– ءبىز ەڭبەك ۇجىمدارىمەن, مەديتسينا, مادەنيەت قىزمەتكەرلەرىمەن جانە پەداگوگتەرمەن كەزدەسۋ وتكىزدىك. ماقساتىمىز – كونستيتۋتسياعا ەنگىزىلەتىن وزگەرىستەر مەن تولىقتىرۋلاردى ءتۇسىندىرۋ. الداعى كونستيتۋتسيالىق رەفورما بيلىك تارماقتارى اراسىنداعى قارىم-قاتىناس تەڭگەرىمىن وڭتايلاندىرادى. حالىقتىڭ ەلدى باسقارۋعا قاتىسۋىن كەڭەيتەدى, ازاماتتاردىڭ كونستيتۋتسيالىق قۇقىقتارىن قورعاۋدى كۇشەيتەدى. ءبىزدىڭ ارقايسىمىز وسى مۇمكىندىكتى پايدالانۋىمىز كەرەك, – دەدى عالىمجان ەلەۋوۆ.
امانعالي بەرداليننىڭ پىكىرىنشە, وسىنداي كەزدەسۋلەردەن پرەزيدەنتتىڭ ساياساتى مەن رەفورمالارىنا حالىقتىڭ قولداۋى ايقىن كورىنەدى. بۇل – مەملەكەتتىڭ ادىلەتتى قازاقستان قۇرۋداعى باعىتىنىڭ دۇرىستىعىنىڭ جارقىن كورىنىسى.
– كونستيتۋتسياعا ەنگىزىلەتىن وزگەرىستىڭ ىشىندە ەلىمىزدىڭ سۋپەرپرەزيدەنتتىك باسقارۋدان تۇبەگەيلى باس تارتىپ, پرەزيدەنتتىك رەسپۋبليكا مودەلىنە ءوتۋى, بارلىق پارتياعا تەڭ مۇمكىندىك اشىلۋى, دەموكراتيالىق قوعامنىڭ كۇشەيۋى ەلدى جاڭا كەزەڭگە ءوتۋىنىڭ كەپىلى دەپ بىلەمىن. بارلىق اقتوبەلىكتى ساياسي ناۋقانعا اتسالىسىپ, داۋىس بەرۋگە شاقىرامىن, – دەدى امانعالي بەردالين.
«قازاقتەلەكوم» اق اقتوبە وبلىستىق فيليالىندا قازىرگى تاڭدا 465 ادام جۇمىس ىستەيدى. ۇلكەن ەڭبەك ۇجىمى مەملەكەت باسشىسى قاسىم-جومارت توقاەۆتىڭ رەفورمالارىن قولدايتىنىن ايتىپ, ساياسي ناۋقاننان ۇلكەن ءۇمىت كۇتەتىنىن جەتكىزدى.
– ەلىن, جەرىن, بالالارىنىڭ بولاشاعىن ويلايتىن ادام رەفەرەندۋمعا بارۋى كەرەك دەپ ويلايمىن, – دەدى جەرگىلىكتى كاسىپوداق ۇيىمىنىڭ جەتەكشىسى عاليا وتەگەنوۆا.
