اەف-تىڭ الەمدىك تۇساۋكەسەرى ءوتتى

نيۋ-يوركتىڭ قارجى كۆارتالىنىڭ تاريحي ورتالىعى سانالاتىن ۋولل-ستريتتە استانا ەكونوميكالىق فورۋمىنىڭ تۇساۋكەسەرى ءوتتى. حالىقارالىق قارجى جانە ينۆەستيتسيالىق كومپانيالاردىڭ جەتەكشىلەرى مەن دۇنيەجۇزىلىك قارجى بيرجالارىنىڭ ساراپشىلارىنا قازاقستاندىق بىرەگەي جوبا تانىستىرىلدى. تۇساۋكەسەرگە قور بيرجاسىنىڭ توراعاسى ءارى نەگىزىن سالۋشى دراسكو ۆەسەلينوۆيچ, CAPMEX توراعاسىنىڭ ورىنباسارى, باسقارۋشى ارىپتەسى, ۆەنا قور بيرجاسىنىڭ بۇرىنعى ديرەكتورى حاننەس تاكاچ, NASDAQ توراعاسى دەۆيد ۋايلد, NASDAQ توراعاسىنىڭ بۇرىنعى ورىنباسارى, حاتشىسى, جاڭا زەلانديا قور بيرجاسىنىڭ بۇرىنعى باس ديرەكتورى ۋيليام فوستەر, ىستامبۇل قور بيرجاسىنىڭ بۇرىنعى ۆيتسە-توراعاسى اريل سەرەن, پروفەسسور, فرانكفۋرت قور بيرجاسىنىڭ باس ديرەكتورى, دوكتور ريۋديگەر فون روزەن, كۋالا-لۋمپۋر قور بيرجاسىنىڭ بۇرىنعى اتقارۋشى توراعاسى نيك موحامەد دين, ەگيپەت قور بيرجاسىنىڭ بۇرىنعى اتقارۋشى توراعاسى موحامەد ابدەل سالام جانە باسقا الەمدىك قارجى جانە ينۆەستيتسيا سالاسىنىڭ بەلگىلى تۇلعالارى قاتىستى. ءىس-شاراعا قاتىسۋشىلار قازاقستان رەسپۋبليكاسى ۇسىناتىن باستامالارمەن جانە جوبالارمەن جان-جاقتى تانىستى, سونىمەن قاتار, ولار الداعى VII استانا ەكونوميكالىق فورۋمىنىڭ باعدارلاماسىن تالقىلادى. – 2014 جىلدىڭ 21-23 مامىرى ارالى­عىندا قازاقستان استاناسىندا جىل سايىنعى استانا ەكونوميكالىق فورۋمى وتەدى, دەدى تۇساۋكەسەر قوناقتارىنا ارنالعان سوزىندە «عالىمداردىڭ ەۋرازيالىق ەكونوميكالىق كلۋبى» قاۋىمداستىعىنىڭ وكىلى دينارا قارشالوۆا. – قازىرگى تاڭدا فورۋم 150-دەن استام ەلدىڭ ون مىڭنان استام قاتىسۋ­شىلارىن جاھاندىق قارجىلىق جۇيە پروبلەمالارىن شەشۋ جۇمىسىنا قاتىسۋعا جانە داعدارىستان شىعۋ جولدارىن بەلسەنە ىزدەۋگە تارتىپ وتىر. ولاردىڭ ىشىندە مەملەكەتتەردىڭ بۇرىنعى جانە قازىرگى باسشىلارى, ەكونوميستەر, ساياساتكەرلەر, قارجىلىق ساراپشىلار, نوبەل سىيلىعىنىڭ لاۋرەاتتارى جانە ەڭ جوعارى دەڭگەيدەگى بيزنەس-كوشباسشىلار بار. سونىمەن بىرگە, كەزدەسۋدە استانا ەكونوميكالىق فو­رۋمى داعدارىسقا قارسى دۇنيەجۇزىلىك جوسپار تۇجى­رىم­داماسىن قالىپتاستىرۋعا قاتىسۋدىڭ ناقتى مۇمكىن­دىگىن ۇسىناتىندىعى, سونىمەن قاتار, جاڭا كاسىبي بايلا­نىستار ورناتۋ ءارى يننوۆاتسيالىق ازىرلەمەلەرگە قول جەتكىزۋگە مۇمكىندىك بەرەتىندىگى جايىندا تىلگە تيەك ەتىلدى. جىلقىباي جاعىپار ۇلى, «ەگەمەن قازاقستان».