جۇكتى ايەلدىڭ ومىرتقا جارىعىن الدى
№7 قالالىق كلينيكالىق اۋرۋحاناسىنىڭ نەيروحيرۋرگتەرى جۇكتى ايەلگە ومىرتقاارالىق شەمىرشەك جارىعىن الىپ تاستاۋ وپەراتسياسىن ءساتتى اتقاردى.
ايگەرىم كوپتىلەۋوۆا اياعى اۋىرلاعانىنا 24-25 اپتا بولىپ قالعاندا الماتى قالاسىنىڭ №7 كلينيكالىق اۋرۋحاناسىنىڭ قابىلداۋ بولىمشەسىنە, ومىرتقانىڭ بەل-سەگىزكوز اۋماعىنىڭ وڭ اياققا جاڭعىرىپ بەرىلگەن اۋرۋىمەن جەتكىزىلىپ, شۇعىل نەۆرولوگيا بولىمىنە جاتقىزىلادى. نەۆرولوگيا بولىمشەسىندە پاتسيەنت كونسەرۆاتيۆتى ەم قابىلداعانىمەن, ناتيجەسى بولماعان. مرت اپپاراتىندا تەكسەرگەن كەزدە سەكۆەسترلەنگەن ومىرتقاارالىق ديسك جارىعى انىقتالدى. پاتسيەنتتى 7 قكا باس دارىگەرىنىڭ ورىنباسارى, س.اسفەندياروۆ اتىنداعى قازۇمۋ نەيروحيرۋرگيا كافەدراسىنىڭ پروفەسسورى مارات اليەۆ قارايدى. وڭ اياعىنىڭ قاتتى اۋىرعانىن انالگەتيك دارىلەر دە باسا المايدى. وسى وڭ اياعىن باسا, سۇيەنە الماعانى, جامباس بولىكتىڭ قىزمەتىنىڭ بۇزىلا باستاعانى ەسكەرىلە وتىرىپ, وپەراتسيا الدىنداعى دايىندىقتان كەيىن شۇعىل تۇردە حيرۋرگيالىق وپەراتسيا جاساۋ تۋرالى شەشىم قابىلدانعان.
№7 قكا-نىڭ №1 نەيروحيرۋرگيالىق بولىمشەسىنىڭ مەڭگەرۋشىسى باقىت اعلاقوۆتىڭ ايتۋىنشا, پاتسيەنتكە وڭ جاق L5-S1 ديسك جارىعىن, جۇكتىلىكتىڭ ۇلعايىپ, ىشپەن جاتقىزۋ مۇمكىن ەمەستىگىنە بايلانىستى بۇيىردەن ەندوتراحەالدى ناركوزبەن جولارالىق الىپ تاستاۋ وپەراتسياسى جاسالعان.
وسىلايشا, مارات اليەۆ, اسسيستەنت ۆيكتور كاراۆاەۆ, انەستەزيولوگ عالىمجان مارس سىندى التىن قولدى دارىگەرلەر اياعى اۋىر ايەلدىڭ ومىرتقاارالىق ديسك جارىعىن الىپ تاستاۋ وپەراتسياسىن جوعارى كاسىبي دەڭگەيدە جاسادى. «قازىرگى ۋاقىتتا پاتسيەنتتىڭ جاعدايى جاقسى, جۇكتىلىگى قالىپتى وتۋدە, مەرزىمگە سايكەس كەلەدى. ول اياعىنان تۇردى, وزدىگىنەن جۇرەدى, وڭ اياعىنداعى اۋىرسىنۋ بەلگىلەرى تولىعىمەن باسىلدى», دەيدى دارىگەرلەر.
وسى ارادا بۇل وپەراتسيا اناعا دا, قۇرساقتاعى بالاعا دا اسا قاۋىپتى بولعانىن ايتۋ كەرەك. جۇكتىلىك كەزىندە مۇنداي جاعدايدى بولدىرماۋ ءۇشىن ماماندار بالا كوتەرگىسى كەلگەن ايەلدەرگە ءوز دەنساۋلىعىنا جاۋاپكەرشىلىكپەن قاراۋعا, الدىن الا تەكسەرىلۋگە كەڭەس بەرەدى.
