بيىل 3,6 ملن وقۋشى وقۋ جىلىن اياقتادى. ال 171 مىڭنان اسا تۇلەك ءۇشىن سوڭعى قوڭىراۋ سوعىلدى. ەندى تۇلەكتەردىڭ مەكتەپتەگى قورىتىندى ەمتيحاندارى, ودان كەيىن ۇبت سىناعى باستالادى. پاندەميا مەن بىلىمدەگى ولقىلىقتاردىڭ سالدارىن جويۋ ءۇشىن جازعى مەكتەپتەر ۇيىمداستىرىلادى.
«وزات وقۋشىلارىمىز بۇگىندە بەرگەن ءبىلىمىمىزدى, ەلىمىزدى حالىقارالىق ارەنادا لايىقتى تانىتىپ ءجۇر. مىسالى, مەنىڭ جانىمدا كۇنى كەشە عانا فرانتسيادان ورالعان دۇنيەجۇزىلىك گيمنازيادانىڭ ءۇش جەڭىمپازى تۇر. ولار وسى مەكتەپتە وقيدى. ال ەندى تۇلەكتەر ءومىردىڭ جاڭا كەزەڭىن باستاعالى تۇر. مەكتەپتى بىتىرسەڭىز دە, وقۋ مەن ىزدەنىس جولىندا ەشقاشان توقتاماۋ كەرەك. ءبىلىم – ەشقاشان قۇنىن جوعالتپايتىن, قۇنسىزدانۋدان قورىقپايتىن بايلىق. الدا ەمتيحاندار بار. ۇبت ەرەسەك ومىردەگى ەڭ وڭاي ەمتيحان ەكەنىن بىلسەڭىزدەر ەكەن. بۇل ءۇشىن ءبىز بيىلعى تۇلەكتەرگە بىرقاتار جەڭىلدىك جاسادىق. ەندى سىزدەر ۇبت-نى ەكى رەت تاپسىرىپ, گرانتقا ۇمىتكەر بولا الاسىزدار. بيىل پرەزيدەنتتىڭ قولداۋىمەن گرانتتار سانىن كوبەيتىپ وتىرمىز. اتاپ ايتقاندا, ۋنيۆەرسيتەتتەردە وقۋعا 73 مىڭعا دەيىن جانە كوللەدجدەردە وقۋعا 128 مىڭعا دەيىن گرانت بولدىك. جالپى العاندا مەملەكەت سىزدەر بولاشاققا سەنىممەن قاراۋ ءۇشىن ءتيىستى شارالار قابىلداپ جاتىر», دەدى ەلورداداعى №75 مەكتەپ-گيمنازياعا بارعان ءبىلىم جانە عىلىم ءمينيسترى اسحات ايماعامبەتوۆ.
