جىلۋ ماسەلەسى شەشىلمەگەندىكتەن كەيبىرەۋى مۇنداعى ۇيلەرىن ساياجاي رەتىندە پايدالانادى. قىستا ق ۇلىپپەن «قارۋلانىپ», تەرەزە-ەسىكتى شەگەلەپ, وبلىس ورتالىعىنداعى ۇيىندە كۇنەلتەدى. ال كوبى قىسى-جازى وسىندا تۇرادى. جالعىز باسپاناسى – وسى. امالسىزدان اۋىلدىڭ حالقى سياقتى كومىر جاعۋعا ءماجبۇر. وتىننىڭ شىعىنى ءوز الدىنا, اۋەجاي اسپانىندا جايىلعان كوك ءتۇتىننىڭ ەكولوگيالىق زاردابى دا بار ەمەس پە؟ وعان باس قاتىرىپ وتىرعان شەنەۋنىكتەر جوق. كەزىندە ۋادەنى ءۇيىپ-توككەن شەندىلەر زەينەتكەرلىككە شىعىپ كەتكەن دە بولار...
تۇرعىن ءۇيدىڭ ىرگەتاسى قالانعان ۋاقىتتا مارە-سارە كۇي كەشكەن ماقسات ەشمۇراتوۆتىڭ قازىرگى كوڭىل كۇيى كوتەرىڭكى دەۋ قيىن.
– جەكە تۇرعىن ءۇي قۇرىلىسى جوباسىندا ورتالىقتاندىرىلعان جىلۋ جۇيەسى قاراستىرىلعان. مەن جەر العان ۋاقىتتا قۇبىرلاردىڭ توسەلگەنىن كورگەن ەدىم. كەيىن بەلگىسىز سەبەپپەن ونى قايتادان سۋىرىپ الىپتى. سودان بەرى قۇبىر دا جوق, جىلۋ دا جوق. بۇگىندە مۇندا ءۇي سالعانداردىڭ باسىم بولىگى سۋسىز, جارىقسىز وتىر, – دەيدى م.ەشمۇراتوۆ.
قالالىق قۇرىلىس ءبولىمى باسشىلىعىنىڭ مالىمەتىنشە, جوبانىڭ ساراپتاماسى دايىن بولعان سوڭ جەلىلەردى تارتۋ ءۇشىن رەسپۋبليكالىق بيۋدجەتتەن قاراجات سۇرالماق. ەگەر قولداۋ تاپسا, بيىل ءتيىستى جۇمىستار قولعا الىنباق. كەش بولسا, كەلەسى جىلى جالعاساتىنىنا سەندىرۋدە.
اكىمدىكتىڭ جاۋابىنا تۇرعىنداردىڭ رازى بولماعانى انىق. رەسپۋبليكالىق بيۋدجەت ساۋىن سيىر ەمەس. ودان دا ماڭىزدى جوبالار جەتەرلىك. سوندا رەسپۋبليكالىق قازىنادان قاراجات بولىنبەسە, جەلىلەر تارتىلمايدى دەگەن ءسوز بە؟ تۇرعىندار تاعى 10 جىل كۇتۋى كەرەك پە؟ نە دەسەك تە, جەرگىلىكتى بيلىك ۋادەسىندە تۇرىپ, قولعا العان شارۋاسىن سوڭىنا دەيىن اياقتاۋعا تىرىسادى دەگەن ءۇمىت بار. تۇرعىنداردىڭ تىلەگى سول.
پاۆلودار وبلىسى
