«گاياۆاتا» القاسى, «سىعان باقىتى», «جازعى سارىن»

وبلىستىق كوركەمسۋرەت مۋزەيىندە مايسا ىقىلاسوۆا, تاتيانا چەۆتاەۆا, جانەتتا ناۋرۋزوۆا, ولگا لوۆينا سياقتى سۋرەتشى ايەلدەردىڭ تۋىندىلارىنا ارنالعان «كوكتەم كەلدى, جانعا جىلۋ بەرىپ...» اتتى كورمە ءوتتى. كورمە زالىندا كيىز, كەسكىن­دەمە تۋىندىلارى, ەمال, ءتۇرلى مەتالداردان جاسالعان كوز جاۋىن الارداي اشەكەي بۇيىمدار قويىلىپتى. كوركەمسۋرەت مۋزە­يىنىڭ قىزمەتكەرى, ونەرتانۋشى مايا بۇگىبايقىزىنىڭ ايتۋىن­شا, ارينە, شىعارماشىلىق ادام­دارىنا, ولاردىڭ قاتارىندا سۋ­رەتشىلەرگە, اسىرەسە, سۋرەتشى ايەلدەرگە كوكتەمنىڭ كەلۋى شابىت اكەلەرى ءسوزسىز. قيالدارى قالىقتاپ, جان دۇنيەلەرى سەزىمگە, ماحابباتقا بولەنەر شاق قوي. سوندىقتان دا, كورمەدەگى تۋىندىلار ءومىر كوكتەمىن كوز الدىڭىزعا اكەلەدى. ونەرتانۋشى مايا بۇگىبايقىزى ايتقانداي, كورمەنى ارالاپ كورگەن ساتتە كۇندەلىكتى ءومىردىڭ قىم-قۋىت مازاسىز تىرلىگىنەن الىستاپ, ءبىر دەمالىپ قالاسىز. جانعا قۋات بەرەر رۋحاني ءومىردىڭ ماڭايىمىزدان الىستاپ بارا جاتقان ورنىن مۋزەيلەر, كورمە زالدارى تولتىرىپ وتىرعانى دا ءبىر عانيبەت. كورمەنى قىزىقتاپ كەلۋشىلەر وتە كوپ. سۋرەتشى ايەلدەر دەمەكشى, مىسالى مايسا ىقىلاسوۆا قازاقتىڭ ءتول ونەرى – كيىز باسۋ ءداستۇرى بويىنشا جاسالىنعان تۋىندىلارىن كورسەتتى. جالپى, كورمەگە قاتىسۋشى پاۆلو­دار­لىق­تارعا تانىمال سۋرەتشى ايەل­دەردىڭ قاي-قايسىسى بولسىن – مايسا ىقىلاسوۆا, تاتيا­نا چەۆتاەۆا, جانەتتا ناۋرۋ­زو­ۆا, ولگا لوۆينالار ءوزىن­دىك شى­عارماشىلىق ەرەكشە­لىك­تەرى­مەن كورىندى. سۋرەتشى مايسا ىقىلاسوۆا مۇقاعالي پوەزياسىن قىلقالامنىڭ ۇشىمەن بەينەلەپ, ليريكالىق سارىندا تانىلىپ جۇرگەن سۋرەتشى. اقىننىڭ «جاپىراق جۇرەك جاس قايىڭ», «عاشىقپىن», «پوەزيا مەنىمەن ەگىز بە ەدىڭ؟» ولەڭدەرىنە ارناپ عاجاپ سۋرەتتەر سالدى. جاس­تايىنان مۇقاعالي جىرىن جاتا جاستانا وقىعان دارىن يەسى وسە كەلە بويىنداعى سۋرەتشىلىك ونەرىن پوەزيامەن ۇشتاستىردى. كورمەگە جۇنمەن بەينەلەگەن «ناۋرىزشا», «تورايعىر كولى», «كۇن شۋاعىنا شومىلعان ءتۇز» اتتى تۋىندىلارى قويىلدى. مايسا شىمكەنت قالاسىنداعى ءابىلحان قاستەەۆ اتىنداعى كور­كەمسۋرەت ۋچيليششەسىن, ت.ءجۇر­گەنوۆ اتىنداعى ونەر اكادە­مياسىنىڭ «ستسەنوگرافيا» ءبولىمى بويىنشا بىتىرسە, زەرگەر ولگا لوۆينا – كراسنوسەلسك (رەسەي) مەتالدى كوركەمدەۋ ۋچي­ليششەسىن, كەسكىندەمەشى جا­نەتتا الماتىداعى گوگول اتىن­داعى كوركەمسۋرەت ۋچيلي­ششەسىنىڭ, تاتيانا پەتروۆنا ورال (نيجني تاگيل) قولدانبالى ونەر ۋچيليششەسىنىڭ تۇلەكتەرى, جانەتتانىڭ «قارىنداستار», «جەلمەن», «سىعان باقىتى», «كۇزدىڭ اياقتالۋى», تاتيانانىڭ «جاستىق شاق قيالدارى», «قىسقى تاڭ», «جازعى سارىن» اتتى سۋ­رەتتەرى جۇرتتى پسيحولوگيالىق تولعانىسىمەن, اسقاق يدەيالىق سيپاتىمەن قىزىقتىردى. ال, ولگا لوۆينانىڭ «سولتۇستىك جەل», «گۇلدەر» اتتى تانا مونشاعى, «گاياۆاتا» مويىنالقاسى, «ناۋ­رىز» اتتى اشەكەي بۇيىمدار توپتاماسى شەبەردىڭ قيال ءجۇي­رىكتىگىن, وي تەرەڭدىگىن كورسەتتى. وبلىستىق كوركەمسۋرەت مۋزە­يىن­دەگى سۋرەتشى ايەلدەر كورمەسىندەگى تۋىندىلاردان تەك قانا جىلىلىق, تازالىق, سۇلۋلىق, ماحاببات لەبى ەسىپ تۇردى. ءيا, نازىك جاراتىلىس يەلەرىنىڭ جۇرەك سىرىمەن تۇرلەنگەن دالامىزداعى قىرمىزى لەبىزدەن قىلقالام سازى تەبىرەنە ەسكەندەي. فاريدا بىقاي, «ەگەمەن قازاقستان». پاۆلودار.