ماڭىزدى شارۋانى قولعا الىپ, ساپالى ونىمدەرمەن تاپسىرىس بەرۋشىلەردىڭ كوڭىلىنەن شىعا بىلگەن پاۆلودارلىق Rainbow كومپانياسىنىڭ باسشىسى بەكبولات ىبىراەۆپەن اڭگىمەلەسكەن ەدىك. اتالعان سەرىكتەستىكتىڭ ونىمدەرى رەسپۋبليكانىڭ تۇكپىر-تۇكپىرىن كەزىپ ءجۇر.
– مەملەكەتتىك رامىزدەردى شىعارۋدى 2010 جىلدان باستادىق. وعان دەيىن بۇل شارۋانى ءجىتى زەرتتەدىم. ساپالى ءونىم شىعارۋ ءۇشىن ساپالى شيكىزات قاجەت. اقىرى قىتايعا بارىپ, ونداعى ءبىر كومپانيامەن 5 جىلدىق كەلىسىمشارتقا وتىردىق. سودان بەرى شيكىزات پروبلەماسى تۋىنداعان ەمەس. پاندەميا كەزىندە دە تۇسىنبەۋشىلىكتەر ورىن العان جوق. كەلىسىمشارتتىڭ اياقتالۋىنا ءبىر جىل قالدى. جاسىراتىنى جوق, «قىتايدىڭ تاۋارى» دەسە كوپشىلىگى ساپاسىز ءونىمدى ويعا الادى. قىتايدا ساپالى تاۋار, ساپالى شيكىزات جەتكىلىكتى. ساپاسى جاقسى بولسا, باعاسى دا قىمبات دەگەن ءسوز. دەسە دە ءبىزدىڭ ونىمدەر قولجەتىمدى باعامەن بوساتىلادى. سەبەبى دەلدالسىز جۇمىس ىستەيمىز, – دەيدى ب.ىبىراەۆ.
ليتسەنزيا الۋدىڭ وڭاي شارۋا ەمەس ەكەنىن ايتتىق عوي. اتالعان كومپانيا 2017 جىلى ليتسەنزياسىن جاڭارتقان. ول ۋاقىتتا تالاپتارعا وزگەرىستەر ەنگىزىلىپ, تسيفرلى تۇرعىدا تۇستەردى انىقتايتىن قوندىرعىنىڭ بولۋى مىندەتتەلگەن. ءسويتىپ, جاپونيادان قىمبات قوندىرعى ساتىپ الىنىپتى. قوندىرعى دەمەكشى, وندىرىستەگى بارلىق قۇرىلعى شەتەلدەن اكەلىنگەن قىمبات دۇنيەلەر. ونى بەكەر ايتىپ وتىرعانىمىز جوق. كەيبىرەۋى بۇل شارۋانى وڭاي كورۋى مۇمكىن. مەملەكەتتىك مەكەمە عيماراتتارىنىڭ توبەسىندە جەلبىرەپ تۇرعان كوك تۋ مەن ىشىندە جارقىراپ تۇرعان ەلتاڭبانى جاساۋ – ارزان ەڭبەك ەمەس.
مۇندا ايىنا 400 تۋ (عيماراتتىڭ سىرتىنا ارنالعان), كابينەتتەردىڭ ىشىندە تۇراتىن 20-30 تۋ, 200-300 ەلتاڭبا شىعارىلادى ەكەن. مەملەكەتتىك رامىزدەر ەرەجە بويىنشا بىرنەشە جىل ىشىندە جاڭارتىلىپ تۇرۋعا ءتيىس. سوندىقتان دا كومپانيا سۇرانىسقا باس قاتىرىپ كورگەن ەمەس.