كوزگە كۇردەلى وپەراتسيا جاسادى
الماتىلىقتار «12 اۋرۋحانا» دەپ اتاپ كەلگەن ورتالىق قالالىق كلينيكالىق اۋرۋحاناسىنىڭ دارىگەرلەرى كوزىنىڭ تورلى قابىعىنا جارىق تۇسكەن ايەلگە جوعارى تەحنولوگيالىق وپەراتسيا جاسادى. قۇنى 700 مىڭ تەڭگەدەن اسىپ جىعىلاتىن بۇل وپەراتسيا مىندەتتى الەۋمەتتىك مەديتسينالىق ساقتاندىرۋ شەڭبەرىندە جاسالدى.
وفتالمولوگيا ءبولىمى مەڭگەرۋشىسى گۇلزات ءابرايىموۆانىڭ ايتۋىنشا, كوزدىڭ تورلى قابىعىنىڭ تامىرلاردان اجىراۋى اۋىر پاتولوگيالار قاتارىنا جاتادى. ماماننىڭ سوزىنە سۇيەنسەك, كوزدىڭ تورلىق قابىعىنىڭ اجىراۋىن دارىمەن نەمەسە ەكپەمەن ەمدەۋ مۇمكىن ەمەس. كورۋ قابىلەتىن قالپىنا كەلتىرۋدىڭ بىردەن-ءبىر جولى – كوزگە جەدەل وپەراتسيا جاساۋ. سول سەبەپتى پاتسيەنتتىڭ كوز جانارىن ساقتاپ قالۋ ماقساتىندا ميكروحيرۋرگيالىق مانيپۋلياتسيا جاساۋ تۋرالى شەشىم قابىلدانعان. ونىڭ ۇستىنە, كوزدىڭ ارتقى تورلى قابىعىنىڭ اجىراۋى وپەراتسيانى قيىنداتا تۇسكەن.
«كوزدىڭ تورلى قابىعى اجىراعان كەزدە كورۋ قابىلەتى ناشارلايدى جانە كوپ جاعدايدا پاتسيەنت كورۋ قابىلەتىنەن ايىرىلىپ قالادى. ادەتتە تورلى قابىقتىڭ زاقىمدانۋىنا جاراقات پەن ميوپيا (كوزدىڭ جاقىننان كورمەۋى), قانت ديابەتى, كوز ىشىندەگى ىسىك, قابىقتىڭ فورماسىنىڭ بۇزىلۋى سىندى جاعدايلار تۇرتكى بولۋى مۇمكىن. ءبىزدىڭ پاتسيەنت جوعارى دەڭگەيدەگى ميوپيامەن اۋىرعان. ءبىز وعان ۆيترەكتوميا دەپ اتالاتىن وپەراتسيا جاساپ, ىشىندەگى اينەك تارىزدەس دەنەنى ميكروحيرۋرگيالىق جولمەن الىپ تاستادىق, ورنىن ارنايى سۇيىقتىقپەن تولتىردىق», دەيدى مامان.
مۇنداي كۇردەلى حيرۋرگيالىق وپەراتسيالار جوعارى تەحنولوگيالاردىڭ كومەگىمەن جاسالادى. سەبەبى وتە نازىك بولىپ كەلەتىن تورلى قابىقتاعى ءاربىر جاسۋشا كوزدىڭ كورۋ قابىلەتىنە جاۋاپ بەرەدى.
