ەلوردا • 13 مامىر، 2022

ەلوردادا «مۋزەي ءتۇنى» اكتسياسى وتەدى

52 رەت كورسەتىلدى

18 مامىر كۇنى استانا تۇرعىندارى مەن قوناقتارى ۇلتتىق مۋزەيگە تەگىن كىرىپ، ونداعى قۇندىلىقتاردى تاماشالاي الادى، دەپ حابارلايدى Egemen.kz.

بيىل ءداستۇرلى، مادەني-تانىمدىق شارا «مۋزەي قۇدىرەتى» اتتى تاقىرىپتا وتەدى. ەلوردا جۇرتشىلىعى 18 مامىر كۇنى ساعات 18:00-دەن ءتۇنى 00:00-گە دەيىن ۇلتتىق مۋزەيدە وتەتىن ايتۋلى شارانىڭ كۋاسى بولا الادى.

ۇيىمداستىرۋشىلاردىڭ ايتۋىنشا، اتالعان شارانىڭ ماقساتى – مادەني قۇندىلىقتاردى، حالقىمىزدىڭ تاريحىن، مادەنيەتىن ءبىر كەڭىستىككە بىرىكتىرە وتىرىپ، ءار ءتۇرلى جانر مەن ستيلدەگى ونەر تۋىندىلارىن كوپشىلىك نازارىنا ۇسىنۋ.

سونداي-اق مۋزەي قىزمەتىن، ونداعى ەكسپوناتتار مەن جادىگەرلەردى كەڭىنەن ناسيحاتتاۋ.

«مۋزەي ءتۇنى» شاراسى قورعانىس مينيسترلىگى مەن ۇلتتىق ۇلان وركەسترىنىڭ سالتاناتتى دەفيلەسىمەن باستالادى. سونىمەن قاتار ىشكى اتريۋمدا «استانا وپەرا» تەاترىنىڭ قويىلىمى ۇسىنىلادى. ودان ءارى «استانا تسيركى» ونەرپازدارىنىڭ قويىلىمىنا جالعاسادى. سول سياقتى ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كونتسەرتى جوسپارلانىپ وتىر»، دەدى قر ۇلتتىق مۋزەيىنىڭ باق-پەن بايلانىس ءبولىمىنىڭ قىزمەتكەرى ديدارحان قۇرمانعازى ۇلى.

سونداي-اق مۋزەيگە كەلۋشىلەر قولونەر شەبەرلەرى جاساعان بۇيىمدار جارمەڭكەسىنە قاتىسىپ، وتاندىق كلاسسيك سۋرەتشىلەردىڭ تۋىندىلارىن تاماشالاي الادى.

«ودان بولەك، «جۇلدىزدى گيد» جوباسى اياسىندا بەيبىت قورعان، رۋحيا بايدۇكەنوۆا، اقەركە تاجىباەۆا، ءادىلحان ماكين جانە تاعى باسقا ونەر جۇلدىزدارى كەلۋشىلەردى مۋزەي زالدارىمەن تانىستىرادى»، دەيدى ول.

ەسكە سالا كەتسەك، ەلىمىزدە «مۋزەي ءتۇنى» اكتسياسى العاش رەت 2015 جىلى ۇيىمداستىرىلدى. 2020 جانە 2021 جىلى پاندەمياعا بايلانىستى اتالعان شارا ونلاين فورماتتا ءوتتى. اراعا 2 جىل سالىپ، بيىل ءداستۇرلى فورماتتا وتپەك.

ايتا كەتەيىك، جىل سايىن 18 مامىردا حالىقارالىق مۋزەي كۇنى اتالىپ وتىلەدى. ونىڭ اياسىندا الەم ەلدەرىندە «مۋزەي ءتۇنى» اكتسياسى ۇيىمداستىرىلادى.

سوڭعى جاڭالىقتار

ۇقساس جاڭالىقتار