– ونىمگە الدىن الا تاپسىرىس بەرىلەدى. كەيدە تاپسىرىس بەرۋشىلەر دەمالىس كۇنى «جەدەل تۇردە ءبىر تاۋلىكتىڭ ىشىندە دايىنداپ بەرسەڭىزدەر» دەپ قولقا سالادى. مۇندايدا كەيبىرەۋلەر باعانى شارىقتاتىپ جىبەرەتىنى بەلگىلى. تىعىرىققا تىرەلگەن ادام كەز كەلگەن باعاعا كونەدى. ءبىز بولساق باعانى قىمباتتاتپاي, ءتىپتى 10 پايىز جەڭىلدىكپەن دايىنداپ بەرەمىز. ارينە ريزا بولعان تاپسىرىس بەرۋشىلەر ءبىزدىڭ كومپانيانى وزگەلەرگە ۇسىنىپ, ماقتاپ جۇرەتىنى ءسوزسىز. وسىلايشا, مەنەدجمەنت باعىتىن دامىتۋدى دا ەستەن شىعارعان ەمەسپىز, – دەيدى بەكبولات قۇنتاي ۇلى.
اتالعان كومپانيا مەملەكەتتىك رامىزدەردى دايىنداۋمەن قاتار, باننەر جاساۋ, مەكتەپتەردىڭ بەزەندىرىلۋى سياقتى وزگە دە باعىتتا ەڭبەك ەتۋدە. ماقالا مەملەكەتتىك رامىزدەر كۇنىنە وراي جازىلعاندىقتان ول جايلى اسا سۇراي قويعان جوقپىز. مۇندا شامامەن 10 ادام ناپاقا ايىرىپ ءجۇر ەكەن. ارقايسىسى – ءوز ءىسىنىڭ مامانى. «مەملەكەتتىك رامىزدەردى دايىنداۋ – وتە جاۋاپتى مىندەت. ەلدىڭ باستى نىشانىن شىعارعاندىقتان, ارتىلعان جاۋاپكەرشىلىك تە اۋىر. مۇنى قول استىمداعى قىزمەتكەرلەر دە جاقسى بىلەدى. سوندىقتان ولار ءار ىسكە ىجداعاتتىلىقپەن قارايدى», دەيدى اڭگىمەمىزدىڭ كەيىپكەرى.
بۇگىندە ۇلى ءمادي دە ماڭىزدى شارۋانى جانداندىرۋعا اتسالىسىپ ءجۇر. بەكبولات اعا باسشى بولعانىمەن, جاۋاپكەرشىلىگى مول ءىستىڭ باسى-قاسىنان ءاردايىم ءوزى تابىلادى. جالپى, بۇل اۋلەتكە قولونەر دارىعان دەسەك, ارتىق ايتقانىمىز ەمەس. اكەسى قۇنتاي دا ەلگە تانىمال ەتىكشى بولىپتى. ۇرپاقتار ساباقتاستىعى دەگەن وسى ەمەس پە؟!
بەكبولات ىبىراەۆ – باياناۋىلدىڭ تۋماسى. ماماندىعى – مۇعالىم. كەزىندە ەگىندىبۇلاق اۋىلىنىڭ مەكتەبىندە ەڭبەك, سىزۋ, سۋرەت, مۋزىكا پاندەرىنەن ساباق بەرگەن. سول ۋاقىتتا ونىڭ كابينەتى بەزەندىرىلۋى جاعىنان اۋداندا ەڭ ۇزدىك سانالىپتى. سەگىز قىرلى, ءبىر سىرلى ازاماتقا ءومىرىن ءماندى ەتۋ ءۇشىن تاڭداۋ كوپ ەدى. اقىرى, زاماننىڭ اعىمىنان قالماي, قازىرگى ءىس قىلىپ وتىرعان شارۋانى جانداندىرۋعا نيەت ەتىپتى. قوشتاساردا ۇستازى زەكەباي سولتانباەۆتىڭ مىنا ءسوزىن ەسكە الدى: «ادام جۇمىسىنا قۋانا بارىپ, قۋانىپ قايتۋ كەرەك». بەكبولات اعامىز دا تاعدىر تاڭداۋىنا ەش وكىنبەيدى, جاستاردى مەملەكەتتىك رامىزدەردى قۇرمەتتەۋگە شاقىرادى.
پاۆلودار وبلىسى
