قىسقاسى, قازىرگى احۋالعا سايكەس جىل سوڭىنا دەيىن قازاقستانعا 10 مىڭنان استام مەديتسينالىق تۋريست كەلمەك. ءبارى دەمەسەك تە, الماتى اۋرۋحانالارىندا كورسەتىلەتىن مەديتسينالىق قىزمەتتىڭ دەنى حالىقارالىق ستاندارتتاردان قالىسپايتىنىن ايتا كەتكەن ءجون.
وسىنىڭ بارلىعى الماتىدا مەديتسينالىق تۋريزم بويىنشا العاشقى حالىقارالىق ۆوركشوپ وتكىزۋگە مۇرىندىق بولدى. «ۆوركشوپ» دەپ وتىرعانىمىز – فورۋمنان كىشى, جارمەڭكە, تۇساۋكەسەر, كورمە تۇرىندەگى جيىن. ال ەلدەگى مەديتسينالىق ۆوركشوپ 93 جىلدىق تاريحى مەن تاجىريبەسى بار, ەل اۋزىندا ءالى دە «سوۆمينكا» دەگەن اتاۋمەن جۇرگەن پرەزيدەنت ءىس باسقارماسى مەديتسينالىق ورتالىعى – ورتالىق كلينيكالىق اۋرۋحاناسىندا ءوتتى. قالاي دەسەك تە, وسىناۋ ءىس-شارا قازاقستاندىق مەديتسيناعا سۇرانىس بار ەكەنىن جانە الەمدىك مەديتسينالىق ءتۋريزمنىڭ گەوگرافياسى وزگەرە باستاعانىن ايعاقتايدى.
ايتقانداي, وسىدان بۇرىن بەلارۋستا وتكەن جيىنعا گرۋزيا, تۇركيا, يران, ازەربايجان, قىرعىزستان, تاجىكستان مەن رەسەي وكىلدەرى قاتىسقان ەكەن. ال الماتىدا كونفەرەنتسيا تۇرىندە وتكەن ءىس-شاراعا گرۋزيا, تۇركيا, يران, ازەربايجان, قىرعىزستان, تاجىكستان, بەلارۋس پەن رەسەي وكىلدەرى, شەتەلدىك جانە وتاندىق كلينيكالار, تۋريستىك اگەنتتىكتەر, ساقتاندىرۋ, اۆيا جانە تۋريستىك كومپانيالارى كەلدى.
پرەزيدەنت ءىس باسقارماسى مەديتسينالىق ورتالىعى باسشىسىنىڭ ورىنباسارى جاندوس جۇمابەكوۆ ۆوركشوپتىڭ اشىلۋىندا مەديتسينالىق كوشپەلى تۋريزم ءالى دە تولىق دامىماعانىن, الايدا اينالاداعى وقيعالار قازاقستاننىڭ الەۋەتىن كەڭەيتۋگە سەپتەسىپ جاتقانىن اتاپ ءوتتى.
«الماتى – رەسپۋبليكامىزدىڭ ەڭ ءىرى مەگاپوليسى. مۇندا قالالىق قوعامدىق دەنساۋلىق باسقارماسىنا قاراستى 76 مەديتسينالىق ۇيىم شوعىرلانعان. ونىڭ ۇستىنە 13 رەسپۋبليكالىق دەڭگەيدەگى مەديتسينالىق ۇيىم, 2 مەديتسينالىق جوعارى وقۋ ورنى, دەنساۋلىق ساقتاۋ جۇيەسىنە قىزمەتكەرلەردى دايىندايتىن 14 مەديتسينالىق كوللەدج بەن 200-دەن استام جەكە مەديتسينالىق ۇيىم دا وسى قالادا ورنالاسقان. الماتىدا ترانسپلانتولوگيا, ەندوپروتەزدەۋ, كارديوحيرۋرگيا سالاسىندا جوعارى مامانداندىرىلعان مەديتسينالىق كومەك كورسەتۋمەن اينالىساتىن جەكە مەديتسينالىق ۇيىمدار بار ەكەنىن اتاپ ءوتۋ كەرەك. الماتىداعى اۋرۋحانالاردا ەمدەلىپ جاتقان ناۋقاستاردىڭ 25 پايىزى باسقا قالادان كەلەدى», دەدى الماتى قالاسى قوعامدىق دەنساۋلىق باسقارماسى باسشىسىنىڭ ورىنباسارى سۆەتلانا سۇلتانعازيەۆا.
بيىلعى ءتورت ايدا ورتالىق كلينيكالىق اۋرۋحاناسىندا جۇزدەن استام, ال بىلتىر 500-دەي شەتەلدىك تۋريست ەمدەلدى.
