بالتىر باتىرماعان باسسەيندەر نەمەسە كوزبوياۋشىلىقتى قويار كەز جەتتى

2021 جىلدىڭ 6 شىلدەسى. «ەلوردا كۇنىنە وراي ءۇرجار اۋدانىندا زاماناۋي ۇلگىدە باسسەين اشىلدى» دەپ الاقايلادىق. اۋىلدىڭ قۋانىشىن جارىسا جاريالادىق. باسسەين عيما­را­تىنىڭ كىرەبەرىسىنە قىزىلدى-جا­سىلدى شار بايلانىپ، رەسمي تۇردە اشىلۋ سال­تاناتى جاسالدى. اسىرەسە جاسوسپىرىمدەردىڭ قۋانىشىندا شەك بولماعان. قىسى-جازى سۋدا جۇزەمىز دەپ قۋاندى. بەكەر ەكەن. باسسەينگە شو­مىلعاندى قويىپ، اياق مالعان بىرەۋ بولمادى.

جىل ءوتىپ، اۋدان تۇرعىندارى نارا­زىلىق بىلدىرگەن سوڭ، ءىستىڭ ءمان-جا­يىن بىلمەك نيەتتە ءۇرجار اۋداندىق ساۋ­لەت، قالا قۇرىلىسى جانە قۇرىلىس ءبولىمىنىڭ باسشىسى بولات تورسىقباەۆ­قا حابارلاسقانبىز. ونىڭ ايتۋىنشا، باسسەيننىڭ تاپسىرىس بەرۋشىسى ءۇرجار اۋدانىنىڭ ساۋلەت، قالا قۇرىلىسى جانە قۇرىلىس ءبولىمى ەكەن. الايدا كىم قابىلداپ الدى، قالاي قابىلداپ الدى، بىزگە تۇسىنىكسىز.

– باسسەيندى وبلىستىق سپورت باسقار­ما­سى بالانسقا ءالى قابىلداعان جوق. مەملەكەت­تىك ساۋلەت-قۇرىلىس باقىلاۋ باسقارماسى وكىل­دەرى كەلىپ، بىرقاتار ولقىلىقتى ايتىپ كەتكەن. مەردىگەرلەر قايتا جاساپ جاتىر. وزگەرىس بولىپ جاتسا، حابارلايمىز، – دەيدى ءۇرجار اۋداندىق ساۋلەت، قالا قۇرىلىسى جانە قۇرىلىس ءبولىمىنىڭ باسشىسى بولات تورسىقباەۆ.

ايتىپ وتكەندەي، اۋەلدە باسسەين اشىلا سالا وبلىستىق دەنە شىنىقتىرۋ جانە سپورت باسقارماسى تەڭگەرىمىنە الۋى كەرەك بولعان. بىراق قۇرىلىستان اقاۋ شىققان سوڭ ولار قابىلداۋدى كەيىنگە قالدىرعان. الدىمەن اتالعان نىسانعا تەكسەرۋ جۇرگىزۋ كەرەگىن ايتىپ، وبلىستىق ساۋلەت-قۇرىلىس باقىلاۋ باسقارماسىنا حات جولداپتى. مامان­دار تەكسەرە كەلە لاۋازىمدى تۇلعالار­عا قاتىستى اقبتك-ءنىڭ 318-بابى بو­يىنشا اكىمشىلىك ءىس قوزعاپ، انىقتال­عان اقاۋلاردى جويۋدى تاپسىرعان. سونى­مەن قاتار جاتتىعۋ كەزىندە قاۋىپسىز­دىك ەرەجەلەرىن ساقتاۋدىڭ ماڭىزدى ءرو­لىن ەسكەرە وتىرىپ، قۇزىرەتتى ورگاندار ۇسىنعان بارلىق بۇزۋشىلىقتاردى تولىق جويعانعا دەيىن باسسەين جۇمىس ىستەي المايتىنىن ايتادى سالا ما­ماندارى. ال ونىڭ قاشان جويىلاتىنى تاعى بەيمالىم.

