بۇگىن اۋدان ورتالىعى اسا اۋىلىنداعى №166 رەفەرەندۋم ۋچاسكەسىنىڭ سايلاۋشىسى, 112 جاستاعى كەيۋانا كۇلبارام سۇگىروۆا ەلىمىزدىڭ جارقىن بولاشاعى ءۇشىن داۋىس بەردى. كوپتى كورگەن قارت انا ەلدىڭ اماندىعىن, جۇرتتىڭ تىنىشتىعىن تىلەيدى.
بۇگىندە 112 جاسقا كەلگەن كۇلبارام اجە جامبىل وبلىسىنداعى عانا ەمەس, ەلىمىزدەگى ەڭ قاريا انا. قىرعىز ەلىندە تۋىپ-وسكەن ول اسا اۋىلىنا تۇرمىسقا شىققان. بۇگىندە عاسىردان استام جاساپ وتىرعان قاريا جاستايىنان قىزىلشا القابىندا جۇمىس ىستەپ, ەڭبەك مايدانىنا ارالاسقان. بۇل كۇندە بەينەتىنىڭ زەينەتىن كورۋدە. اۋلەتتىڭ اقىلشىسى, اق جاۋلىقتى انا ۇرپاق تاربيەسىنە دە ەرەكشە ءمان بەرىپ كەلەدى. جولداسى ەكەۋى ەكى قىز تاربيەلەپ, بۇگىندە 8 نەمەرە مەن 15 شوبەرەگە جەتىپ وتىر.
