«بارلىعى رەفەرەندۋم تۋرالى كونستيتۋتسيالىق زاڭنىڭ ەرەجەلەرىنە سايكەس وتەدى. قانداي دا ءبىر بۇزۋشىلىقتار تىركەلگەن جوق. رەفەرەندۋم تاعايىنداۋ تۋرالى جاريالانعان كۇننەن باستاپ پروكۋراتۋرا ورگاندارىنا وسى ماسەلە بويىنشا بارلىعى 18 ءوتىنىش ءتۇستى. بىراق ولاردىڭ ەشقايسىسى رەفەرەندۋم تۋرالى زاڭنامانى بۇزۋعا قاتىستى ەمەس», دەدى باس پروكۋروردىڭ ورىنباسارى بولات دەمباەۆ.
باس پروكۋرور ورىنباسارىنىڭ ايتۋىنشا, رەفەرەندۋم تۋرالى زاڭنامانى بۇزۋ تۋرالى قانداي دا ءبىر شاعىمداردىڭ بولماۋى اعىمداعى پروتسەستىڭ زاڭدىلىعىن كۋالاندىرادى.
ول «رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 7-بابىنا سايكەس رەفەرەندۋمنىڭ الدىنداعى كۇنى جانە وتكىزىلەتىن كۇنى, ياعني 4-5 ماۋسىمدا كەز كەلگەن ۇگىتتەۋگە, ونىڭ ىشىندە قوعامدىق پىكىرگە سۇراۋ سالۋ ناتيجەلەرىن نەمەسە رەفەرەندۋم ناتيجەلەرىنىڭ بولجامدارىن جاريالاۋعا ۇشتاسقان كەز كەلگەن ۇگىتتەۋگە تىيىم سالىناتىنىن ەسكە سالدى.
«ۇگىت جۇرگىزىلگەن جاعدايدا بۇل كۇندەرى اكىمشىلىك قۇقىق بۇزۋشىلىق تۋرالى كودەكستىڭ 102-بابى بويىنشا جاۋاپكەرشىلىك تۋىندايدى, وندا جەكە تۇلعالار ءۇشىن دە, زاڭدى تۇلعالار ءۇشىن دە جاۋاپكەرشىلىك كوزدەلگەن. وسى باپ بويىنشا اكىمشىلىك قۇقىق بۇزۋشىلىق تۋرالى ءىس قوزعاۋ پروكۋرورلاردىڭ ايرىقشا قۇزىرەتىنە جاتادى, ىستەردى سوت قارايدى. ۇنسىزدىك جانە داۋىس بەرۋ كۇندەرى ورىن الۋى مۇمكىن بۇزۋشىلىقتاردىڭ الدىن الۋ ماقساتىندا ءبىز بۇگىن باق ارقىلى حالىققا ءتيىستى تۇسىندىرمەلەرمەن جۇگىنۋدى جوسپارلاپ وتىرمىز», دەپ قوستى بولات دەمباەۆ.
ونىڭ ايتۋىنشا, الداعى ەكى كۇن پروكۋراتۋرا ورگاندارى ءۇشىن جۇمىس كۇنى بولىپ تابىلادى. ورتالىق دەڭگەيدە دە, سول سياقتى جەرگىلىكتى جەرلەردە دە رەفەرەندۋم كوميسسيالارىمەن جانە مۇددەلى مەملەكەتتىك ورگاندارمەن تۇراقتى بايلانىس ورناتىلعان, تاۋلىك بويى كەزەكشىلىك ۇيىمداستىرىلعان.
وتىرىس بارىسىندا ورتالىق رەفەرەندۋم كوميسسياسىنىڭ باسشىسى نۇرلان ءابدىروۆ ارىپتەستەرىنىڭ ايتۋىنشا, ۋچاسكەلىك كوميسسيالار داۋىس بەرۋ كۇنىنە دايىن, بيۋللەتەندەر ۋچاسكەلەرگە جەتكىزىلىپ, ولاردىڭ ساقتالۋى قامتاماسىز ەتىلگەن.
