بۇگىندە ورتالىقتاعى انالار مەن سابيلەر, جالپى ەمدەلۋشىلەر وبلىستاعى پەرزەنتحانالارعا جەتكىزىلىپ, ءتيىستى ەمدەرىن الۋدا. وقىس وقيعا سالدارىنان ءۇش ادام قازا بولعان, ءتۇرلى جاراقات العان جەتى ادام وبلىستىق جانە قالالىق اۋرۋحانالاردا ەمدەلۋدە.
وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ وقىس وقيعا كەزىندەگى قيىن جاعدايدا پەرزەنتحانا ۇجىمى ءبىر كىسىدەي جۇمىلىپ, دارىگەرلىك مىندەتتەرىن اتقارعانىن, ۇرەيگە بوي الدىرماي ءتيىستى كومەكتەرىن كورسەتىپ, ەمدەلۋشىلەردى كوشىرۋگە اتسالىسقانىن ايتادى. «وبلىس اكىمى ومىرزاق شوكەەۆ وقيعا ورنىنا شۇعىل جەتىپ, ءتيىستى تاپسىرمالار بەردى. دەنساۋلىق ساقتاۋ ءمينيسترى دەر كەزىندە نازار اۋدارىپ, نۇسقاۋلىقتار بەردى. جارىلىس بولعان ماڭايداعى ۇيلەردىڭ تۇرعىندارى, ءتىپتى سول ارادان ءوتىپ بارا جاتقان ادامدار دا قولۇشىن بەرۋگە تىرىستى. ءوز باسىم مۇنى مەيىرىمدىلىكتىڭ, بىرلىكتىڭ ءبىر كورىنىسى دەپ قابىلدادىم. بۇگىندە وبلىس جانە قالاداعى جۇكتى ايەلدەرگە قىزمەت كورسەتۋدە ەشقانداي كەدەرگى جوق. وبلىس ورتالىعىنداعى, قالاداعى جانە اۋداندارداعى پەرزەنتحانالار مەن اۋرۋحانالار تولىققاندى جۇمىس ىستەۋدە», دەدى وقىس وقيعاعا بايلانىستى كۇنى كەشە ارنايى بريفينگ وتكىزگەن وبلىستىق قوعامدىق دەنساۋلىق باسقارماسىنىڭ باسشىسى. سەنبى كۇنى بولعان وقىس وقيعانى رەتىمەن بايانداساق...
قالالىق توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە, ءورت تۋرالى حابارلاما كۇندىزگى ساعات 11:36-دا تۇسكەن. ءورت سوندىرۋشىلەر جەتكەن كەزدە جارىلىس سالدارىنان «اۋرۋحاناارالىق 138-ءدارىحانا» جشس-نە قاراستى 2 قاباتتى جەكە تۇرعىن ۇيدەن ءورت شىققانى انىقتالعان. عيماراتتىڭ جالپى اۋدانى 360 شارشى مەتر, قابىرعالارى كىرپىشتەن, شاتىرى گوفر كارتونمەن قاپتالعان. جارىلىس سالدارىنان 130 شارشى مەتر اۋماقتا عيمارات ءىشىنارا وپىرىلىپ, 5 قاباتتى تۇرعىن ءۇيدىڭ جانىنداعى پاتەردىڭ بالكونى مەن تەرەزەلەرى, 7 اۆتوكولىك زاقىمدانعان. جالىندى اۋىزدىقتاۋعا دەپارتامەنتتىڭ 37 قىزمەتكەرى جانە 9 تەحنيكا جۇمىلدىرىلعان. ءورت ساعات 12:06-دا ءسوندىرىلدى. توتەنشە جاعدايلار دەپارتامەنتىنىڭ قىزمەتكەرلەرى وقيعا ورنىنان جانىپ كەتكەن ەر ادامنىڭ ءمايىتىن تاپتى. وقيعا ورنىنا سونداي-اق شىمكەنت قالاسىنىڭ اكىمى مۇرات ايتەنوۆ, پوليتسيا دەپارتامەنتىنىڭ باسشىلىعى جەدەل جەتكەن. جارىلىس بولعان اۋرۋحاناارالىق ءدارىحانا عيماراتىنىڭ تولىق جويىلعانى, وندا تۇزدى ەرىتىندى وندىرىلەتىنى انىقتالىپ وتىر.
