ەرلان قوشانوۆ جيىندا مەملەكەت باسشىسى قاسىم-جومارت توقاەۆتىڭ باستاماسىمەن قازىر ەلىمىزدە اۋقىمدى وزگەرىس بولىپ جاتقانىن ايتىپ, ءوڭىر حالقىن اباي وبلىسىنىڭ قۇرىلۋىمەن قۇتتىقتادى.
– سەمەي – الاش ارىستارىنىڭ باسىن قوسقان قازاق رۋحانياتىنىڭ قارا شاڭىراعى. سوندىقتان تاريحي تۇرعىدان قارايتىن بولساق, اۋماقتىق جاعىنان, حالىق سانى جاعىنان الساق تا, ءادىل شەشىم بولدى دەپ ويلايمىن. ەندەشە, سىزدەردى سول تاريحي ادىلەتتىلىكتىڭ ورناۋىمەن شىن جۇرەكتەن قۇتتىقتايمىن, – دەدى پالاتا سپيكەرى.
ءماجىلىس توراعاسىنىڭ ايتۋىنشا, پرەزيدەنتتىڭ اباي وبلىسىن قۇرۋ تۋرالى شەشىمى ايماقتىڭ ودان ءارى وركەندەۋىنە تىڭ سەرپىن بەرەدى.
– اباي ءوڭىرى, سەمەي جەرى تاريحتىڭ جاڭا پاراعىن اشتى. ءبىز اباي وبلىسىنىڭ شاڭىراعىن حالقىمىزبەن, پرەزيدەنتىمىزبەن بىرگە كوتەرەمىز. وسى ىستە پارلامەنت ءماجىلىسى, Amanat پارتياسى دا سىزدەرمەن بىرگە بولادى, – دەدى ءماجىلىس سپيكەرى.
ە.قوشانوۆ ەل تاعدىرىن ايقىندايتىن ۇلكەن ماقسات-مىندەتتەرگە توقتالىپ, ول جالپىحالىقتىق رەفەرەندۋمنان باستالاتىنىن اتاپ ءوتتى.
– جاڭا قازاقستان دەگەنىمىز نە؟ قازىر ەڭ ءجيى قويىلاتىن سۇراق وسى. پرەزيدەنت جۋىردا بۇعان ناقتى جاۋاپ بەردى. «ول – ادىلەتتى قازاقستان» دەپ ءدوپ باسىپ ايتتى. ال جاڭاقازاقستاندىق قانداي بولۋى قاجەت؟ مۇنى وسى توپىراقتا تۋعان ۇلى اباي ءبىر جارىم عاسىر بۇرىن ايتىپ كەتكەن. ول – بەس نارسەدەن قاشىق بوپ, بەس نارسەگە اسىق بولۋ. قاراپ وتىرساڭىزدار, اباي فيلوسوفياسى پرەزيدەنتىمىزدىڭ جاڭا قازاقستان تۋرالى كوزقاراسىمەن تولىق ۇندەسىپ تۇر. سوندىقتان جاستاردى بىلىمگە, ەڭبەككە باۋلۋ, وسى بەس قاسيەتتى بويىنا ءسىڭىرۋ ماڭىزدى, – دەدى پالاتا سپيكەرى.
ەرلان قوشانوۆ پرەزيدەنت رەفورمالارىنىڭ جاڭا مۇمكىندىكتەرگە جول اشاتىنىن ايتىپ, الداعى ۋاقىتتا پارلامەنتتىڭ ءرولى كۇشەيەتىنىنە, ەلىمىزدىڭ سايلاۋ جۇيەسىندە دە بىرقاتار وزگەرىس بولاتىنىنا ءمان بەردى.