وتىنە جۇزدەن استام ۇساق تاس جينالعان
جاسى 72-گە جەتكەن كەزەكتى الماتىلىق ۇنەمى باۋىرىنىڭ تۇسى شانشىپ اۋىراتىنىن ايتىپ شاعىمدانىپ كەلگەن. №1 قالالىق كلينيكالىق اۋرۋحانا حيرۋرگتەرى لاپاروسكوپيالىق قوندىرعىلاردىڭ كومەگىمەن وپەراتسيا جاساپ, قابىنعان ءوت قابىن الىپ تاستادى. بۇل وپەراتسيا دا جوسپارلى تۇردە ءمامس شەڭبەرىندە جاسالدى. پاتسيەنتتىڭ ءوت قابىنان 100-دەن استام ۇساق تاس تابىلعان. ءبىر قاراعاندا ءوت قابى كەسىلگەن انارعا ۇقسايدى, مۇنداي جاعدايدى بۇرىن-سوڭدى كورمەگەنىن ايتادى دارىگەرلەر. وپەراتسيا ءساتتى ءوتتى, پاتسيەنت وپەراتسيادان كەيىن التىنشى كۇنى اۋرۋحانادان شىقتى. بۇرىن مۇنداي وپەراتسيالار ءداستۇرلى ادىسپەن جاسالاتىن بولسا, قازىر حيرۋرگتەر شاعىن ءينۆازيۆتى ءتاسىل – لاپاروسكوپيالىق وپەراتسياعا باسىمدىق بەرەدى. سەبەبى ول ناۋقاستىڭ تەز ارادا ايىعىپ, حيرۋرگيالىق مانيپۋلياتسيا سالدارىنان ىشەكتەردىڭ جابىسۋ قاۋپىن تومەندەتەدى.
№1 اۋرۋحانانىڭ كوپبەيىندى حيرۋرگيالىق ءبولىمى مەڭگەرۋشىسى مارات مەناياقوۆ كوبىنە پاتسيەنتتەر ءوت قابىن ساقتاپ قالۋعا بولا ما, جوق پا دەگەن سۇراق قويىپ جاتاتىنىن جەتكىزدى.
«وكىنىشكە قاراي, تاستى الىپ تاستاپ ءوت قابىنىڭ ءوزىن قالدىرۋعا بولمايدى. ويتكەنى قابىنىپ تۇرعان ءوت قابى كەيىن دە تاس پايدا بولۋىنا اسەر ەتەدى. مەن ونى بايقاۋسىزدا جارىلاتىن بومباعا تەڭەر ەدىم. سەبەبى ۇساق تاستار كوشىپ, ءوت جولدارىنا تاس بايلانۋ جانە مەحانيكالىق سارىاۋرۋ, ءوتتىڭ قابىنۋى سىندى دەرتتەرگە اكەپ سوقتىرۋى ابدەن مۇمكىن. سول سەبەپتى تاس بايلانعان جاعدايدا ءوتتى الىپ تاستاعان دۇرىس. جانە وپەراتسيانى شۇعىل جاعدايعا جەتكىزبەي, جوسپارلى تۇردە, پاتسيەنتتى دايىنداپ, دەنساۋلىعىن ابدەن تەكسەرىپ بارىپ جاساعان ءجون», دەيدى م.مەناياقوۆ.
العاش رەت كارديوستيمۋلياتور ورناتتى
الماتىداعى ورتالىق قالالىق كلينيكالىق اۋرۋحاناسى دا تۇڭعىش رەت ءمامس شەڭبەرىندە پاتسيەنت جۇرەگىنە كارديوستيمۋلياتور ورناتتى. اۋرۋحانانىڭ ءباسپاسوز قىزمەتى بەرگەن اقپاراتقا سۇيەنسەك, تەكسەرۋ بارىسىندا ناۋقاستىڭ جۇرەك-قان تامىرى جۇيەسىنەن كىنارات تابىلىپ, اتريوۆەنتريكۋليارلى (اۆ) بلوكادا انىقتالعان. ءبولىم مەڭگەرۋشىسى, ينتەرۆەنتسيوندىق كارديولوگ ەرجان قۇتتىعوجين مۇنداي كەسەل كوبىنەسە قارت كىسىلەردە ءجيى كەزدەسەتىنىن ايتادى. سونىمەن ناۋقاستىڭ ءومىرىن ساقتاپ قالۋ ءۇشىن شۇعىل تۇردە وپەراتسيا جاساپ, قان اينالىمىن رەتتەۋ قاجەت بولدى.
