ەستەرىڭىزگە سالا كەتسەك, The Guardian جانە El País گازەتتەرى ەكى جىلدان بەرى يزرايلدىك Pegasus-قا قاتىستى زەرتتەۋ جۇرگىزىپ كەلەدى. شپيوندىق باعدارلاما ۇيالى تەلەفونداعى مالىمەتتەردى, سونىڭ ىشىندە ەلەكتروندى پوشتانى, ماتىندىك حابارلامالاردى, سۋرەتتەردى جىمقىرۋعا پايدالانىلادى. سونداي-اق تەلەفوننىڭ ديكتوفونىن قوسىپ, كامەراسىمەن سۋرەتكە ءتۇسىرىپ, تىڭداۋ قۇرىلعىسىنا اينالدىرۋعا مۇمكىندىگى بار.
كومپانيا وكىلدەرى باعدارلامانى تەرروريستەر مەن قىلمىسكەرلەردى قۇرىقتاۋى ءۇشىن مەملەكەتتەرگە ساتقانىن ايتىپ وتىر. الايدا The Guardian جانە El País گازەتتەرى جۇرگىزگەن زەرتتەۋدە Pegasus-تى ساياساتكەرلەرگە, جۋرناليستەرگە جانە قۇقىق قورعاۋشىلارعا تىڭشىلىق جاساۋعا پايدالانعانى انىقتالدى.
اپتا ورتاسىندا ۇكىمەت باسشىسى پەدرو سانچەس ۇلتتىق بارلاۋ ورتالىعىنىڭ (CNI) باسشىسى پاس ەستەباندى جۇمىستان شىعارعانىن حابارلادى. مينيسترلەر كابينەتىن باسقارىپ وتىرعان سوتسياليستىك پارتيا وكىلدەرى مۇنى تىڭشىلىقپەن بايلانىستىرىپ وتىر.
ۇيالى تەلەفونى حاكەرلىك شابۋىلعا ۇشىراعاندار قاتارىندا كاتالونيانىڭ تاۋەلسىزدىك قوزعالىسىنا قاتىستى 63 ادام بار. سونىڭ ىشىندە ءوڭىردىڭ پرەزيدەنتى پەرە اراگونەس تە نىساناعا الىنعان ەكەن. بۇدان بولەك, زاڭگەرلەر, جۋرناليستەر مەن ازاماتتىق بەلسەندىلەر دە زارداپ شەككەن. سونداي-اق يسپانيا پرەمەر-ءمينيسترىنىڭ, قورعانىس ءمينيسترىنىڭ تەلەفوندارىنا دا Pegasus باعدارلاماسى ورناتىلعان ەكەن.
وقيعا جاريالانعاننان كەيىن ۇلتتىق بارلاۋ ورتالىعىنىڭ (CNI) باسشىسى پاس ەستەبان پارلامەنتتەگى تىڭداۋ كەزىندە مۇنى مويىنداعان كورىنەدى. نەگىزى وتىرىس جابىق ەسىك جاعدايىندا وتكەن-ءدى. الايدا The Guardian گازەتىنە سۇحبات بەرگەن سوتسياليستىك پارتيا وكىلى مۇنى راستاعان.
كاتالونيا تاراپى تىڭشىلىققا قاتىستى لاۋازىمدى تۇلعالاردىڭ جاۋاپ بەرۋى ءتيىس ەكەنىن مالىمدەدى. كاتالونيا پرەزيدەنتى اراگونەستىڭ ايتۋىنشا, شپيوندىققا قاتىستى مالىمەتتىڭ تارالۋى كاتالون مەكەمەلەرى مەن تاۋەلسىزدىك قوزعالىسىن قولدايتىندارعا قارسى جاپپاي تىڭشىلىق جاسالعانىن راستايدى.
