«پاۆلودار قالاسىنىڭ بۇرىن سوتتالعان تۇرعىندارى تانىمال سايتتاردا جوق تاۋاردى ساتىپ, 200-دەن استام قازاقستاندىقتى الداپ سوققان», دەپ حابارلادى پاۆلودار وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
وبلىستىڭ ءتارتىپ ساقشىلارى 24 جانە 27 جاستاعى ەكى ەر ادامدى ۇستادى.
«ولار «OLX», «Kolesa.KZ» سايتتارىنا جوق تاۋارلاردى ء(شوپ, تراكتور, استىق, وتىن) ساتۋ تۋرالى جارناما سالعان. بۇل رەتتە ولار تەلەفون شالعاندا وزدەرىن بانك قىزمەتكەرى رەتىندە كورسەتىپ, سول ارقىلى بۇكىل قازاقستان بويىنشا ينتەرنەت-الاياقتىق جاساعان», دەپ تولىقتىردى ۆەدومستۆودان.
ولاردان الدانعان تۇرعىندار ورتاشا ەسەپپەن 10 مىڭنان 500 مىڭ تەڭگەگە دەيىنگى كولەمدە الدىن الا تولەم اۋدارعان. تولەم ىشىمدىك ىشكەن, ءۇي-كۇيى جوق ءۇشىنشى ادامداردىڭ, ەسەپشوتىنا تۇسىرىلگەن. وسىدان كەيىن «ساتۋشىمەن» بايلانىس ۇزىلگەن.
«بارلىق فاكتىلەر قر قىلمىستىق كودەكسى 190-بابىنىڭ 2-ءبولىمى (الاياقتىق) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلگەن. قىلمىستىق ءىس بويىنشا ايىپتالۋشىلار ۋاقىتشا قاماۋدا وتىر. 200-گە جۋىق قىلمىس انىقتالدى, جالپى شىعىن كولەمى شامامەن 15 ملن تەڭگەنى قۇرايدى», دەپ حابارلادى پد ءباسپاسوز قىزمەتى.
2022 جىلدىڭ باسىنان بەرى پاۆلودار وبلىسىندا 482 ينتەرنەت-الاياقتىق فاكتىسى تىركەلگەن.
ايانا توعانبەك