ءدال وسىنداي ماسەلە كۇرشىم اۋدا­نىن­دا دا بار. 2021 جىلدىڭ قاڭتارىندا كۇرشىمدە «اۋىل – ەل بەسىگى» باعدار­لاماسى اياسىندا جابىق ءجۇزۋ باسسەينى اشىلدى دەپ جار سال­عانبىز. ءيا، مۇندا دا كادىمگىدەي اقساقالدار اق تىلەكتەرىن ايتىپ، لەنتاسىن قيعان. سول كەزدەگى سپورت ءبولىمىنىڭ باسشىسى باسسەيندە ءجۇزۋ كەستەسى جاسالاتىنىنا دەيىن حابارلاپ، ەلدى سەندىرگەن. «باقسام، باقا ەكەن» دەمەكشى، كۇرشىمدىكتەردىڭ دە قۋانىشى الىسقا بارمادى.

– كۇرشىمنىڭ ماڭايىنداعى سۋدىڭ ءبارى قاۋىپتى. جازدىگۇنى بالالاردىڭ شومىلۋى ءۇشىن بىردە-ءبىر ارنايى ورىن جاساقتالماعان. قانشاما ادام سۋعا كەتىپ جاتىر. بىلتىر بالالار باسسەيندە سۋعا ءجۇزۋدى ۇيرەنەدى عوي دەپ ءماز بولىپ جۇرگەنبىز. وكىنىشكە قاراي، سۋى جوق باسسەيننىڭ لەنتاسىن قيىپ، اشىلۋ ءراسىمىن سالتاناتتى تۇردە دۇركىرەتىپ وت­كىزدى. كوزبوياۋشىلىقتى قاشان قويار ەكەنبىز؟! ەندى مىنە، سىبايلاس جەم­قور­لىقتىڭ قۇرمەتىنە قويىلعان ەسكەرت­كىشتەي باسسەينىمىز قاڭى­راپ تۇر، – دەيدى اۋدان تۇرعىنى مەرۋەرت ەركىنقىزى.

جاسىرىپ قايتەمىز؟! قانداي دا ءبىر نىسان اشىلىپ الىپ، جۇمىس ىستەمەي تۇرسا، ءيا بولماسا، ساپاسى سىن كوتەرمەي جاتسا، قوعام ءبىراۋىزدان «اقشاسىن جەپ قويىپتى» دەگەن پىكىردى ۇستانادى. كىم ءبىلسىن؟! قولدا ايعاق بولماعان سوڭ، ءدوپ باسىپ جازا دا المايمىز. دەيتۇرعانمەن، ءشوپتىڭ باسى جەل تۇرماسا قيمىلداي ما؟

كۇرشىم اۋدانى اكىمىنىڭ ورىنباسارى ەرلان شوراياقوۆتىڭ ايتۋىن­شا، جابىق باس­سەين عيماراتىنىڭ قۇ­رىلىسىن «سك-Kaz­Alem» جشس قۇرى­لىس كومپانياسى جۇرگىزگەن ەكەن. بۇل ءۇشىن قازىنادان 450 ملن تەڭگە قار­جى بولىنگەن. قازىرگى ۋاقىتتا قۇزىرلى ورگاندار تەكسەرۋ جۇرگىزىپ جاتقان كورىنەدى. قالاي دەگەنمەن، شىعىس قازاقستاننىڭ قۇرىلىس سالاسىندا سال­عىرتتىق باسىم. مەيلى ءۇي قۇرىلىسى بولسىن، جول سالۋ نەمەسە سۋ تارتۋ بولسىن، پروبلەماسىز اياقتالمايدى. ءتيىستى قارجى بولىنگەنىمەن، ساپا دا جوق.

ال ءۇرجار مەن كۇرشىمدەگى باسسەين قۇرى­لىسىنان كەتكەن ولقىلىقتار كاتونقاراعاي اۋدا­نىنىڭ باسشىلارىنا ساباق بولسىن دەيمىز. ايتا كەتەيىك، كاتونقاراعاي اۋىلىندا دا جابىق باسسەين قۇرىلىسى جۇرگىزىلىپ جاتىر. قازىردەن باستاپ جاۋاپكەرشىلىكپەن قاراماسا، ەرتەڭ ءۇرجار مەن كۇرشىمنىڭ كەبىن كيىپ جۇرمەسىنە كىم كەپىل؟!

شىعىس قازاقستان وبلىسى