– قازاقستانعا كەلەتىن مەديتسينالىق تۋريستەردىڭ 15%-ى ءبىزدىڭ اۋرۋحانادا ەمدەلەدى. بۇل – وتە جاقسى كورسەتكىش. بيىل بىزدە اريتمولوگيا ورتالىعى اشىلدى جانە تمككك مەن ءمامس كۆوتاسى ارقىلى پاركينسون دەرتىنە دۋشار بولعاندارعا العاشقى وپەراتسيالار جاسادىق. ءارى وكا بازاسىندا پاركينسون اۋرۋىن حيرۋرگيالىق جولمەن ەمدەيتىن ورتالىق اشىلدى. وسى ۆوركشوپ ارقىلى جىلىنا بىزگە 700-750 شەتەلدىك پاتسيەنت جۇگىنەدى دەپ جوسپارلاپ وتىرمىز. تاجىريبە كورسەتىپ وتىرعانداي, ولاردى نەيروحيرۋرگيا, اريتمولوگيا, پاركينسون اۋرۋى, كارديولوگيا, ستوماتولوگيا ەمدەرى قىزىقتىرادى. بۇگىنگى تاڭدا قازاقستان ءتيىستى دەڭگەيدە جانە باعاسى جاعىنان ەۋروپادان الدەنەشە ەسە تومەن مەديتسينالىق قىزمەتتىڭ بارلىق ءتۇرىن كورسەتە الادى, – دەدى «ورتالىق كلينيكالىق اۋرۋحاناسى» اق پرەزيدەنتى رۋستام الباەۆ.
سول سياقتى №4 قالالىق كلينيكالىق اۋرۋحاناسى دا مەديتسينالىق جانە ساۋىقتىرۋ تۋريزمىنە قاتىستى العاشقى حالىقارالىق سەميناردا بەلسەندىلىك تانىتتى.
– بۇل ءىس-شارانىڭ ءبىزدىڭ اۋرۋحانا ءۇشىن دە ماڭىزى زور. №4 قالالىق كلينيكالىق اۋرۋحانا تراۆماتولوگيالىق-ورتوپەديالىق كومەك كورسەتۋمەن قاتار, كومبۋستيولوگيا سالاسىندا جەتەكشى رولگە يە. كلينيكا ۇجىمىنىڭ جامباس, تىزە, يىق اۋىستىرۋدا ۇلكەن تاجىريبەسى بار. 10 جىل ىشىندە بىزدە 16 مىڭ ەندوپروتەزدەۋ وپەراتسياسى جاسالدى. كاپسۋلا-بايلانىس قۇرىلىمدارىنىڭ ارتروسكوپيالىق رەكونسترۋكتيۆتىك حيرۋرگياسى (يىق, شىنتاق, تىزە, توبىق بۋىندارى), ينتەرۆەنتسيالىق حيرۋرگيادا كادرلار قۇرامى حالىقارالىق ستاندارتتارعا ساي. ءبىزدىڭ ماماندار اقش, يزرايل, جاپونيا, قىتاي مەن ەۋروپا ەلدەرىندە وقۋدان ءوتتى, – دەدى №4 قالالىق كلينيكالىق اۋرۋحانا باس دارىگەرىنىڭ ورىنباسارى ەلدەس سۇگىر.
2021 جىلى اۋرۋحاناعا مەديتسينالىق قىزمەت الۋ ءۇشىن 100 مىڭنان استام ادام جۇگىنگەن. اۋرۋحانادا 23 مىڭنان استام ناۋقاس ەمدەلسە, حيرۋرگتەر جىلىنا 12 مىڭعا جۋىق وپەراتسيا جاسايدى.
№4 قالالىق كلينيكالىق اۋرۋحاناسى ۆوركشوپتا تراۆماتولوگيا, ورتوپەديا, كۇردەلى جاراقاتتار, حيرۋرگيا, گينەكولوگيا, كارديولوگيا, ينتەرۆەنتسيالىق كارديو/نەيروحيرۋرگيا, رەابيليتاتسيا, ۋرولوگيا مەن كومبۋستيولوگيا سالالارىنداعى مەديتسينالىق قىزمەتتەردى ۇسىنۋعا دايىن ەكەندىگىن مالىمدەدى.
ەكى كۇن قاتارىنان وتكەن B2b فورماتىنداعى كەزدەسۋلەر ناتيجەسىز ەمەس. وتاندىق كلينيكالار مەن مەديتسينالىق تۋراگەنتتەر شەتەلدىك ەمدەلۋشىلەرگە قىزمەت كورسەتۋدىڭ كەلەشەگىن تالقىلاۋعا قول جەتكىزدى. كلينيكالار وزدەرىن ناسيحاتتاپ, ءتۇرلى كەلىسىمشارتتارعا قول جەتكىزۋگە, تاجىريبە الماسۋعا ۇمتىلدى.
– ادەتتە قازاقستاندىقتار جاقسى ەمدەلۋ ءۇشىن باسقا ەلدەرگە باراتىن. قازىر جاعداي وزگەرىپ جاتىر. قازاقستاندى دا قازىر تولىق تەكسەرۋدەن وتۋگە جانە وپەراتسيا جاساتۋعا بولاتىن ەل رەتىندە قاراۋعا بولادى, – دەيدى تۇركيادان كەلگەن Famax Medical Tourism مەديتسينالىق كەڭەسشىسى يلكين باباەۆ.
مەديتسينالىق سەميناردىڭ كەلەسى كۇنى Universal Health Expert ۇيىمداستىرۋشىلارى الماتى كلينيكالارىن ارالاپ, ءوزارا ىنتىماقتاستىق مەموراندۋمىنا قول قويۋ راسىمدەرىن وتكىزدى. ولار مەديتسينالىق ۆوركشوپ وتكىزۋدى داستۇرگە اينالدىرۋدى جوسپارلاپ وتىر.
الماتى
