«شەكتەۋلەردىڭ بانكتەر قىزمەتىنە ايتارلىقتاي اسەر ەتەتىنىن ءتۇسىنىپ, «سبەربانك قازاقستان» مەن «ۆتب قازاقستان» بانك يەلەرىن اۋىستىرۋ ءۇشىن جاڭا ينۆەستور ىزدەۋ جۇمىستارىن جۇرگىزىپ جاتىر. بانكتەردى ساتىپ الاتىن الەۋەتتى ينۆەستور انىقتالعاننان كەيىن بانكتەردى سانكتسيالىق تىزىمنەن شىعارۋعا بايلانىستى اقش وكىلەتتى ورگاندارى تاراپىنان رۇقسات الۋ ماسەلەسىنە وراي اگەنتتىك قاجەتتى شارالاردى كورسەتەدى. قازاقستانداعى ءۇش رەسەيلىك بانك كليەنتتەرىنىڭ شوتتارىندا بۇعاتتالعان سوما كولەمى – 3 ملرد تەڭگە. سايكەسىنشە, قارىز الۋشىلار وزدەرى جۇمىس جۇرگىزۋگە ءتيىس. ەگەر ولار سانكتسيالىق تۇلعاعا جاتپايتىن بولسا, وندا ولاردىڭ اكتيۆتەرى بۇعاتتان شەشىلەدى. ولار اقش قارجى مينيسترلىگىنە تيەسىلى شەتەلدىك اكتيۆتەردى باقىلاۋ باسقارماسىنا جۇگىنە الادى. وسىلايشا, ولار ءوز اكتيۆتەرىن بوساتادى», دەپ ءتۇسىندىردى قارجى نارىعىن رەتتەۋ جانە دامىتۋ اگەنتتىگىنىڭ باسشىسى ءمادينا ابىلقاسىموۆا.
بۇعان دەيىن «بايتەرەك» حولدينگىنىڭ «سبەربانك قازاقستانعا» قىزىعۋشىلىق تانىتقانىن جانە حولدينگتىڭ ەنشىلەس بانكتى ەۋروپا قايتا قۇرۋ جانە دامۋ بانكىمەن بىرلەسە وتىرىپ ساتىپ الۋى مۇمكىن ەكەنىن جازعان ەدىك. سوڭعى اقپاراتتار بويىنشا «سبەربانك روسسيا» دا قازاقستاندىق ەنشىلەس بانكىن ساتۋ جولدارىن ىزدەستىرىپ جاتىر. ء«بىز قازاقستانداعى ەنشىلەس بانكتى ساتىپ الۋ بويىنشا ءتۇرلى ۇسىنىس الىپ جاتىرمىز جانە رەسەي, قازاقستان, سونداي-اق تۇركيا, قىتاي, ءباا ەلدەرىنىڭ ينۆەستورلارىنان دا قىزىعۋشىلىق بار», دەپتى قارجى ينستيتۋتىنىڭ ءباسپاسوز قىزمەتى.
«سبەربانك قازاقستاننىڭ» كوپ ۇزاماي ساتىلارىنا كۇمان كەلتىرۋگە بولماس. ويتكەنى بانك قازاقستان نارىعىنداعى اسا ءىرى, قۋاتتى ويىنشىلاردىڭ ءبىرى دە بىرەگەيى بولدى. نەسيە پورتفەلىنىڭ, رەزەرۆتەرى مەن كاپيتالىنىڭ ساپاسى بويىنشا دا ۇزدىك قارجى ۇيىمى سانالادى جانە وتىمدىلىگى ءار كەز جوعارى باعالانادى. بانك بۇعان دەيىن ءوزىنىڭ 330 ملرد تەڭگە كولەمىندەگى نەسيە پورتفەلىن Halyk Bank-كە ساتتى. اتالعان كەلىسىم اياسىندا قازاقستان دامۋ بانكىنىڭ جەڭىلدەتىلگەن نەسيە باعدارلاماسى اياسىندا راسىمدەلگەن اۆتونەسيە, يپوتەكالىق كرەديت جانە شۇعىل قاجەتتىلىككە وراي الىنعان زايمدار اۋىستى. سونىمەن قاتار ەكى بانك اراسىندا شاعىن جانە ورتا بيزنەس سەكتورىنداعى 7 500 كاسىپورىنعا زايم بەرۋ بويىنشا مامىلە جاسالدى. سوعان وراي «سبەربانك قازاقستاننىڭ» 105 ملرد تەڭگە كولەمىندەگى جانە «دامۋ» قورىنىڭ مەملەكەتتىك باعدارلاماسى بويىنشا بەرىلگەن 4,9 ملرد تەڭگە سوماداعى كوممەرتسيالىق پورتفەلى Halyk Bank-كە بەرىلدى.
بۇعان دەيىن اقش قارجى مينيسترلىگى شەتەلدىك اكتيۆتەردى باقىلاۋ باسقارماسى (Office of Foreign Assets Control – OFAC) «سبەربانك» اق ەب-مەن ساتىپ الۋ كەلىسىمىنىڭ مەرزىمىن 2022 جىلدىڭ 13 ساۋىرىنەن 2022 جىلدىڭ 12 شىلدەسىنە دەيىن ۇزارتاتىن ليتسەنزيانى جاريالاعان ەدى. ياعني اتالعان مەرزىم ىشىندە بانك شتاتتىق رەجىمدە جۇمىس ىستەيدى, ال ونىڭ كليەنتتەرىنە تەڭگە جانە رۋبلدەگى كەز كەلگەن سوماداعى تولەمدەر مەن اۋدارىمدار (سالىق, باج سالىعى, الەۋمەتتىك اۋدارىمدار, ت.ب.) وپەراتسياسى قولجەتىمدى بولادى.
وسىعان دەيىن «بانك تسەنتركرەديت» رەسەيلىك ەنشىلەس «الفا-بانكتىڭ» 100 پايىز اكتسياسىن ساتىپ الىپ, ءوزىنىڭ جەكە قاراجاتى ەسەبىنەن ساتىلىمدى تولىقتاي جۇزەگە اسىرعان ەدى. قايتا تىركەۋدەن وتكەننەن كەيىن بانك ECO BANK جاڭا برەندىمەن نارىقتاعى جۇمىسىن جالعاستىرماق. قازىرگى كليەنتتەرى ءۇشىن بارلىق بانك ونىمدەرىنىڭ شارتتارى بۇرىنعى قالپىنشا قالا بەرەدى. بانك سانكتسيالىق تىزىمنەن شىعارىلعاننان كەيىن كليەنتتەرگە بارلىق بانك قىزمەتتەرى قولجەتىمدى بولماق. ساتىپ الماس بۇرىن بتسك «الفاعا» قاتىستى ءوزىنىڭ بەس جىلدىق بيزنەس-جوسپارىن ۇسىنعان.
