«كاسپي تەڭىزىنىڭ جاعالاۋىنا عارىشتان مونيتورينگ جۇرگىزۋ كەزىندە 19 مامىر ساعات 16:15-تە «اقجايىق» تابيعي رەزەرۆاتىنىڭ اۋماعىندا ءورت وشاعى تىركەلدى. رەزەرۆات قىزمەتكەرلەرىنىڭ مالىمەتىن تەكسەرۋ كەزىندە قامىس ءورتىنىڭ اتىراۋ قالاسىنان 25 شاقىرىم قاشىقتاعى كاسپي تەڭىزىنىڭ جاعالاۋىندا تۇتانعانى انىقتالدى. ءورتتىڭ اۋماعى - شامامەن 5 گەكتار», دەپ حابارلادى دەپارتامەنتتىڭ قوعاممەن بايلانىس توبى.
ءورت سوندىرۋگە «اقجايىق» مەملەكەتتىك تابيعي رەزەرۆاتىنان 10 ادام, 2 قايىق, 2 موتوپومپا تارتىلعان.
19 مامىردا 3 گەكتار اۋماقتاعى ءورت ءسوندىرىلدى. جالىندى ءسوندىرۋ ءالى دە جالعاسىپ جاتىر.
ايتا كەتسەك, بۇل «اقجايىق» مەملەكەتتىك تابيعي رەزەرۆاتىنىڭ اۋماعىندا تىركەلگەن العاشقى ءورت ەمەس. بۇدان بۇرىن 21 ساۋىردە اتالعان رەزەرۆاتتا 9 گەكتار قامىس ورتەنىپ كەتكەن ەدى.
