سەنات سپيكەرىنىڭ ساپارى قوجا احمەت ياساۋي كەسەنەسىنە زيارات ەتۋمەن باستالدى. ول جەردە سەناتورلار ساياسي قۋعىن-سۇرگىن جانە اشارشىلىق قۇرباندارىنىڭ رۋحىنا تاعزىم ەتىپ, دۇعا جاسادى.
ءوڭىردىڭ زيالى قاۋىمىمەن كەزدەسۋدە مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان ساياسي رەفورمالار تالقىلاندى. سونداي-اق جيىنعا قاتىسۋشىلار تاريحي سانانى جاڭعىرتۋ ماسەلەسىنە نازار اۋداردى. سەنات توراعاسى بۇل رەتتە سوڭعى جىلداردا بەلسەندى جۇرگىزىلىپ كەلە جاتقان اشارشىلىق تاقىرىبىن زەرتتەۋ جۇمىستارىنىڭ ماڭىزدى ەكەنىن, وسى باستامانى رەسپۋبليكالىق جانە وڭىرلىك دەڭگەيدە جالعاستىرۋ كەرەكتىگىن ايتتى.
«اشارشىلىق تاقىرىبىنا ارنالعان جۇمىستاردى ءارى قاراي جالعاستىرۋدىڭ ماڭىزى زور. بۇل ءبىرىنشى كەزەكتە, تاريحي سانامىزدى جاڭعىرتۋ ءۇشىن قاجەت. ال, تاريحي سانانى جاڭعىرتۋ دەگەنىمىز, تاۋەلسىزدىكتى نىعايتۋ, ەلدىكتى ەڭسەلى ەتۋ جانە ۇلتتىق قۇندىلىقتاردى دارىپتەۋ جولىنداعى نەگىزگى قادامداردىڭ ءبىرى», دەدى ماۋلەن اشىمباەۆ.
سونىمەن قاتار سەنات سپيكەرى ەل پرەزيدەنتىنىڭ باستاماسىمەن قولعا الىنعان ساياسي رەفورمالارعا توقتالدى. ول كونستيتۋتسياعا ەنگىزۋ ءۇشىن ۇسىنىلعان تۇزەتۋلەر مەن الداعى رەفەرەندۋم ەلىمىزدىڭ ساياسي جۇيەسىن عانا ەمەس, باسقا دا سالالاردى دامىتۋعا بەرىك نەگىز قالايتىنىن اتاپ ءوتتى.
«كونستيتۋتسيالىق رەفورما بيلىك مونوپولياسىن بولدىرماۋعا جانە ساياسي باسەكەنى دامىتۋعا جول اشادى. بۇل باستامالاردىڭ ءبارى قازاقستاندى دەموكراتيالىق, قۇقىقتىق, ادىلەتتى جانە الەۋمەتتىك مەملەكەت رەتىندە نىعايتۋعا باعىتتالعان. وسى جولداعى جۇمىستار كونستيتۋتسياعا وزگەرىستەر ەنگىزۋمەن توقتامايتىنى بەلگىلى. الداعى ۋاقىتتا دا ساياسي جۇيەمىزدى رەفورمالاۋ ءىسى جالعاسا بەرەدى», دەدى سەنات توراعاسى.
سونىمەن قاتار ماۋلەن اشىمباەۆ احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وقىتۋشى-پروفەسسورلار قۇرامىمەن جانە ستۋدەنتتەرىمەن كەزدەستى. ول ءىس-شارادا كونستيتۋتسيالىق رەفورمانىڭ نەگىزگى باعىتتارى تۋرالى ايتىپ, جاستاردىڭ سۇراقتارىنا جاۋاپ بەردى.
«قازىرگى تاڭدا ءبىلىم الۋ ومىرلىك پروتسەسكە اينالدى. بۇگىندە جاي عانا ساۋاتتى بولۋ جەتكىلىكسىز. ۋنيۆەرسيتەت قابىرعاسىندا باكالاۆر نەمەسە ماگيستر دارەجەسىن يەلەندىم دەپ تە توقمەيىلسۋگە بولمايدى. ءاردايىم ىزدەنىستە بولۋ قاجەت. ءوزىڭدى ۇزدىكسىز جەتىلدىرىپ وتىرۋ – جەتىستىكتىڭ نەگىزى», دەدى پالاتا سپيكەرى.
سونداي-اق سەنات توراعاسى كەنتاۋ ترانسفورماتور زاۋىتىنىڭ ۇجىمىمەن جانە وڭىردەگى ءبىر توپ الەۋمەتتىك كاسىپكەرمەن كەزدەسىپ, ساياسي رەفورمالاردىڭ ماڭىزىنا نازار اۋداردى. كەزدەسۋدە ايماقتاعى وزەكتى ماسەلەلەر, اتالعان سالاعا قاتىستى تۇيتكىلدەر دە جان-جاقتى تالقىلاندى. ماۋلەن اشىمباەۆ ايتىلعان پىكىرلەر مەن ۇسىنىستار ءتيىستى مەملەكەتتىك ورگاندار تاراپىنان پىسىقتالىپ, پارلامەنتتىڭ زاڭ شىعارۋ جۇمىسىندا ەسكەرىلەتىنىن جەتكىزدى.
