ساۋدا ورنىنىڭ اكىمشىسى مۇحامەتقالي ءارىپحاننىڭ ايتۋىنشا, وزگە ساۋدا ورىندارىنا قاراعاندا, مۇنداعى تاۋارلاردىڭ باعاسى الدەقايدا ارزان. ويتكەنى سەرتيفيكاتتالعان ساپالى ءونىمنىڭ ءبارى فەرمەردەن تۇتىنۋشىنىڭ قولىنا ەشبىر دەلدالسىز تىكەلەي تيەدى.
– مۇندا ساتىلاتىن تاۋاردىڭ نەگىزگى بولىگىن قوستاناي اۋدانىنىڭ فەرمەرلەرى وندىرەدى. ماسەلەن, وسى اۋداندا ەشكى باعاتىن شارۋاشىلىق ەشكى ءسۇتى مەن ىرىمشىك, سۇزبە سەكىلدى دەنساۋلىققا پايدالى ونىمدەرىن ساۋدا سورەسىنە شىعاردى. ەڭ باستىسى, تۇرعىندار ارزان ءارى ساپالى ازىق-ت ۇلىك ونىمدەرىن ساتىپ الۋ مۇمكىندىگىنە يە بولىپ وتىر, – دەدى م.ءارىپحان.
جاڭا اشىلعان ساۋدا ورنى, اسىرەسە بال بيزنەسىمەن اينالىساتىن كاسىپكەرلەر ءۇشىن ءتيىمدى بولىپ وتىر.
– ءبىزدىڭ جەكەمەنشىك ومارتامىز بار. قاراقۇمىق بالىن 1400 تەڭگەدەن, ءارتۇرلى وسىمدىكتەردەن جينالاتىن بالدىڭ كيلوسىن 2800 تەڭگەدەن ساتىپ جاتىرمىز. مۇنداي ساۋدا ورتالىعىن كوپتەن كۇتىپ ءجۇر ەدىك. بۇرىن دۇكەندەردىڭ كىرەبەرىسىندە, كوشەدە, كوك بازاردا تۇرىپ ساتۋعا تۋرا كەلەتىن. ەندى ارنايى ساۋدا ورنىمىز بار, مۇمكىندىگىمىز دە كەڭەيە تۇسەرى ءسوزسىز, – دەدى ومارتاشى تاتيانا كرەكەر.
فەرمەرلەر دۇكەنىنىڭ اشىلۋ راسىمىنە كەلگەن تۇرعىنداردىڭ كوپتىگىنەن ساۋدا سورەلەرىندەگى تاۋارلار تەز ءوتىپ كەتتى. ال سورەسى بوساپ قالعان دۇكەنشىلەر الداعى ۋاقىتتا تاۋاردىڭ كولەمىن ارتتىرامىز دەپ ۋادە ەتتى.
قوستاناي وبلىسى