«جۇرەككە 2 كامەرالى ەلەكتروكارديوستيمۋلياتور يمپلانت ورناتىلدى. وپەراتسيا كەزىندە ەلەكترودتار ورناتىلىپ ەلەكتروكارديوستيمۋلياتورعا قوستىق. وپەراتسيا ءساتتى ءوتتى», دەيدى اريتمولوگ-دارىگەر عاني تولەپبەرگەنوۆ.
اتالعان وپەراتسيا وقكا-دا وسىدان ءبىر اي عانا بۇرىن اشىلعان ينتەرۆەنتسيالىق كارديولوگيا بولىمشەسىندە جاسالدى.
ەرەكشە وپەراتسيانى ەلدە العاش رەت جاسادى
ال «ورتالىق كلينيكالىق اۋرۋحاناسى» نەيروحيرۋرگتەرى قازاقستاندا العاش رەت قابىق ارتەرياسىنان ارتەريالىق-ۆەنوزدىق بايلانىستاردى جابۋ وپەراتسياسىن جاسادى. قىسقاشا ايتقاندا, ناۋقاستىڭ كۇرە تامىرىن كەڭەيتىپ, تامىرىشىلىك ستەند قويدى. وسىعان ۇقساس نازىك وپەراتسيالار اقش-تا جانە ەۋروپادا جاسالعان, ال تمد-دا بۇل وپەراتسيانى ءبىزدىڭ ماماندار ءبىرىنشى بولىپ قولعا الدى.
العاشىندا پاتسيەنتكە الماتى قالاسىنداعى كلينيكالاردىڭ بىرىندە وپەراتسيا جاسالعان, ناتيجەسىندە باس-سۇيەكىشىلىك ۆەنوزدىق گيپەرتەنزيا باستالىپ, بىرەۋدىڭ كومەگىنسىز قيمىلداي الماي, باس اۋىرۋ, جۇرەك اينۋ, قۇسۋ باستالادى. وندا ارتەريالىق-ۆەنوزدىق فيستۋلا بولىپ, قاراما قارسى جاعىنان سينۋستار بىتەلىپ قالعان, تامىرلاردىڭ تارىلۋىن قالپىنا كەلتىرۋ قاجەت بولدى.
«قازاقستاندا نەيروحيرۋرگتەر مۇنداي وپەراتسيالارعا بارا بەرمەيتىن, ويتكەنى ولار ءينسۋلتتىڭ جوعارى قاۋىپتىلىگىمەن تۇيىندەسەدى. الايدا ءبىزدىڭ تاجىريبەمىزدىڭ, اقپاراتتاردىڭ, شەتەلدىك ارىپتەستەرمەن سويلەسۋدىڭ ناتيجەسىندە ءبىز جەڭىپ شىقتىق جانە پاتسيەنتتىڭ ءومىرىن اراشالاپ قالدىق. ءبىز كۇرەتامىردىڭ تارىلعان ۋچاسكەسىن كەڭەيتىپ, ول جەرگە تامىرىشىلىك ستەند ورناتتىق. ساعالار قوسىلىسى 8 ارتەريادان تۇردى, سوندىقتان ونى ءبىر ۋاقىتتا جابۋ مۇمكىن بولمادى, وپەراتسيانى ءۇش كەزەڭگە بولۋگە تۋرا كەلدى», – دەيدى وقكا نەيروحيرۋرگيا ورتالىعىنىڭ باسشىسى مىڭجىلقى بەردىقوجاەۆ.
قازىر پاتسيەنت ءوز ۇيىندە جانە وڭالتۋدان ءوتىپ جاتىر. بۇل پاتسيەنتكە دە وپەراتسيا مەن ەم مەديتسينالىق ساقتاندىرۋ ەسەبىنەن تەگىن كورسەتىلدى.
الماتى