– اكىمدەر سايلاۋى ەل اراسىندا ءجيى ايتىلىپ ءجۇر. ءبىز وعان كەزەڭ-كەزەڭمەن كەلە جاتىرمىز. بىلتىر ەلىمىزدە 1 مىڭعا جۋىق اۋىل اكىمىن حالىقتىڭ ءوزى سايلادى. كەلەر جىلى اۋدان اكىمدەرىن سايلاۋعا كىرىسەمىز. وبلىس باسشىلارىن تاعايىنداۋ ماسەلەسىنە كەلەر بولساق, بۇرىن پرەزيدەنت ۇسىنعان جالعىز كانديدات 20-30 وبلىستىق ءماسليحات دەپۋتاتىمەن كەلىسىلەتىن. ەندى مەملەكەت باسشىسى تاراپىنان كەم دەگەندە ەكى ۇمىتكەر ۇسىنىلادى. ونى بارلىق دەڭگەيدەگى ءماسليحات دەپۋتاتتارى تاڭدايتىن بولادى, – دەدى ە.قوشانوۆ.
ەرلان قوشانوۆ اباي اۋدانىنداعى قاراۋىل اۋىلىنا بارىپ, جۇرتشىلىقپەن كەزدەستى. وندا پرەزيدەنت باستامالارىنىڭ ءمان-ماڭىزىن ءتۇسىندىرىپ, اۋىل زيالىلارى مەن تۇرعىندارىنىڭ پىكىرىن تىڭدادى.
– ەلىمىزدە قاراۋىلدى بىلمەيتىن قازاق جوق شىعار. بۇل – ادامزاتقا عۇلاما ابايدى سىيلاعان قاسيەتتى توپىراق. وسىندا سىزدەرمەن جۇزدەسكەنىمە قۋانىشتىمىن. جاڭا قازاقستان قۇرۋعا باعىتتالعان مەملەكەت باسشىسىنىڭ ساياسي رەفورمالارى توڭىرەگىندە وزدەرىڭىزبەن اڭگىمەلەسۋ ءۇشىن ارنايى كەلدىم. پرەزيدەنت ەل تاعدىرىن قالىڭ جۇرتتىڭ ءوزى شەشكەنىن قالاپ وتىر. وسىناۋ جاۋاپتى كەزەڭدە حالىق پەن بيلىك ءبىرتۇتاس بولۋىمىز كەرەك. مەملەكەت باسشىسىنا قولداۋ ءبىلدىرىپ, رەفەرەندۋمعا ءبىر كىسىدەي اتسالىسۋعا, تاريحي تاڭداۋ جاساۋعا شاقىرامىن, – دەدى پالاتا توراعاسى.
زيالى قاۋىم وكىلدەرى اباي اۋدانى جۇرتشىلىعىنىڭ رەفورمالاردى جاقسى قابىلداپ جاتقانىن جانە الداعى رەفەرەندۋمعا اتسالىساتىندارىن ايتتى.
– بۇل رەفورمالاردىڭ ءبارى حالىقتىڭ كوكەيىندە جۇرگەن سۇراقتارعا جاۋاپ بەرەدى. ءبىز ونى جاقسى تۇسىنەمىز. ەلدىڭ يەسى, جەردىڭ يەسى – حالىق دەگەن ءسوز جۇرەگىمىزگە جاقىن ءتيدى. پرەزيدەنتىمىز جۇمىسقا كىرىسكەن كۇننەن باستاپ وسى دەموكراتيالىق پروتسەستەردىڭ جۇزەگە اسۋىن ءسوز ەتىپ ءجۇر. ءبىز ونى تولىق قولدايمىز, – دەدى اباي اۋدانىنىڭ قۇرمەتتى ازاماتى امانتاي مۇقاتاەۆ.
كەزدەسۋ سوڭىندا جينالعاندار پرەزيدەنتكە اباي وبلىسىن قۇرۋعا ۇيىتقى بولعانى ءۇشىن اۋدان اتىنان العىسىن جەتكىزدى.
– وبلىسىمىز قۇرىلىپ جاتىر. زور ماقتانىشپەن, ۇلكەن ۇمىتپەن قاراپ وتىرمىز. پرەزيدەنتىمىز قاسىم-جومارت كەمەل ۇلىنا ءبىزدىڭ سالەمىمىزدى جەتكىزىڭىز. ابايلىقتار مەن اباي ۇرپاقتارى شەكسىز العىسىن بىلدىرەدى. ءوڭىرىمىزدىڭ گۇلدەنۋىنە ءبارىمىز اتسالىسامىز, – دەدى اباي اۋدانىنىڭ قۇرمەتتى ازاماتى تولەگەن جانعاليەۆ.
