رەفەرەندۋم-2022 • 13 مامىر، 2022

ساياسي وزگەرىستەردىڭ باسىم باعىتتارىن ءتۇسىندىردى

51 رەت كورسەتىلدى

قازاقستاننىڭ ازاماتتىق اليانسىنىڭ ۇيىمداستىرۋىمەن «كونستيتۋتسيالىق رەفورما: مەملەكەتتىك باسقارۋدى ترانسفورماتسيالاۋ» تاقىرىبىندا اتا زاڭعا ەنەتىن وزگەرىستەر تۋرالى ساۋالدار جان-جاقتى زەردەلەندى. وڭىرلىك وكىلدىكتەر ءبىر كىسىدەي قاتىسقان باسقوسۋدا ەلىمىزدە وتەتىن رەفەرەندۋمعا قاتىستى وي-پىكىرلەر ورتاعا سالىندى.

اليانس پرەزيدەنتى بانۋ نۇر­عازيەۆا بەينەكوپىر جۇمىسىن اشىپ، قازاقستاننىڭ جۇيەلى ترانسفورماتسيا­سىنا ىقپال ەتەتىن جانە مەملەكەتتىڭ ۇزاق مەرزىمدى دامۋىنىڭ جاڭا پاراديگماسىن ايقىندايتىن پرەزيدەنت جولداۋىندا بەلگىلەنگەن ساياسي رەفور­مالاردىڭ 10 باسىم باعىتىنا جان-جاقتى توقتالدى.

«كونستيتۋتسيالىق رەفورمانىڭ ساياسي ءمانى – سۋپەرپرەزيدەنتتىكتەن پرەزيدەنتتىك باسقارۋ نىسانىنا كوشۋ ماقساتىندا ەكىنشى رەسپۋبليكاعا ءوتۋ. بۇل قازاقستاننىڭ بيلىك ينستيتۋتتارىن قالىپتاستىرۋ مەن ءوزارا ءىس-قيمىلى­نىڭ ساپالى جاڭا مودەلىنە كوشۋىن، جاڭا سايا­سي مادەنيەتتىڭ ورنىعۋىن بىلدىرەدى»، دەدى ب.نۇرعازيەۆا.

ءىس-شارا بارىسىندا رەسپۋبليكالىق شتابتىڭ باسشىسى تولەۋبەك مۇقاشەۆ، «قازاقستان دەپۋتاتتارى بىرلەستىگى» رقب توراعاسى ماقساتحان اناپين، قازاقستاننىڭ ازاماتتىق اليانسى­نىڭ 17 وڭىردەگى كوشباسشىلارى، جەرگىلىكتى ۇكىمەتتىك ەمەس ۇيىمداردىڭ جەتەكشىلەرى رەفەرەندۋمدى وتكىزۋدىڭ مانىنە تولىققاندى توقتالدى.

«بۇل جەردەگى باستى ماسەلە – ۇسىنىلعان وزگەرىستەر بويىنشا ءتۇسىندىرۋ جۇمىستارىن دۇرىس جۇرگىزۋ، سونداي-اق قوعامنىڭ بارلىق توپتارىن تالقىلاۋعا ءتيىمدى تارتۋ. مۇنىڭ ءبارى مەملەكەت باسشىسى ەرەكشە نازار اۋداراتىن «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس كەلەدى»، دەدى تولەۋبەك مۇقاشەۆ ساياسي ناۋقاننىڭ مانىسىنە تەرەڭ ءۇڭىلىپ.

باسقوسۋعا قاتىسقان ساراپشىلار كونستيتۋتسيالىق رەفورمالار ۋاقىت تالابىنا سايكەس كەلەتىنىن، مەملەكەتتى دەمو­كراتيالاندىرۋ باعىتىنداعى وڭ ۇر­دىسكە تولى ەكەنىن اتاپ ءوتتى. «حالىق رەفورمالاردىڭ ءمانىن ءتۇسىنۋى جانە ءوز تاڭداۋىندا بەلسەندى بولۋى ءۇشىن ءتۇسىندىرۋ جۇمىستارىندا جۇدىرىق­تاي جۇمىلۋىمىز كەرەك»، دەدى «گرين» قوستاناي وبلىسىنىڭ ازاماتتىق اليانسى قوعامدىق قورى توراعاسىنىڭ ورىنباسارى بولات قاليەۆ.

بۇكىلحالىقتىق رەفەرەندۋمنىڭ ماڭىزى جان-جاقتى سارالانعان جيىن­دا سپيكەرلەر ادام قۇقىقتارى جونىندەگى ۋاكىلدىڭ تاۋەلسىز مارتەبەسى، كونستيتۋتسيالىق سوتتى زاڭدىلىقتى قامتاماسىز ەتۋدىڭ جوعارى تاۋەلسىز ورگانى رەتىندە قۇرۋ، سۋپەرپرەزيدەنتتىك باسقارۋ فورماسىنان پرەزيدەنتتىك رەسپۋبليكاعا كوشۋ سەكىلدى تاقىرىپ­تارعا دا كەڭىنەن توقتالدى.

سوڭعى جاڭالىقتار

ۇقساس جاڭالىقتار