ونىڭ نەگىزگى مىندەتى – دارىگەرلەردىڭ, ناۋقاستاردىڭ جانە حالىقتىڭ وسى اۋرۋلار تۋرالى اقپاراتتاندىرىلۋىن ارتتىرۋ, اللەرگيا مەن دەمىكپەگە بايلانىستى ماسەلەلەردى شەشۋگە قوعامنىڭ نازارىن اۋدارۋ جانە پاتسيەنتتەرگە كورسەتىلەتىن مەديتسينالىق كومەكتىڭ ساپاسىن ارتتىرۋ.
اللەرگيا مەن دەمىكپە دۇنيە جۇزىندە ەڭ كەڭ تارالعان اۋرۋلاردىڭ ءبىرى. برونح دەمىكپەسى تىنىس الۋ جولدارىنىڭ اۋرۋلارىنا اكەلەتىندىگى بەلگىلى. الايدا دەمىكپەنىڭ سەبەبى اللەرگيا دا بولۋى مۇمكىن. بۇگىن ءبىز برونح دەمىكپەسى تۋرالى ايتپاقپىز.
ستاتيستيكا بويىنشا ەرەسەك تۇرعىنداردىڭ 5%-دان استامى جانە بالالاردىڭ 10%-ى وسى اۋرۋعا شالدىققان. برونح دەمىكپەسى – ءارتۇرلى ىشكى جانە سىرتقى قورشاعان ورتا فاكتورلارىنىڭ برونحىلاردىڭ تارىلۋىنا ىقپال ەتەتىن تىنىس الۋ جولدارىنىڭ اۋىر سوزىلمالى قابىنۋ اۋرۋى. برونح دەمىكپەسىنە ءتان سيمپتومدار: ەنتىگۋ, جوتەل, كەۋدەدە سىرىل مەن اۋىرلىق سەزىمىنىڭ بولۋى. برونحىلاردىڭ قاتتى تارىلعان جاعدايىندا تۇنشىعۋ ۇستاماسى پايدا بولادى.
- الدىن الۋ شارالارى ۋاقتىلى جانە دۇرىس جوسپارلانعان جاعدايدا دەمىكپەنى بولدىرماۋعا بولادى. دەمىكپەنىڭ الدىن الۋدىڭ نەگىزگى باعىتى – اللەرگيا مەن تىنىس الۋ جولدارىنىڭ سوزىلمالى اۋرۋلارىنىڭ الدىن الۋ بولىپ تابىلادى. تەمەكى ءتۇتىنى نەمەسە تىتىركەندىرگىش حيميالىق زاتتارمەن بايلانىستا بولاتىن بالالار اللەرگياعا ءجيى شالدىعادى جانە برونح دەمىكپەسىمەن ءجيى اۋىرادى. ەڭ كەڭ تارالعان اللەرگەندەر: ۇيدەگى شاڭ, تاراقاندار, كىشكەنتاي كەنەلەر, ءۇي جانۋارلارىنىڭ ءجۇنى, زەڭ, تاماقتىڭ كەي تۇرلەرى, وسىمدىك توزاڭى, - دەيدى كارديولوگيا جانە ىشكى اۋرۋلار عزي رەسپۋبليكالىق اللەرگولوگيالىق ورتالىعى باسشىسىنىڭ م.ا., اللەرگولوگ يممۋنولوگ دارىگەر اراي باتىرباەۆا.
اراي جاناتقىزىىڭ ايتۋىنشا, برونح دەمىكپەسىن الدىن الۋ بويىنشا دۇرىس جوسپارلانعان جانە جۇزەگە اسىرىلىپ جاتقان شارالار بۇل اۋرۋدىڭ الدىن الۋ جانە ەمدەۋدىڭ ءتيىمدى ءتاسىلى.
زاماناۋي مەديتسينالىق تاجىريبە دەمىكپەنىڭ الدىن الۋ ءىس-شارالارىن دۇرىس ورىنداۋ كوبىنە اۋرۋدى ەمدەۋگە نەمەسە پاتسيەنتتىڭ دەمىكپەگە قارسى ءدارى-دارمەكتەردى پايدالانۋىن ازايتۋعا جەتكىلىكتى ەكەندىگىن كورسەتتى. دياگنوستيكالاۋ مەن ەمدەۋدىڭ زاماناۋي ادىستەرىنىڭ ارقاسىندا اۋرۋدى باقىلاۋعا بولادى.
دۇرىس ەمدەۋ جۇرگىزگەن جاعدايدا دەمىكپەمەن اۋىراتىنداردىڭ كوبى دەمىكپەنى باقىلاپ وتىرۋعا, ونىڭ سيمپتومدارىنان ارىلۋعا, ۇستامالاردىڭ سيرەك بولۋىنا نەمەسە ءتىپتى ولاردىڭ مۇلدەم بولماۋىنا, ارنايى ءدارى-دارمەكتەردى سيرەك پايدالانۋعا قول جەتكىزۋىنە بولادى. وسىلاردىڭ بارلىعى تولىققاندى ءومىر سۇرۋگە جانە سيمپتومدار مەن اسقىنۋلاردى ۇمىتۋعا مۇمكىندىك بەرەدى.
ارۋجان امانگەلدى
