وڭىردە ءتۇرلى وليمپيادالىق ويىندار, ونەر جارىسى مەن زياتكەرلىك كەزدەسۋلەر وتۋدە. سونداي-اق اۋليەاتا ءوڭىرىنىڭ ىشكى تۋريستىك الەۋەتىن دامىتۋ ءارى ءتيىمدى جوبالاردى جۇزەگە اسىرۋ ماقساتىندا وبلىستىق تۋريزم باسقارماسى تاراز قالاسىنىڭ تۇرعىندارى مەن قوناقتارىنا ارنالعان ەكسكۋرسيالىق تۋر ۇيىمداستىردى. ەندى تۋر اياسىندا تارازدىقتار ءتورت اي بويى كونە شاھاردىڭ تاريحي-مادەني وشاقتارىنا ساياحات جاسايدى. ولار ەكى مىڭ جىلدان استام تاريحى بار تاراز قالاسىنىڭ كورنەكتى جەرلەرىنە بارادى.
تاراز قالاسىنىڭ وزىندە تاريحي-مادەني ەسكەرتكىشتەر مەن كيەلى ورىندار جەتكىلىكتى. بۇل ورايدا وڭىرگە كەلۋشى تۋريستەر دە كونە شاھاردىڭ تاريحىنا ەرەكشە قىزىعۋشىلىق تانىتۋدا. ال اتالعان ءىس-شاراعا ارنايى ەكسكۋرسيالىق اۆتوبۋس ۇيىمداستىرىلىپ, كەلۋشىلەر قالاداعى «كونە تاراز» تاريحي-ارحەولوگيالىق ساياباعى, «قاراحان», «داۋىتبەك», «ايشا ءبيبى», «بابادجا حاتۋن» كەسەنەلەرى, ەرتە يسلام داۋىرىندەگى جەراستى مەشىتى, «تەكتۇرماس» ەتنوتاريحي كەشەنى جانە «قازاق حاندىعى» مونۋمەنتى سياقتى تاريحي-مادەني ورىندارعا ساياحات جاساۋدا. بۇل ساياحاتتان مۇمكىندىگى شەكتەۋلى جانە اتا-اناسىنىڭ قامقورلىعىنسىز قالعان بالالار دا تىس قالمادى. ولاردىڭ قالانى ەركىن ارالاۋىنا ەرىكتىلەر دە كومەك كورسەتۋدە. سونداي-اق ەكسكۋرسيا اياسىندا تۋريزم سالاسىندا ەڭبەك ەتىپ جۇرگەن ماماندار مەن بالالار اراسىندا اشىق ديالوگ ءوربىدى. ماماندار بالالارعا تاراز جەرىندەگى تاريحي قۇندىلىقتار جونىندە تولىق مالىمەت بەرىپ, سان عاسىرلار بويى جاساپ كەلە جاتقان تاريحي قۇندىلىقتاردى قاستەرلەۋ ءار ازاماتتىڭ بورىشى ەكەنىن جەتكىزدى. الداعى ۋاقىتتا دا وڭىردەگى بالالار ءۇشىن مۇنداي ءىس-شارالار جالعاسىن تابادى.
جامبىل وبلىسى
