قاراعاندى قالاسىنىڭ پوليتسياسى مەن قارجى ۇيىمدارىنىڭ وزدەرىن قاۋىپسىزدىك قىزمەتىنىڭ قىزمەتكەرى رەتىندە تانىستىرعان ادامداردىڭ الاياقتىق ارەكەتتەرىنىڭ كۇشەيگەنى تۋرالى ەسكەرتۋلەرىنە قاراماستان, ءبىزدىڭ ازاماتتارىمىز بەلگىسىز ەسەپشوتتارعا قىرۋار قارجى اۋدارۋدى جالعاستىرىپ جاتىر.
6 مامىردا تەمىرتاۋ قالاسىنىڭ ەسكى قالالىق پوليتسيا بولىمىنە 38 جاستاعى تۇرعىنى ارىزدانعان. رەسپۋبليكا بانكتەرىنىڭ ءبىرىنىڭ «قىزمەتكەرى» ونىڭ تەلەفونىنا 13 كۇن بويى حابارلاسىپ, جيناق اقشاسىن ساقتايمىن دەگەن سوزىمەن 11 ميلليون تەڭگەگە جۋىق اقشانى يەمدەنىپ العان. جابىرلەنۋشى ءموبيلدى بانكينگ ارقىلى بەلگىسىز شوتقا اقشا اۋدارعان.
«الماتى قالاسىنىڭ كريمينالدىق پوليتسيا قىزمەتكەرلەرى ارنايى شارالار بارىسىندا وسى قىلمىستى جاسادى دەگەن كۇدىكپەن قاراعاندىنىڭ 31 جانە 27 جاستاعى ەكى تۇرعىنىن ۇستادى. جەدەل ىزدەستىرۋ ءىس-شارالارى كەزىندە ەر ادامداردان بىرنەشە بانكتىڭ تولەم كارتالارىن تاپتى. ولاردىڭ بىرەۋىنىڭ اتى-ءجونى بەلگىسىز جانە باسقا بىرەۋدىڭ جەكە كۋالىگى. سونىمەن بىرگە ۇستالعانداردىڭ تۇرعىلىقتى جەرى بويىنشا قاراعاندى قالاسىندا دا تەرگەۋ امالدارى جۇرگىزىلدى. وقيعا ورنىنان ولار بىرنەشە تولەم كارتاسىن تاپتى», دەيدى قاراعاندى وبلىسى پوليتسيا دەپارتامەنتى باستىعىنىڭ ورىنباسارى ءابىل ءابىلدين.
قاراعاندى وبلىسىنىڭ پد كيبەرقىلمىسقا قارسى كۇرەس باسقارماسىنىڭ قىزمەتكەرلەرى تۇراقتى نەگىزدە ازاماتتاردىڭ شوتتارىنان اقشا جىمقىرۋعا قاتىسى بار ادامداردى انىقتاۋ جۇمىستارىن جۇرگىزۋدە. وسىعان دەيىن قاراعاندى وبلىسىنىڭ پوليتسيا دەپارتامەنتىنىڭ قىزمەتكەرلەرى بانكتىڭ كۇزەت قىزمەتىمەن بىرلەسىپ, باسقا بانك كارتالارىن دا پايدالانىپ, جابىرلەنۋشىنىڭ نەسيە رەتىندە بەرگەن اقشاسىن الىپ كەتپەك بولعان ءبىر توپ ادامدى قۇرىقتاپ, پوليتسياعا وتكىزگەن بولاتىن.
تەرگەۋ بارىسىندا ۇستالعان ازاماتتان 9 ملن تەڭگەگە جۋىق اقشا مەن ءتۇرلى بانكتەردىڭ جەتى تولەم كارتاسى, ۇيالى تەلەفوندار, اقپارات تاسىمالداعىش (فلەشكا) جانە SIM-كارتالار, سونداي-اق ينتەرنەت-روۋتەرلەر الىندى. ولاردىڭ شىعىنى شامامەن 40 ملن تەڭگەنى قۇرايدى.
بارلىق فاكتىلەر بويىنشا قازاقستان رەسپۋبليكاسى قىلمىستىق كودەكسىنىڭ 190-بابىنىڭ 3-بولىگى (الاياقتىق) بويىنشا قىلمىستىق ءىس قوزعالىپ, سوتتىڭ سانكتسياسىمەن كۇدىكتىلەردىڭ بارلىعى قاماۋعا الىندى. پوليتسەيلەر ولاردىڭ قازاقستان اۋماعىندا وسىعان ۇقساس باسقا دا الاياقتىق فاكتىلەرىنە قاتىستىلىعىن تەكسەرىپ جاتىر. جالعان بانك قىزمەتكەرلەرىنىڭ مۇلكى الىنىپ, جەتى جىلعا دەيىن باس بوستاندىعىنان ايىرىلۋى مۇمكىن.
ايانا توعانبەك
