ءدۋالدى جۇيە جۇزەگە اسا باستادى

جاسىراتىنى جوق, بۇگىندە ءدۋالدى وقىتۋ دەگەن نە, ونىڭ قانداي پايداسى بار ەكەنىن تۇسىنبەي جۇرگەن جاندار دا جوق ەمەس. ءدۋالدى جۇيە­نىڭ نەگىزى – وقۋشىنى وقۋ ورنى مەن وندىرىستە قاتار وقىتۋ. ياعني, وقۋشى تەك كىتاپتان وقىپ-توقي بەرمەي, ءوندى­رىستە سول ءبىلىمىن ءىس-تاجىريبە رەتىندە سىناپ كورۋى قاجەت. ايتسە دە, ءدال قازىر تەحنيكالىق جانە كاسىپتىك ءبىلىم بەرەتىن وقۋ ورىندارى اراسىندا وسى ءدۋالدى وقىتۋعا بايلانىستى بىرقاتار ماسەلەلەر بار ەكەنى جاسىرىن ەمەس. مىسالىعا, وقۋشىنى ءوز ماماندىعىنىڭ قىر-سىرىنا ءۇي­رەتەتىن شارۋاشىلىق كاسىپ­ورىندار ءدۋالدى جۇيەگە ءوتىپ, وقۋ ورىندارىمەن بىرلەسىپ جۇمىس ىستەۋگە قانشالىقتى ق ۇلىقتى؟ سوسىن وندىرىستىك ءىس-تاجىريبە سا­باقتارىن كىم وتكىزەدى, مۇعالىمدەر مە, جوق, سول كاسىپورىننىڭ ماماندارى ما؟ مىنە, بۇل جەردە ەلىمىزدىڭ ءبىلىم جانە عىلىم مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى بىرلەسىپ جۇمىس ىستەپ, كوپ ماسەلەنى دۇرىس جولعا قويا ءبىلۋى قاجەت. ەلباسى نۇرسۇلتان نازارباەۆ «ءدۋالدى كاسىپتىك ءبىلىم بەرۋدى دامى­تۋدىڭ ماڭىزى زور. بۇقارالىق مامان كادرلارىنىڭ جەتىسپەۋشىلىگىن ەڭسەرۋگە مۇمكىندىك بەرەتىن زاماناۋي قولدانبالى بىلىكتىلىك ورتالىقتارى قاجەت» دەپ, بۇل جۇيەنى كەڭىنەن ەنگىزۋگە ناقتى تاپسىرمالار جۇك­تەگەن بولاتىن. جاقىندا قۇلان اۋىل ­شارۋاشىلىعى كوللەدجىندە وسى ىسكە سەرپىن بەرگەن ءبىر يگىلىكتى تىرلىكتىڭ كۋاسى بولدىق. بۇرىن بۇل وقۋ ورنىنىڭ اگرونوميا ماماندىعى بويىنشا ءبىلىم الىپ جاتقان وقۋ­شىلارى وندىرىستىك ءىس-تاجىريبەنى ءتۇرلى شارۋاشىلىقتاردا وتكىزەتىن. جاسىراتىنى جوق, كۇزدىڭ, قىستىڭ سۋىق كۇندەرىندە وقۋشىلاردىڭ كابينەتتە كىتاپقا شۇقيعاننان باسقا امالى جوق ەدى. ەندى, مىنە, كوللەدج ءوز عيماراتتارىنىڭ جانىنان جىلىجاي اشىپ, ءدۋالدى جۇيەگە قول جەتكىزىپ وتىر. «وتكەن جىلى وبلىستىق ءبىلىم باسقارماسى ءبىزدىڭ كوللەدجگە 25 ميلليون تەڭگە بولگەن بولاتىن. بۇل قارجىعا ينتەراكتيۆتى تاقتا, بەينەكامەرالار, تەحنيكا جانە ۆەتەرينارلىق لابوراتوريالىق جابدىقتار الىندى. جانە 4 ميلليون تەڭگەگە 4 سوتتىق جىلىجاي اشتىق. بۇل جىلىجاي وقۋشىلارىمىزدى ءدۋالدى جۇيەدە وقىتۋ ءۇشىن وتە ءتيىمدى بولىپ تۇر. اگرونوم ماماندىعىندا وقىپ جاتقان جاستار وسى كەشەننەن ۇلكەن تاجىريبە جيناقتايدى. بۇل جالعان ۇران, ناۋقانشىلدىق ءۇشىن ەمەس, وقۋشىلاردىڭ بىلىكتىلىگىن كوتەرۋ ءۇشىن جاسالىپ وتىرعان شارۋا», دەيدى بۇل جونىندە كوللەدج ديرەكتورى جۇماگۇل بۇكىروۆا. ءيا, شىنىندا قازىر جىلىجايدىڭ جاپىراعى جايقالىپ, العاشقى ءونىم جينالىپ جاتىر ەكەن. وسى كوللەدجدىڭ ستۋدەنتى ايگەرىم بولاتحانوۆا 4 سوتتىق جەردە 4 ايدان بەرى ەڭبەكتەنىپ, مول ءونىم الۋدىڭ جولدارىنا ءتۇرلى زەرتتەۋ جاساعاندارىن ايتادى. «وسى ۋاقىت ىشىندە وقۋشىلار تالاي تاجىريبە جاساپ, كوپ نارسەگە قانىقتى. قياردىڭ قانداي ءتۇرىن ەگۋ كەرەك, ىستىق-سۋىققا ءتوزىمدى مە, ءونىمدى قالاي بەرەدى, قانداي توپىراققا وتىرعىزۋ كەرەك, مىنە, وسى ماسەلەگە جاستار اسقان قىزىعۋشىلىق تانىتتى. ولار وسى جىلىجايدان ۇيرەنگەن تاجىريبەسىن شارۋاشىلىقتاردا دا كەڭىنەن پايدالانادى دەگەن ويدامىن» دەيدى ول. جالپى, بۇگىندە جامبىل وبلىسىندا 51 كاسىپتىك-تەحنيكالىق كوللەدج بار بولسا, سونىڭ 11-ءى 19 ماماندىق بويىنشا ءتۇرلى كاسىپ­ورىن­دارمەن 123 كەلىسىمشارت جاساسىپتى. ياعني, ءدۋالدى جۇيە جام­بىل جەرىندە جۇزەگە اسا باستادى دەگەن ءسوز. ورالحان ءداۋىت, «ەگەمەن قازاقستان». جامبىل وبلىسى.