جارىلىس بولعان عيماراتتىڭ پەريناتالدىق ورتالىققا ەش قاتىسى جوق بولىپ شىقتى. دەگەنمەن وكىنىشكە قاراي, جارىلىستىڭ كۇشتى تولقىنىنان ءدارىحانا ماڭايىنداعى پەرزەنتحاناعا دا زارداپ تيگەن. اسىرەسە ءبىرىنشى قاباتتاعى جانساقتاۋ بولىمىنە. تەرەزەلەرى قيراپ, جابدىقتار ىستەن شىققان. جارىلىس بولعان عيماراتتىڭ جانىنداعى پەرزەنتحانادان انا مەن سابيلەر, مەديتسينا قىزمەتكەرلەرى جەدەل باسقا عيماراتقا كوشىرىلدى. قالالىق توتەنشە جاعدايلار دەپارتامەنتىنىڭ باستىعى ماديار جاقسىباەۆ جارىلىس بولعان عيماراتتىڭ قاسىنداعى بەس قاباتتى تۇرعىن ءۇيدىڭ 20-عا جۋىق تۇرعىنى دا قاۋىپسىز جەرگە كوشىرىلگەنىن ءمالىم ەتتى. «ولاردىڭ اراسىندا زارداپ شەككەندەر جوق. دەسە دە وقيعا ورنىندا جەدەل قۇتقارۋ جاساعى مەن كينولوگتەر جۇمىس ىستەپ جاتىر. قالالىق اكىمدىكتە شتاب قۇرىلىپ, ارنايى تەحنيكالارمەن تازالاۋ جۇمىستارىن جۇرگىزۋ شارالارى باستالدى. جارىلىس بولعان عيماراتتىڭ يەسى ىشتە جۇمىسشىلار بولماعانىن ايتادى. ءبارى دەمالىستا بولعان. سونىمەن قاتار عيماراتتا ەكى تونناداي سۋتەگى اسقىن توتىعى ساقتالعانىن جەتكىزدى. بۇل – فۋراتسيللين مەن گليۋكوزا شىعاراتىن سۇيىقتىق. جارىلىسقا وسى سۇيىقتىق سەبەپ بولۋى مۇمكىن دەگەن بولجام بار. دەسە دە ونىڭ ناقتىسى تەكسەرۋ بارىسىندا انىقتالادى. گازدىڭ كەسىرىنەن جارىلىس بولۋى مۇمكىن دەگەن بولجام قاراستىرىلىپ جاتقان جوق», دەدى قالالىق تجد باستىعى. سونداي-اق دەپارتامەنت باستىعىنىڭ ايتۋىنا قاراعاندا, جارىلىس سالدارىنان ەكى قاباتتى عيماراتتىڭ 55 شارشى مەترى ورتەنىپ, 130 شارشى مەترى قۇلاعان. ال وقيعا ورنىنان تابىلعان ەر ادام 1979 جىلى تۋعان پەرزەنتحانانىڭ كۇزەتشىسى ەكەنى انىقتالدى. كەيىنىرەك جارىلىستان جالپى ءۇش ادامنىڭ قازا بولعانى جاريا ەتىلدى. «وكىنىشكە قاراي, 1979 جىلى تۋعان كۇزەتشى, 1980 جىلى تۋعان جۇمىسشى جانە 18 كۇن بۇرىن تۋعان ءسابي قايعىلى وقيعانىڭ قۇربانى بولدى. قازا تاپقانداردىڭ وتباسىلارىنا كوڭىل ايتامىز. زارداپ شەككەندەرگە كومەك كورسەتۋ جانە وسى قايعىلى وقيعانى تەرگەۋ ءۇشىن ۆەدومستۆو بارلىق قاجەتتى شارانى قابىلدايدى», دەپ حابارلادى دەنساۋلىق ساقتاۋ مينيسترلىگى. سونداي-اق دەنساۋلىق ساقتاۋ ءمينيسترى اجار عينيات قازا تاپقانداردىڭ وتباسىلارىنا كوڭىل ايتتى. ء«دال قازىرگى ۋاقىتتا جاعداي دەنساۋلىق ساقتاۋ مينيسترلىگىنىڭ باقىلاۋىندا تۇر. زارداپ شەككەندەردى قالانىڭ مەديتسينالىق ۇيىمدارىندا ستاتسيونارلىق جاعدايدا ەمدەۋ ءۇشىن بارلىق شارا قابىلدانۋدا. بۇدان باسقا تۇركىستان وبلىسى بويىنشا جۇكتى جانە جاڭا تۋعان نارەستەلەردى باعىتتاۋدى ۇيىمداستىرۋ جانە وزگەرتۋ بويىنشا جۇمىستار شۇعىل تۇردە جۇزەگە اسىرىلۋدا», دەپ جازدى اجار عينيات فەيسبۋكتەگى پاراقشاسىندا.
