بيىل ۇزىندىعى 221 شاقىرىم بولاتىن 224 كوشەگە, ونىڭ ىشىندە 19 ماگيسترالدىق كوشەگە ورتاشا جوندەۋ جۇرگىزۋ جوسپارلانىپ وتىر. وعان قوسا قالاعا كەيىن قوسىلعان اقجار شاعىناۋدانىنا 48 شاقىرىم جاڭا جول سالۋ جوسپارلانىپ, قۇرىلىسى باستالىپ كەتتى.
الماتى قالالىق موبيلدىلىك باسقارماسىنىڭ باسشىسى عاني مىرزاحانوۆ قاناعاتتانارلىق دەرلىك جولداردىڭ كورسەتكىشىن 95%-عا دەيىن جەتكىزۋ ءۇشىن 2025 جىلعا دەيىن تاعى 234 شاقىرىم جاڭا جول سالۋ, كەمىندە 200 شاقىرىمداي جولدى جوندەۋ, 350 مىڭ شارشى مەتردەن استام اسفالتبەتون جابىنىنا جوندەۋ جۇرگىزىلەتىنىن مالىمدەدى. وعان قوسا العاباس, المەرەك جانە قايرات شاعىناۋداندارىندا جۇمىس جالعاسىپ جاتىر. قازىرگى ۋاقىتتا ورتاشا جوندەۋ جۇمىستارى 39 كوشەدە, ونىڭ ىشىندە 7 ماگيسترالدى كوشەدە, سونداي-اق تاستىبۇلاق, اقبۇلاق, وجەت, دۋمان, الاتاۋ (يافي) شاعىناۋداندارىندا جول سالۋ مەن جوندەۋ جۇرگىزىلۋدە. ورتاشا جوندەۋ جۇمىستارىن بيىلعى قىركۇيەك ايىنىڭ سوڭىنا دەيىن اياقتاۋ جوسپارلانعان.
سونداي-اق بۇقتىرما كوشەسى – قۇلجا تراكتىسى, سەيفۋللين داڭعىلى – جانسۇگىروۆ كوشەسى جانە ساين كوشەسى – موڭكە بي كوشەسى ءۇش جولايرىقتىڭ قۇرىلىسى جالعاسۋ ۇستىندە. بۇقتىرما كوشەسى – قۇلجا تراكتىسى جولايرىعىندا جۇمىستار كەستەگە سايكەس جۇرگىزىلۋدە. قالا مەن وبلىس اۋماعى بويىنشا ساتىپ الۋ تولىعىمەن اياقتالدى. ءبىرىنشى جارتىجىلدىقتىڭ سوڭىنا دەيىن قۇرىلىس-مونتاج جۇمىستارىن اياقتاۋ, سول ارقىلى كولىكتىڭ بارلىق باعىتتا ءجۇرۋىن قامتاماسىز ەتۋ جوسپارلانۋدا. اباتتاندىرۋمەن قوسا تولىق اياقتاۋ 2022 جىلدىڭ سوڭىنا دەيىن جوسپارلانىپ وتىر.
«سەيفۋللين داڭعىلى مەن جانسۇگىروۆ كوشەسىنىڭ قيىلىسىنا كەلەتىن بولساق, وندا دا ساتىپ الىنعان جول تەلىمدەرىندە جۇمىستار قولعا الىندى. دەگەنمەن جەتى ۋچاسكە ساتىپ الىنعان جوق. اتالعان ۋچاسكەلەر بويىنشا سوت راسىمدەرى جۇرگىزىلۋدە. قۇرىلىس-مونتاجداۋ جۇمىستارى وسى ۋچاسكەلەردى ساتىپ الۋ شاماسىنا قاراي ورىندالاتىن بولادى. جۇمىستاردى تولىق اياقتاۋ 2023 جىلعا جوسپارلانعان», دەدى قالالىق موبيلدىلىك باسقارماسىنىڭ باسشىسى
سونداي-اق ساين كوشەسى – موڭكە بي كوشەسى ايىرىعى جونىندەگى جوباعا تۇزەتۋ ەنگىزىلىپ وتىر. بيىل وسى جولايرىقتا كولىك قوزعالىسى باستالعانىمەن, قوسالقى جۇمىستارىن تولىق اياقتاۋ 2023 جىلعا جوسپارلانعان.
اباي داڭعىلىنان ءوتۋ بارىسىندا بيىل جەرۇستى جاياۋ جۇرگىنشىلەر وتكەلدەرىن ورناتۋ مەن اباتتاندىرۋدى اياقتاۋ جوسپارلانعان. سونىمەن قاتار الماتى وبلىسىنىڭ اكىمدىگىمەن بىرلەسىپ اباي داڭعىلىن ءۇاااج-عا دەيىن ۇزارتۋ جۇمىستارى باستالادى.
ساين كوشەسىنىڭ رىسقۇلوۆ داڭعىلىنان موڭكە بي كوشەسىنە دەيىنگى ارالىعى 3,2 شاقىرىمدى قۇرايدى, ۇزىندىعى 1,6 شاقىرىم ۋچاسكەنىڭ دايىندىعى – 70%. باسقا ۋچاسكەدە 67 جەر تەلىمىن ساتىپ الۋ قاجەت بولسا, ونىڭ 54-ءى ساتىپ الىندى, قالعان 13 ۋچاسكە بويىنشا جۇمىس جالعاسىپ جاتىر. قازىرگى ۋاقىتتا ساتىپ الىنعان ۋچاسكەلەردى بۇزۋ مەن ماتەريالداردى دايىنداۋ جۇمىستارى جۇرگىزىلۋدە. بۇل جۇمىس تا بيىلعى التى ايدا اتقارىلۋعا ءتيىس.
دەگەنمەن اۋەزوۆ كوشەسىن گوگول كوشەسىنەن باستاپ سولتۇستىك باعىتتا گوگول كوشەسىنىڭ قيىلىسىندا جول توسەمى مەن جابىننىڭ تومەنگى قاباتىن ءبىتىرۋ, ينجەنەرلىك جەلىلەردى قايتا ورناتۋ, باعدارشام سالۋ جۇمىستارى ورىندالدى.
ع.مىرزاحانوۆ ياساۋي كوشەسىنەن قالا شەكاراسىنا دەيىن باتىس باعىتتا ۇزىندىعى 4,5 شاقىرىم بولاتىن تولە بي كوشەسىنىڭ دە قۇرىلىسى باستالعانىن حابارلادى. وبەكتىنىڭ قۇرىلىسىنا بولىنگەن شەكاراعا 270 مەنشىك يەسىنىڭ جىلجىمايتىن مۇلكى تۇسەدى, ونىڭ ىشىندە 29 وبەكتى ساتىپ الىندى, قالعان 241 ۋچاسكە بويىنشا جۇمىس جۇرگىزىلىپ وتىر.
وعان قوسا بيىل الاتاۋ داڭعىلىنان «الما سيتي» تۇك-كە دەيىن جول جۇمىستارىن ءبىتىرۋ, ينجەنەرلىك جەلىلەردى قايتا ورناتۋ جۇمىستارى دا اياقتالۋى كەرەك. تولىق اياقتاۋ جەر ۋچاسكەلەرىن ساتىپ الۋ 2023-2024 جىلدارعا جوسپارلانعان.
الماتى
