الەم • 13 مامىر، 2022

پۋساندا قازاقستاننىڭ باس كونسۋلدىعى اشىلدى

22 رەت كورسەتىلدى

پۋسان قالاسىندا قازاقستان رەسپۋبليكاسىنىڭ باس كونسۋلدىعىنىڭ سالتاناتتى اشىلۋ ءراسىمى ءوتتى، دەپ حابارلايدى Egemen.kz قر سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.

قازاقستان ەلشىسى باقىت دۇيسەنباەۆ قۇتتىقتاۋ سوزىندە باس كونسۋلدىقتىڭ اشىلۋىنا اتسالىسقانى ءۇشىن كورەيا رەسپۋبليكاسىنىڭ ۇكىمەتىنە، سىرتقى ىستەر مينيسترلىگىنە جانە پۋسان قالاسىنىڭ اكىمشىلىگىنە ەرەكشە العىس ءبىلدىردى.

ب. دۇيسەنباەۆ قازاقستان باس كونسۋلدىعىنىڭ اشىلۋى ەكى ەلدىڭ اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىمەن تۇسپا-تۇس كەلگەن تاريحي وقيعا ەكەنىن اتاپ ءوتتى.

اشىلۋ سالتاناتىندا پۋسانداعى قر باس كونسۋلى ايان قاشاباەۆ ءسوز سويلەپ، باس كونسۋلدىقتىڭ ەكىجاقتى ىنتىماقتاستىقتى جانداندىرۋ، سونداي-اق قازاقستان ازاماتتارىنىڭ زاڭدى قۇقىقتارى مەن مۇددەلەرىن قورعاۋ ءۇشىن بارلىق كۇش-جىگەرىن سالاتىنىن اتاپ ءوتتى.

ءىس-شاراعا كورەيا رەسپۋبليكاسى سىرتقى ىستەر مينيسترلىگىنىڭ، پۋسان قالاسى مەرياسىنىڭ، ديپلوماتيالىق كورپۋستىڭ، ىسكەرلىك توپتاردىڭ، جۇرتشىلىق پەن باق وكىلدەرى قاتىستى.

پۋسان - وڭتۇستىك كورەيانىڭ ەكىنشى ءىرى قالاسى جانە سولتۇستىك-شىعىس ازياداعى ەڭ ۇلكەن پورت جانە حالىقارالىق قارجى ورتالىعى. پۋسان اۋماعىندا 51 شەتەلدىك ديپلوماتيالىق وكىلدىكتەر اشىلدى، ولاردىڭ ىشىندە 6 كونسۋلدىق، 5 مادەني ورتالىق، بۇۇ-نىڭ 2 مەكەمەسى، 1 ساۋدا وكىلدىگى جانە 37 قۇرمەتتى كونسۋلدىقتار بار.

ايانا توعانبەك

سوڭعى جاڭالىقتار

ۇقساس جاڭالىقتار