ءوستىم, سولتۇستىك قازاقستان وبلىسىندا 17 جىل تۇردىم. كەيىن وقۋ ءبىتىرىپ, ماسكەۋگە كەتتىم. وسى جەردە رەسەي ورتالىق سايلاۋ كوميسسياسىنىڭ ءۇش مۇشەسى بار. مەن ەكىجاقتى ىنتىماقتاستىق ميسسياسىندا, پاۆەل اندرەەۆ شىۇ ميسسياسىندا جانە ناتاليا بۋدارينا تمد ميسسياسىندا قىزمەت ەتەدى. 5 ماۋسىم كۇنى 30-دان استام ۋچاسكەگە باردىق. كۇن وتە بەلسەندى جانە ناتيجەلى ءوتتى. بارلىق سايلاۋ كوميسسيالارىنىڭ مۇشەلەرىنىڭ دايىندىق پروتسەسىنە وتە جاۋاپتى قاراعانى كورىنىپ تۇر. سايلاۋ كوميسسياسىنىڭ توراعالارى 10-15 جىل بويى وسى جۇمىستى اتقارىپ كەلە جاتقان ازاماتتار ەكەن. ولار ءوز سايلاۋشىلارىن, ۋچاسكەسىندەگى جاعدايدى جاقسى بىلەدى. مۇنداي ماڭىزدى كەزەڭدەردە تاجىريبەلى مامانداردىڭ بولۋى وتە ماڭىزدى», دەيدى حايمۋرزينا.
سپيكەر قازاقستاندا رەفەرەندۋم ماڭىزدىلىعىن ءتۇسىندىرۋدىڭ جوعارى دەڭگەيدە جۇرگىزىلگەنىن اتاپ ءوتتى.
«نۇر-سۇلتان قالاسىندا تۇراتىن ءىنىم وسى ماڭىزدى ساياسي ءىس-شارا تۋرالى مەسسەندجەر ارقىلى بىلگەنىن ايتتى. جالپى, قازاقستاندا رەفەرەندۋم ماڭىزدىلىعىن ناسيحاتتاۋدا اقپاراتتىق قامتاماسىز ەتۋدىڭ جوعارى بولعانىن بايقاپ وتىرمىز. باق-تا دا, كوشەلەردە دە, الەۋمەتتىك جەلىدە دە بۇل تۋرالى ايتىلىپ, جازىلىپ جاتتى. ءبىز كورگەن ۋچاسكەلەردە ادامداردىڭ بەلسەندىلىگى جوعارى بولدى. كوميسسيا مۇشەلەرىمەن عانا ەمەس, سول ۋچاسكە تىزىمىندەگى ادامدارمەن دە – قوعامدىق ۇيىم مۇشەلەرى, قوعام بەلسەندىلەرىمەن دە سويلەستىم. ءبارى شتاتتىق رەجيمدە ءجۇرىپ جاتقانىن ايتتى», دەدى رەسەي وسك مۇشەسى.
