وقۋ جىلىن اياقتاعان بالالار ەندى جازعى دەمالىستى ءتيىمدى وتكىزۋدىڭ قامىنا كىرىستى. قۋانىش پەن شاتتىققا تولى ۇمىتىلماس ەستەلىكتەر قالدىراتىن جازعى لاگەر وقۋشىلار ءۇشىن تاپتىرماس مۇمكىندىك.
ال, جازعى دەمالىس لاگەرلەرىنە تەگىن بارۋ مۇمكىندىگىن الەۋمەتتىك از قامتىلعان وتباسى بالالارىنىڭ 61%-ى, ەرەكشە ءبىلىم قاجەتتىلىگىنە مۇقتاج بالالاردىڭ 64%-ى, ءتۇرلى سالادا جەتىستىككە جەتكەن وقۋشىلاردىڭ 78% جانە دەۆيانتتى تاربيەدەگى بالالاردىڭ 82%-ى الادى. سونىمەن قاتار تەگىن دەمالۋ قۇقىعى:
- اتاۋلى الەۋمەتتىك كومەك الۋعا قۇقىعى بار وتباسىلاردان شىققان بالالارعا;
- جان باسىنا شاققانداعى تابىسى ەڭ تومەنگى كۇنكورىس دەڭگەيى تومەن وتباسىلاردان شىققان بالالارعا;
- جەتىم بالالارعا, اتا-اناسىنىڭ قامقورلىعىنسىز قالعان بالالارعا;
- توتەنشە جاعدايلار سالدارىنان شۇعىل جاردەمدى تالاپ ەتەتىن وتباسىلاردان شىققان بالالارعا;
- مەكتەپتىڭ قامقورشىلىق كەڭەسى انىقتايتىن وزگە دە ساناتتاعى ءبىلىم الۋشىلار مەن تاربيەلەنۋشىلەرگە بەرىلەدى
بۇل جولداماعا يە بولۋ ءۇشىن اتالعان ساناتتاعىلار ءبىلىم بەرۋ ۇيىمىنىڭ اتىنا ءوتىنىش جازۋى كەرەك. قاجەتتى قۇجاتتار ءتىزىمىن سول مەكەمەدەن بىلۋگە بولادى.
«بالالاردىڭ جازعى دەمالىسىن ۇيىمداستىرۋ ءارى جولداما بەرۋ جەرگىلىكتى اتقارۋشى ورگاندار قۇزىرەتىندە جانە ولاردىڭ قاراجاتىنا بايلانىستى ۇلەستىرىلەدى. جازدا 11 مىڭنان استام مەكتەپ جانىنداعى ءارى قالا سىرتىنداعى ساۋىقتىرۋ لاگەرى جۇمىس ىستەيدى. بيىل وتكەن جىلمەن سالىستىرعاندا 500 مىڭعا ارتىق بالا لاگەردە دەمالادى. ال جازعى ساۋىقتىرۋ دەمالىسىمەن قامتىلاتىن بالالاردىڭ جالپى سانى 2 ملن 300 مىڭنان اسادى», دەيدى ەلينا پاۋلي.
رەسپۋبليكا بويىنشا 18 جوعارى ءبىلىم ۇيىمى 1306 بالاعا ءار ءتۇرلى باعىتتا لاگەرلەر ۇيىمداستىرادى. 7 لاگەر مەن 2 جاتىن ورنى جوعارعى ءبىلىم ۇيىمدارى ەسەبىنەن, 8 لاگەر اتا-انالاردىڭ قاراجاتىنان جانە 1 لاگەر كاسىپوداق اتىنان بولماق.
سالتانات كەنجەباي
