الەم • 13 مامىر، 2022

شىۇ كەڭىستىگىندە ايماقتىق لوگيستيكالىق ورتالىقتار قۇرىلادى

14 رەت كورسەتىلدى

قر يدم باسشىسى شىۇ-عا مۇشە مەملەكەتتەر ترانسپورت مينيسترلەرىنىڭ توعىزىنشى كەزدەسۋىنە قاتىستى، دەپ حابارلايدى Egemen.kz.

القالى باسقوسۋ وزبەكستاننىڭ توراعالىعىمەن حيۆا قالاسىندا ءوتتى.

جيىندا قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ شىۇ ايماعىندا ترانسپورت سالاسىنداعى ءوزارا تيىمدىلىككە نەگىزدەلگەن ىنتىماقتاستىقتى نىعايتۋعا بايلانىستى قازاقستاننىڭ ۇستانىمىن جەتكىزدى. سونداي-اق ۆەدومستۆو باسشىسى ەلدەگى تاۋار تاسىمالىنىڭ بۇگىنگى ءوسىمى تۋراسىندا بايانداپ، رەسپۋبليكانىڭ ءوز ترانزيتتىك-لوگيستيكالىق الەۋەتىن ارتتىرۋ باعىتىندا، اۆتوكولىك جانە تەمىر جول تاسىمال دالىزدەرى مەن ترانسكاسپي حالىقارالىق كولىك مارشرۋتىن دامىتۋ تۇرعىسىنداعى ناقتى قادامدار تۋرالى جان-جاقتى اڭگىمەلەدى.

،

«ترانسپورت سالاسىنداعى جاھاندىق وزگەرىستەر كەزەڭىندە قازاقستان كولىك دالىزدەرىنىڭ ترانزيتتىك الەۋەتى مەن ينفراقۇرىلىمىن دامىتۋعا ۇلكەن باسىمدىق بەرۋدە. بۇل ءوز كەزەگىندە ترانزيتتىك تاسىمالدىڭ جىلدامدىعى مەن ساپاسىن ارتتىرۋعا تىڭ سەرپىن بەرمەك. سوڭعى 15 جىلدا قازاقستاندا تاسىمالداۋ سالاسىنا 35 ملرد دوللار كولەمىندە قارجى ءبولىنىپ، 2 جارىم مىڭ شاقىرىمدى قۇرايتىن جاڭا تەمىر جول پايدالانۋعا بەرىلدى. سونىمەن قاتار 13 مىڭ شاقىرىمنان استام اۆتوكولىك جولدارى سالىنىپ، قايتا جوندەلدى»، دەدى ق. وسكەنباەۆ.

قايىربەك وسكەنباەۆ ءوز سوزىندە بۇگىندە يندۋستريا جانە ينفراقۇرىلىمدىق دامۋ مينيسترلىگىنىڭ ترانسكاسپي حالىقارالىق كولىك مارشرۋتىن دامىتۋ، «اقتاۋ تەڭىز پورتى» ارنايى ەكونوميكالىق ايماعىندا كونتەينەرلىك حابتى قۇرۋ، باتىس ەۋروپا – باتىس قىتاي كولىك ءدالىزىنىڭ ينفراقۇرىلىمىن جەتىلدىرۋ باعىتتارىندا اتقارىپ جاتقان اۋقىمدى شارالارىن نازارعا الدى. سونداي-اق ول مەملەكەتتىك شەكارادان وتكىزۋ پۋنكتەرىنىڭ بەلسەندىلىگىن ارتتىرۋ ورايىندا جۇرگىزىلىپ جاتقان جاڭعىرتۋ جۇمىستارى مەن مودەرنيزاتسياعا دا توقتالدى.

سپيكەر قازاقستان الداعى ۋاقىتتا ءوزارا ارىپتەستىكتى ارتتىرۋ مەن ءتيىمدى كولىك ءدالىزىن قۇرۋ باعىتىنداعى ىنتىماقتاستىقتى، شىۇ-عا مۇشە مەملەكەتتەردىڭ اۆتوكولىك جولدارىن دامىتۋعا بايلانىستى بارلىق باستامالارىن قولداۋعا مۇددەلى ەكەندىگىن جەتكىزدى.

ترانسپورت سالاسىنداعى مينيسترلەردىڭ توعىزىنشى كەزدەسۋى بارىسىندا دەلەگاتسيا باسشىلارى كوپجاقتى تاسىمالداۋدى دامىتۋداعى ىنتىماقتاستىقتىڭ ءتيىمدى تۇستارى مەن قازىرگى جاعدايى جايىندا پىكىر الماستى. شىۇ-نىڭ ترانزيتتىك الەۋەتىن ءتيىمدى پايدالانۋدىڭ باسىمدىقتارىنا توقتالىپ، جۇك تاسىمالداۋ سالاسىن تسيفرلاندىرۋ مەن تاسىمالداۋ ۇدەرىسىنىڭ بىرىڭعاي اقپاراتتىق كەڭىستىگىن قۇرۋدىڭ ماڭىزدى تۇستارىنا نازار اۋداردى.

سونىمەن قاتار جيىن بارىسىندا شىۇ كەڭىستىگىندە ايماقتىق لوگيستيكالىق ورتالىقتار قۇرۋ مەن ولاردىڭ قۇرىلىسىنا قولداۋ كورسەتۋ تۋرالى، حالىقارالىق جولاۋشىلار تاسىمالى كەزىندە قاتاڭ ەپيدەميلوگيالىق تالاپتاردى بىرتىندەپ الىپ تاستاۋ جايىندا ءوزارا ۋاعدالاستىققا قول جەتكىزىلىپ، ءتيىستى شەشىمدەر قابىلداندى.

قاتىسۋشىلار ترانسپورت سالاسىندا ءتيىمدى ىنتىماقتاستىقتى دامىتۋ مەن نىعايتۋ بويىنشا ارنايى جۇمىس توبىن قۇرۋدى ماقۇلداپ، تاسىمالداۋ جانە لوگيستيكا سالالارىنداعى تۇراقتى ءوزارا ىقپالداستىقتى ارتتىرۋعا باعىتتالعان بىرقاتار كەلىسىم، مەموراندۋم مەن كونتسەپتسيالاردى قايتا قارادى.

جيىن قورىتىندىسى بويىنشا ءتيىستى حاتتاماعا قول قويىلدى.

سوڭعى جاڭالىقتار

ۇقساس جاڭالىقتار