ءىرى حالىقارالىق اقپارات اگەنتتىگى اسسوشيەيتەد پرەسس: «قازاقستاندىق «استانا وپەرا» العاشقىلاردىڭ ءبىرى بولىپ 2022-2023 جىلدارداعى ماۋسىمنىڭ باستالۋى تۋرالى مالىمدەدى. سالتاناتتى اشىلۋى 9 قىركۇيەككە جوسپارلانعان, كوپشىلىككە الەمدىك جۇلدىزداردىڭ قاتىسۋىمەن گالا-وپەرا ۇسىنىلادى. ديريجەر تۇعىرىندا – اتاقتى ماەسترو, «استانا وپەرانىڭ» باس ديريجەرى الان بورىباەۆ», دەپ حابارلادى.
ايتا كەتەيىك, بىلتىر ماۋسىمنىڭ اشىلۋىن جاريالاعان تەاترلار اراسىندا ميلاندىق لا سكالا كوشباسشى بولعان ەدى.
جاپونيانىڭ 88 ميلليون اۋديتورياسى بار تانىمال CNET جاڭالىقتار سايتى تەاتر ديرەكتورى عالىم احمەدياروۆتىڭ پىكىرىنەن دايەكسوز كەلتىرىپ: «گالا-وپەرا كورەيدىڭ بەلگىلى وپەرا ءانشىسى, «گرەممي» سىيلىعىنىڭ لاۋرەاتى سۋمي چونىڭ قاتىسۋىمەن وتەدى, سونداي-اق ۇجىم بىرقاتار ايتۋلى پرەمەرالار ۇسىنادى. ءبىز كوپشىلىكتىڭ نازارىنا س.پروكوفەۆتىڭ مۋزىكاسىنا نەمىس حورەوگرافى رايموندو رەبەكتىڭ «كۇلشە قىز» بالەتىنىڭ جاڭا زاماناۋي قويىلىمىن دايىندادىق. سونداي-اق ماۋسىمنىڭ باسىندا بالنۇر قىدىربەكتىڭ «قالقامان – مامىر» ۇلتتىق وپەراسىنىڭ پرەمەراسى كۇتىلۋدە. بۇدان بولەك, رەپەرتۋاردى جۋىردا عانا تولىقتىرعان كەرەمەت بالەت يرجي كيلياننىڭ «التى ءبيى» افيشانىڭ ءسانىن كەلتىرەدى. بارلىق سپەكتاكلدەر جوعارى دەڭگەيدە ۇسىنىلعان جانە قازاقستاندا سۇرانىسقا يە», دەيدى.
«استانا وپەرانىڭ» ايتۋلى جەتىستىكتەرىن India Today ءۇندى جۋرنالى دا اتاپ ءوتتى: «تەاتردا ءتۇرلى باعىت بويىنشا بەلسەندى جۇمىس جۇرگىزىلۋدە: تەاتردىڭ قامقورشىلىق كەڭەسىنىڭ قولداۋىمەن Astana Opera حالىقارالىق وپەرا اكادەمياسى قۇرىلدى. اكادەميا قازاقستاندىق تەاترلار ءۇشىن عانا ەمەس, شەتەل تەاترلارى ءۇشىن دە جاس ماماندار دايارلاۋدا. سونداي-اق «استانا وپەرادا» بالالار تەاتر ستۋدياسى جۇمىس ىستەيدى, ول حور جانە بالەت سەكىلدى ەكى ءبولىمدى, سونداي-اق تەاترلىق قولونەردى ۇيرەتەتىن ستۋديانى قامتيدى. كامەرالىق زالدا بىرنەشە جىل بۇرىن وپەرا-بۋففا جاۋھارلارى شىرقالاتىن Piccolo تەاترى پەرسپەكتيۆالىق جوباسى ىسكە قوسىلدى. بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا رەپەرتۋاردى ر.پەتيدىڭ «پاريج قۇداي اناسىنىڭ سوبورى», ك.ماكميللاننىڭ «مانون» سەكىلدى باسقا دا ايگىلى سپەكتاكلدەرمەن تولىقتىردى».
ال Europa Press يسپان گازەتىنىڭ جۋرناليستەرى «استانا وپەراداعى» ءاربىر وقيعا – بۇل تەاتر جىلناماسىنداعى دەربەس جارقىن پاراقتار ەكەنىن ايتتى. «سونىڭ ءبىرى اۋقىمدى گاسترول – بەس مەملەكەت: اقش, كانادا, فرانتسيا, بەلگيا, نيدەرلاندقا الەمدىك تۋرنە. ترۋپپا ءبىر ەمەس, بىرنەشە رەت يتاليا, يسپانيا, قىتاي, ومانعا جانە باسقا دا ەلدەرگە گاسترولمەن بارىپ, ونەر كورسەتتى. تەاتر قازاقستانداعى «ەكسپو-2017» حالىقارالىق كورمەسىندە تانىستىرعان قويىلىمدار كوپشىلىكتىڭ ەسىندە قالدى, كورمە اياسىندا «استانا وپەرادا» پلاسيدو دومينگونىڭ «وپەراليا» ححV حالىقارالىق ۆوكاليستەر بايقاۋى وتكەن بولاتىن. 1 200 مۋزىكانتتىڭ ورىنداۋىنداعى مالەردىڭ №8 سيمفونياسىنىڭ قازاقستاندىق پرەمەراسى جۇرتشىلىققا ەرەكشە اسەر سىيلادى. اتالعان كونتسەرتتىڭ جازباسى بيىل «مەتستسو» تەلەارناسىندا كورسەتىلدى», دەيدى يسپان گازەتى.
بارلىق شەتەلدىك باق «استانا وپەرانى» تۋريستەرگە, سونداي-اق الەمدىك ىنتىماقتاستىققا اشىق ەل قازاقستاندا وسى جىلدارى ورىن العان اسا ءىرى جاعىمدى وزگەرىستەردى كورسەتەتىن ءارى جاڭا ەلوردا دەگەندە بىردەن ويعا ورالاتىن جاھاندىق جوباعا تەڭەگەنىن اتاپ وتكەن ءجون.