«بۇعان نە سەبەپ بولعانىن ءبىلۋ جانە ءوزىمىزدى قورعاۋىمىز ءۇشىن سوت رۇقساتىمەن ونىڭ قۇپيالىعىن جويۋدى تالاپ ەتەمىز. بۇل ماسەلەنى قوعامدىق تۇرعىدا ءتۇسىنۋ وتە ماڭىزدى. بۇعان ساياسي رۇقساتتى كىم بەرگەنىن, مۇنى كىمنىڭ بىلگەنى بىزگە ايتىلۋى ءتيىس. سوندىقتان جوعارى لاۋازىمدى تۇلعالاردان جاۋاپ تالاپ ەتەمىز», دەدى پ.اراگونەس.
اراگونەستىڭ اشۋلانۋى بەكەر ەمەس. ونىڭ پارتياسى قازىرگى كەزدە سوتسياليستىك جۇمىسشىلار پارتياسىمەن (PSOE) بىرگە پارلامەنتكە كواليتسيا قۇرىپ, ۇكىمەتتى باسقارىپ وتىر. سوندىقتان ول كاتالونيانىڭ ازاتتىعىن بىرتىندەپ الۋدى قولدايتىن پارتيا تاۋەلسىزدىك داعدارىسىن شەشۋگە كەدەرگى كەلتىرەتىنىن العا تارتتى.
سونداي-اق بيلىككە يە كواليتسياعا سىزات ءتۇستى. Unidas Podemos وكىلدەرى سوتسياليستىك پارتياعا قارسى شىعىپ, قورعانىس ءمينيسترى مارگاريتا روبلەستىڭ وتستاۆكاعا كەتۋىن تالاپ ەتتى. ويتكەنى ۇلتتىق بارلاۋ ورتالىعىنا وسى ۆەدومستۆو باسشىلىق جاسايدى. ونىڭ ۇستىنە كاتالونيانىڭ ازاتتىعىن بەتكە ۇستاعان «كاتالونيا رەسپۋبليكالىق سولشىلدار» پارتياسى دا PSOE-نى قولداپ كەلدى.
ساراپشىلاردىڭ پايىمداۋىنشا, پەدرو سانچەس ۇلتتىق بارلاۋ ورتالىعىنىڭ باسشىسىن قىزمەتىنەن بوساتۋ ارقىلى ارىپتەستەرىنە قاتىستى «ارام ويى» جوق ەكەنىن كورسەتتى. وسىلايشا, پرەمەر-مينيستر كواليتسيانى ساقتاپ قالۋدى كوزدەيدى. ياعني «وگىزدى دە ولتىرمەي, اربانى دا سىندىرماۋدى» ويلايدى. ويتكەنى كواليتسيا تاراپ, بۇگىن-ەرتەڭ جالپى سايلاۋ وتە قالسا, وپپوزيتسياداعى ادامدار پارتياسى جەڭىسكە جەتىپ كەتۋى مۇمكىن. سوڭعى ساۋالداماعا سۇيەنسەك, قازىرگى تاڭدا اتالعان پارتيانى قولدايتىندار 25 پايىزعا جەتكەن.
بىراق ۇكىمەت باسشىسىنىڭ بۇل قادامى كاتولونداردىڭ اشۋىن جازباعان سىڭايلى. ماسەلەن, پەرو اراگونەس كاتالونيا پارلامەنتىندە سويلەگەن سوزىندە ەستەباننىڭ كەتۋىمەن داعدارىس تىنىشتالدى نەمەسە شەشىلدى دەپ ەشكىم ايتا المايتىنىن العا تارتتى. سونداي-اق تىڭشىلىققا قاتىستى ءالى تولىق تۇسىنىكتەمە بەرىلمەگەنىن, ونىڭ قايتالانبايتىنىنا كەپىلدىك بەرىلمەگەنىنە توقتالدى.
قورىتا ايتقاندا, يسپانيادا ساياسي جانجال ۋشىعىپ كەتۋى ىقتيمال. ءدال قازىر پرەمەر-مينيستر ماسەلەنى شەشۋگە بارىن سالىپ جاتىر. دەگەنمەن تەلەفونى تىڭدالعاندار ۇكىمەت باسشىسىنىڭ ارەكەتىنە قانشالىقتى كوڭىلى تولاتىنىن ءدوپ باسىپ ايتۋ قيىن.