ال كەشەگى بريفينگتە وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ زارداپ شەككەندەرگە كومەك كورسەتىلەتىنىن, پەريناتالدىق ورتالىق الداعى ۋاقىتتا جۇمىسىن جالعاستىراتىنىن جەتكىزدى. «بۇل جاعداي وبلىس اكىمىنىڭ باقىلاۋىندا. جارىلىس سالدارىنان جاراقات العانداردىڭ جاعدايى تۇراقتى. ناقتىلاي كەتسەك, جاراقات العان جەتى ادامنىڭ 5-ەۋى وبلىستىق پەريناتالدىق ورتالىقتا جۇمىس ىستەيدى. ياعني تورتەۋى كىشى بۋىن قىزمەتكەرلەرى, ءبىر مەدبيكە. ورتالىق اۋماعىندا كۇردەلى جوندەۋ جۇمىستارى جۇرگىزىلىپ جاتقان بولاتىن. جاراقات العانداردىڭ ەكەۋى سول جەردەگى جۇمىسشى. بارلىعىنىڭ جاعدايى تۇراقتى. ولارعا ا.سىزعانوۆ اتىنداعى ۇعحو دارىگەرلەرى كەڭەس بەرىپ, پسيحولوگتەر توبىنىڭ جۇمىسى ۇيىمداستىرىلعان», دەدى باسقارما باسشىسى. سونداي-اق بريفينگتە دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا پەرزەنتحانالاردا بولىپ, ەمدەلۋشىلەرىنىڭ جاعدايىن بىلگەنىن, ولارعا بارلىق جاعداي جاسالعانىن ءمالىم ەتتى.
ايتا كەتەلىك, شىمكەنت قالالىق پوليتسيا دەپارتامەنتى باستىعىنىڭ ءبىرىنشى ورىنباسارى مۇرات التاەۆ پەن قالالىق پوليتسيا دەپارتامەنتى تەرگەۋ باسقارماسىنىڭ باستىعى داۋلەتكەلدى ءابدىرامانوۆتىڭ حابارلاۋىنشا, جەدەل تەرگەۋ توبى قۇرىلىپ, سوتقا دەيىنگى تەرگەپ-تەكسەرۋ جۇمىستارى باستالعان. اتالعان وقيعاعا وراي پوليتسيا دەپارتامەنتىندە قىلمىستىق كودەكستىڭ 292-بابىنا سايكەس قىلمىستىق ءىس قوزعالعان. ءورت قاۋىپسىزدىگى ەرەجەسىن ساقتاماعان ازاماتتاردىڭ قىلمىستىق ارەكەتىن اشكەرەلەيتىن بۇل باپ بويىنشا ەكى جىلدان جەتى جىلعا دەيىنگى ارالىقتا باس بوستاندىعىنان ايىرۋ كوزدەلگەن.
شىمكەنت
