دەمەك eGov پورتالىنىڭ پايدالانۋشىسى وزىنە, سونداي-اق وتباسىنىڭ بارلىق مۇشەسىنە اتالعان قىزمەتكە ونلاين تاپسىرىس بەرە الادى. قىزمەت جەكە تۇلعالارعا تەگىن كورسەتىلەدى. پايدالانۋشىلارعا قويىلاتىن مىندەتتى تالاپتار – جەكە سايكەستەندىرۋ ءنومىرى (جسن) مەن ەلەكتروندى تسيفرلى قولتاڭبانىڭ (ەتسق) بولۋى.
بۇل جاڭاشىلدىق مەملەكەت باسشىسىنىڭ بيۋروكراتيادان ارىلتۋ جونىندەگى جارلىعى اياسىندا جۇزەگە اسىرىلدى. مۇنداعى كوزدەلگەن مەجە – تسيفرلى ترانسفورماتسيا ارقىلى مەملەكەتتىك باسقارۋدىڭ بارلىق سالاسىنا جۇيەلى رەينجينيرينگ جۇرگىزۋ.
«مەملەكەتتىك قىزمەتتەردى ونلاين فورماتقا كوشىرۋ بويىنشا بەلسەندى جۇمىس ىستەپ جاتىرمىز. بۇرىن اتالعان قىزمەت حقو مەن جەرگىلىكتى اتقارۋشى ورگاندار ارقىلى وففلاين تۇرىندە كورسەتىلىپ كەلگەن. ەندى حقو-عا بارماي-اق, قىزمەتتى ەلەكتروندى ۇكىمەت پورتالى (eGov.kz) ارقىلى ونلاين الۋعا بولادى. بۇل قىزمەتتىڭ ازاماتتار ءۇشىن ماڭىزدىلىعىن ءتۇسىنىپ, قىزمەتتى الۋ پروتسەسىن جەڭىلدەتتىك», دەدى «ۇلتتىق اقپاراتتىق تەحنولوگيالار» اق باسقارما توراعاسى روستيسلاۆ كونياشكين.
قىزمەتتى قولدانۋ ءۇشىن ەلەكتروندى ۇكىمەت پورتالىن پايدالاناتىن كەز كەلگەن ازامات قاجەتتى قىزمەت ءتۇرىن (قانداس مارتەبەسىن بەرۋ نەمەسە ۇزارتۋ) تاڭدايدى. تاڭدالعان قىزمەت تۇرىنە سايكەس مارتەبەنى الۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەسى ارقىلى تەكسەرۋ جۇزەگە اسىرىلادى.
بارلىق مىندەتتى جولدى تولتىرىپ, سۇراستىرىلعان قۇجاتتاردى قوسا تىركەۋ قاجەت (فايلدار pdf نەمەسە jpg فورماتىندا).
سونداي-اق ءوتىنىم بەرگەن كەزدە پايدالانۋشى قانداس مارتەبەسىن بەرۋگە نەمەسە ۇزارتۋعا بايلانىستى قاجەتتىلىكتى وتباسى مۇشەلەرىنە قاتىستى مالىمەتتەردى دە تولتىرا الادى. وتباسى مۇشەلەرىنىڭ سانىنا شەكتەۋ جوق.
قىزمەت كورسەتۋدىڭ ناتيجەسى – قانداس كۋالىگى, جەرگىلىكتى اتقارۋشى ورگاننىڭ قانداس مارتەبەسىن ۇزارتۋ تۋرالى شەشىمى نەمەسە ەلەكتروندى قۇجات نىسانىندا پايدالانۋشىنىڭ «جەكە كابينەتىنە» جىبەرىلگەن مەملەكەتتىك قىزمەت كورسەتۋدەن دالەلدى باس تارتۋدان بايقالۋ كەرەك. مەملەكەتتىك قىزمەتتى كورسەتۋ مەرزىمى – جۇمىس اپتاسىنىڭ 4 كۇنى.
اتالعان قىزمەت ەلىمىزدىڭ باس قالاسى, الماتى جانە شىمكەنت قالاسى مەن وبلىستىق ماڭىزى بار قالالاردىڭ حقو-لارى مەن جەرگىلىكتى اتقارۋشى ورگانداردا قولجەتىمدى.
