ماسكەۋدە ەۋرازيالىق ەكونوميكالىق وداق تۋرالى كەلىسىم جوباسى تالقىلاندى

ءساۋىردىڭ 15-ءى كۇنى ماسكەۋدە قازاقستان ۇكىمەتىنىڭ باسشىسى كارىم ءماسىموۆ كەدەن وداعى جانە بىرىڭعاي ەكونوميكالىق كەڭىستىككە مۇشە ەلدەردىڭ ۇكىمەتتەرى جەتەكشىلەرىنىڭ كەزدەسۋىنە قاتىستى. بۇل تۋرالى primemminister.kz سايتى حابارلادى. كەزدەسۋدىڭ كۇن تارتىبىندە ەۋرازيالىق ەكونوميكالىق وداق جونىندەگى كەلىسىم جوباسى كەڭىنەن تالقىلاندى. اتاپ ايتقاندا, اۋىل شارۋاشىلىعى, مۇناي-گاز, تەمىر جول جانە اۆتوكولىك تاسىمالىنا قاتىستى شارۋالار ءسوز بولدى. ارنايى  ۇيىمداستىرىلعان ءباسپاسوز ءماسليحاتىندا كارىم ءماسىموۆ: «بۇگىن بارلىق داۋلى ماسەلەلەر تالقىلانىپ, ءىشىنارا تۇزەتۋلەردەن كەيىن قۇجات مەملەكەت باسشىلارىنىڭ قول قويۋىنا دايىن بولادى», – دەدى. سونداي-اق, قازاقستان ۇكىمەتىنىڭ باسشىسى: «كەلىسسوز كەزىندە ءبىز نەگىزگى شارت رەتىندە قاتىسۋشى ەلدەردىڭ ەكونوميكالىق مۇددەلەرىنە سايكەستىكتى باسشىلىققا الدىق», – دەدى. وسىلايشا ۇكىمەت باسشىلارى ەۋرازيالىق وداق جونىندەگى كەلىسىم جوباسىن تاعى ءبىر پىسىقتاپ الدى. ويتكەنى, اتالمىش كەلىسىم جوباسىن مەملەكەتتىك دەڭگەيدە بەكىتەتىن كۇن جاقىن. ناقتىلاي ايتقاندا, قارجى مينيسترلىگى سالىق كوميتەتىنىڭ توراعاسى ءانۋار جۇمادىلداەۆتىڭ 16 ساۋىردە ۇيىمداستىرىلعان بريفينگتە مالىمدەگەنىندەي, مامىر ايىندا قازاقستان, رەسەي جانە بەلارۋس مەملەكەتتەرىنىڭ پرەزيدەنتتەرى ەەو تۋرالى كەلىسىمگە قول قويماق. بيىل ەۋرازيالىق ەكونوميكالىق وداق يدەياسىنا 20 جىل تولادى. ءانۋار جۇمادىلداەۆ وسى 20 جىلدىڭ ىشىندە قازاقستان, رەسەي جانە بەلارۋس مەملەكەتتەرى ءتۇرلى سالالار بويىنشا تۇسىنىستىككە قول جەتكىزىپ, اتالعان ءۇش ەلدىڭ اراسىنداعى ينتەگراتسيالىق يگى ىستەر قاجەتتى دامۋ بيىگىنە جەتكەندىگىن دە اتاپ ءوتتى. جالپى, ەۋرازيالىق ينتەگراتسيا مەملەكەتتەردىڭ ءوزارا ەكونوميكالىق بايلانىستارىن عانا قامتيتىنىن ايتا كەتكەن ءجون. جولدىباي بازار. دەرەككوز: primemminister.kz. فوتو: Ria.ru.