ا.قازىعۇلوۆ – جاپونيا, بەلگيا, تۇركيا, قىتاي, ۇلىبريتانيا سياقتى دامىعان ەلدەردەگى كورمەلەرگە قاتىسىپ, قازاقتىڭ سالت-ءداستۇرىن, تاريحىن ناسيحاتتاپ جۇرگەن بىردەن-ءبىر سۋرەتشى. الپىسباي ناعىمەت ۇلى سىندى قىلقالام شەبەرلەرىنىڭ كورمەسىن وتكىزۋ – ءار مۋزەي ءۇشىن ۇلكەن مارتەبە.
كورمەنىڭ اشىلۋ سالتاناتى الدىندا مۋزەي قابىرعاسىندا ءباسپاسوز ءماسليحاتى ءوتىپ, سۋرەتشى ءومىرى مەن ونەرى تۋرالى از-ماز سىر شەرتكەن. الپىسباي ناعمەت ۇلى اباي اتىنداعى قازاق پەداگوگيكالىق ينستيتۋتىنىڭ كوركەمسۋرەت-گرافيكا فاكۋلتەتىندە ءبىلىم العان, 8 مىڭعا جۋىق ستانوكتىق كەسكىندەمە جۇمىستاردىڭ اۆتورى. سۋرەتشى كلاسسيكالىق مايلى بوياۋ تەحنيكاسىمەن 200-300 كارتينالار سەرياسىن جازعان.
– 45 جىلدان بەرى ءبىزدىڭ اۋلەت قازاق سۋرەت ونەرىن جيناۋمەن اينالىسامىز. كوللەكتسيامىزداعى سۋرەتتەردىڭ ەڭ قۇندىسى – ءابىلحان قاستەەۆتىڭ كارتينالارى. ونىڭ ءتورت شىعارماسى قورىمىزدا بار. ال بۇگىنگى كورمەگە ەڭ تاڭداۋلى دەگەن 27 جۇمىسىمدى اكەلدىم. ونىڭ بىرەۋىن مۋزەيگە سىيعا تارتامىن, – دەدى سۋرەتشى جۋرناليستەرگە بەرگەن سۇحباتىندا.
سۋرەتشىنىڭ كەنەپ بەتىنە جاققان بوياۋلارى ەرەكشە كوز تارتادى. سۋىق جانە جىلى ءتۇستى بوياۋلاردى ويناتا بىلەدى. ويناتا وتىرىپ, تاريحي جانردىڭ ءوزىن جايناتىپ جىبەردى. ءيا, قايناعان تىرشىلىك, جايناعان كارتينا. ءار پولوتنوسىنان قازاق دالاسىنىڭ ءيىسى اڭقيدى. اتاپ ايتار بولساق, «كوكپار», «حان ساياتشىلىعى», ابستراكتسيادان «عارىش ويىنى» جانە پەيزاج جانرىنان «سەرۋەن», «شارىن شاتقالىنا ساياحات», «سالت اتتى» سەكىلدى تۋىندىلارىن كورە الاسىزدار. سۋرەتتەردىڭ كوبى – ستانوكتىق فورماتتاعى تۋىندىلار.
«ۋاقىت ساۋلەسى» اتتى بۇل كورمەدە ءوڭىر سۋرەتشىلەرىنىڭ دە باسى بىرىكتى. مۋزەيدىڭ تورگى زالىنا قويىلعان كارتينالارعا تاڭدانا, تامسانا قاراستى. ءۇنسىز عانا باستارىن شايقايدى. بىلەمىن, ا.قازىعۇلوۆتىڭ بوياۋ جاعۋ ءستيلى ولاردى شىن شابىتتاندىردى. ويتكەنى ءار سۋرەتكە ۇزاق قارادى.
– اۆتوردىڭ كارتينالارىمەن تانىسپىن. بىراق مۇنداي كورمەدەن تۇڭعىش كورۋىم. سوزبەن ايتىپ جەتكىزە الماستاي اسەر الدىم. ۇندەسىپ جاتقان بوياۋلارىمەن تىلدەسىپ قايتقاندايمىن. ۇيگە بارا سالا كەنەپ كەرىپ, بوياۋ ەزەتىن شىعارمىن, – دەيدى سەمەيلىك سۋرەتشى مارجان باقىتبەكوۆا.
راس, ا.قازىعۇلوۆتىڭ كورمەسى شىعىس قازاقستاندا تۇڭعىش رەت ءوتىپ جاتىر. مۋزەي باسشىلىعىنىڭ ايتۋىنشا, كورمە 19 ماۋسىمعا دەيىن بولادى. ونەر شاڭىراعىنىڭ ەسىگى ونەردى قاسيەت تۇتاتىن ءار كورەرمەن ءۇشىن ارقاشان اشىق.
شىعىس قازاقستان وبلىسى
