قولىنا اتتەستات العاننان كەيىن انەل ءجۇنىسوۆا وڭتۇستىك كورەياداعى Ulsan National Institute of Science and Technology دەپ اتالاتىن وقۋ ورنىنا ءتۇسىپ, «بيومەديتسينالىق ينجەنەريا» جانە «بيزنەس-اكىمشىلىك» ماماندىقتارى بويىنشا قوس ديپلوم باعدارلاماسىن تاڭدادى.
ۋنيۆەرسيتەتتە جۇرگەنىندە ول عىلىم مەن قوعامدىق جۇمىستى ۇشتاستىرىپ, بەلسەندىلىگىمەن كوزگە ءتۇستى. اتاپ ايتقاندا, انەل ەكى جىل بويى 50 ۇلت وكىلىنەن تۇراتىن UNIST حالىقارالىق ستۋدەنتتەر ۇيىمىنىڭ پرەزيدەنتى بولدى. بۇعان قوسا ول NIS Alumni-ءدىڭ وڭتۇستىك كورەياداعى فيليالىن قۇردى. ونىڭ باعدارلاماسى بويىنشا جەرگىلىكتى جوعارى وقۋ ورىندارىنا تۇسۋگە 600-دەن استام تالاپكەر ءۇشىن تەگىن تالىمگەرلىكتى قامتاماسىز ەتۋگە جانە ءتۇرلى ءىس-شارالاردىڭ كومەگىمەن قازاقستاننان وڭتۇستىك كورەياعا كەلگەن ستۋدەنتتەردى بىرىكتىرۋگە قارجى ءبولىندى.
مۇنىڭ ءوزى انەل جۇنىسوۆاعا سينگاپۋر ۇلتتىق ۋنيۆەرسيتەتى جانىنداعى اۋرۋحانانىڭ ءبىر بولىگى سانالاتىن سينگاپۋر كلينيكالىق زەرتتەۋلەر ينستيتۋتىندا اقىلى تاعىلىمدامادان وتۋگە جول اشىپ, ول جارتى جىلعا كورەيادان وسى ەلگە كوشىپ باردى.
انەل ءوزىنىڭ وسىنداي شەشىم قابىلداعانىنا قۋانىشتى ەكەنىن ايتادى. ويتكەنى ءدال وسى جەردە پەدياتريالىق نەۆرولوگيا بولىمىندە ءوزى ارمانداعان باعىتىمەن قاۋىشا الدى.
– مەن 3-7 جاس ارالىعىنداعى بالالاردا اۋتيستىك بۇزىلىستىڭ دامۋى مەن پايدا بولۋىن زەرتتەۋ بويىنشا ءوزىمنىڭ زەرتتەۋ جوبامدى قارجىلاندىرۋ كوزىنە قول جەتكىزە الدىم. زەرتتەۋىم مرت سۋرەتتەرىن, گەنەتيكالىق بيوماركەرلەردى جانە بالالاردىڭ جالپى پسيحياتريالىق جاعدايىن تالداۋدىڭ پانارالىق ينتەگراتسياسىنا نەگىزدەلگەن, – دەيدى جاس عالىم.
گارۆاردتا انەل ەستە ساقتاۋ, التسگەيمەر, كلينيكالىق دەپرەسسيا پروتسەستەرىن جانە ءاۋتيزمدى زەرتتەمەكشى. ناقتىراق ايتقاندا, ول ميدى زەرتتەۋدەگى ىرگەلى كىتاپتاردىڭ, نۇسقاۋلىقتاردىڭ جانە باعدارلامالىق جاساقتامانىڭ اۆتورلارىمەن بىرىگىپ جۇمىس ىستەي وتىرىپ, ءوزىنىڭ جوبالارىن دامىتۋدى جالعاستىرادى.
قاراعاندى وبلىسى
