قوعام • 27 مامىر، 2022

ەرلان قارين الماتىداعى كونتسەرتتە ورىن العان كەلەڭسىز جايتقا قاتىستى پىكىر ءبىلدىردى

68 رەت كورسەتىلدى

مەملەكەتتىك حاتشى ەرلان قارين الماتىداعى كونتسەرتتە ورىن العان كەلەڭسىز جايتتى ايىپتادى، دەپ حابارلايدى Egemen.kz.



«الماتى قالاسىنداعى كونتسەرت كەزىندە بولعان وقيعا قازىر قوعامدا قىزۋ تالقىلانىپ جاتىر. ءبىزدىڭ بىلۋىمىزشە، كونتسەرتتى «NS group» جشس ۇيىمداستىرعان. Shiza لاقاپ اتىن يەلەنگەن ازاماتتىڭ مەملەكەتتىك تۋعا قاتىستى ارەكەتى ءجىتى تەكسەرىلىپ، وقيعانىڭ ءمان-جايى انىقتالۋى قاجەت. كونتسەرتتە ىشىمدىك ىشىلگەندىكتەن مۇنداي ارەكەتكە جول بەرىلگەن دەپ ويلايمىن. جاستار وسى ءبىر كەلەڭسىز وقيعادان ساباق الىپ، قاراپايىم مادەنيەت پەن ەتيكەتتى مەڭگەرۋى قاجەت»، دەپ جازدى ەرلان قارين Facebook-پاراقشاسىندا.

ونىڭ اتاپ وتۋىنشە، مۇنداي اۋقىمدى ءىس-شارالاردى ۇيىمداستىرۋشىلار دا جاۋاپكەرشىلىكتى سەزىنۋى كەرەك. ولار كونتسەرت ۇيىمداستىرعان كەزدە ىشىمدىكتىڭ ىشىلۋىنە جول بەرمەۋگە، باسقا دا وقىس وقيعالاردىڭ الدىن الۋعا ءتيىس.

ء«بىز مەملەكەتتىلىگىمىزدىڭ، تاۋەلسىزدىگىمىزدىڭ سيمۆولى سانالاتىن مەملەكەتتىك تۋعا زور قۇرمەتپەن قاراۋىمىز قاجەت. ونى اياقاستى ەتۋگە جول بەرمەۋىمىز كەرەك. تۋىمىزدى نەمەسە باسقا دا رامىزدەرىمىزدى قورلاعان ارەكەتتەر قۇقىقتىق-نورماتيۆتىك اكتىلەرگە سايكەس جاۋاپكەرشىلىككە تارتىلادى. ويتكەنى زاڭ بارشاعا ورتاق. ەلىمىزدىڭ ءاربىر ازاماتى مەملەكەتتىك تۋدى قۇرمەتتەپ، قاستەر تۇتۋى قاجەت دەپ سانايمىن»، دەدى مەملەكەتتىك حاتشى.

ايتا كەتەيىك، بۇگىن الەۋمەتتىك جەلىلەردە الماتىداعى بالۋان شولاق اتىنداعى سپورت سارايىندا وتكەن «يرينا كايراتوۆنا» توبىنىڭ كونتسەرتىنەن ۆيدەوۇزىندى جاريالاندى. وندا ساحنا تورىندە تۇرعان جاس انشىلەردىڭ ءبىرىنىڭ مەملەكەتتىك تۋدى لاقتىرماق بولعانىن كورۋگە بولادى. 



 

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار